ۆەدومستۆو باسشىسىنىڭ پىكىرىنشە, بۇگىنگى تاڭدا قازاقستاننىڭ گەوساياساتتاعى ءرولى ارتا ءتۇسىپ كەلەدى. بۇعان ايعاق رەتىندە ەلىمىزدىڭ ۇلى جىبەك جولىن قايتا تۇلەتۋ جونىندەگى كەڭ اۋقىمدى ينفراقۇرىلىمدىق جوباعا بەلسەندى قاتىسۋىن ايتۋعا بولادى.
– قازاقستان باسشىسى «نۇرلى جول» باعدارلاماسىن جاريا ەتتى. پرەزيدەنتتىڭ سوزىنە قاراعاندا, جولداردى كۇرەتامىر دەسەك, جىبەك جولى ونىڭ ارتەريالارىن كەڭەيتە تۇسەدى. ونىڭ ۇستىنە, جوعارى ساپالى تراسسالاردىڭ تالدىقورعان مەن ورال قالالارىن جالعاپ جاتقانى ءبىر ماسەلە, ال ليانيۋنگان مەن شانحايدان شىعىپ, قازاقستان اۋماعى ارقىلى ەۋروپا مەن رەسەيدى جالعايتىن زاماناۋي جولداردىڭ قۇرىلىسى باسقا ماسەلە, – دەدى مينيستر. – پرەزيدەنت قاي كەزدە دە تەڭىز تاسىمالدارىن مىسال رەتىندە كەلتىرىپ كەلەدى. ولار ارزان بولعانىمەن, باياۋ: شانحاي پورتىنان شىققان تاۋار روتتەردامعا دەيىن ءبىر اي ءجۇرۋى مۇمكىن. وسى جەردە ءبىز تاسىمال ۋاقىتىن ايتارلىقتاي قىسقارتۋعا مۇمكىندىك بەرەتىن بالامالى نۇسقا ۇسىنا الامىز.
وسىنىڭ ارقاسىندا ەلىمىزدىڭ گەوساياساتتاعى ءرولى ارتادى جانە قازاقستان ترانزيتتەن ايتارلىقتاي كولەمدە پايدا تۇسىرە الادى. ءسويتىپ, تەڭىز پورتىندا جۇمىس ىستەيتىن بارلىق لوگيستيكا قۇرعاق پورتتا دا جۇمىس ىستەيتىن بولادى.
بۇرناعى اپتادا قازاقستان قوعامىندا كەڭ تالقىلانعان كەلەسى ءبىر ماسەلە – ازەربايجاننىڭ بانكروتقا ۇشىراعان حالىقارالىق بانكىنە ءبىرتۇتاس جيناقتاۋشى زەينەتاقى قورىنداعى (بجزق) جيناقتاردى اۋدارۋمەن بايلانىستى تاۋەكەلدەر بولعانى انىق. بۇل ارادا داۋرەن اباەۆ قازاقستاندىقتاردىڭ زەينەتاقى جيناقتارى مەملەكەتتىڭ كەپىلدىگىندە بولاتىندىعىنا سەندىرىپ, ءتۇرلى باعىتتاعى قاۋەسەتكە نۇكتە قويعانداي بولدى.
– قازىرگى كەزدە تەكسەرۋ جۇمىستارى جۇرگىزىلىپ جاتىر, ال ونىڭ ناتيجەلەرى جۇرتشىلىققا مىندەتتى تۇردە جەتكىزىلەتىن بولادى. قازاقستاندا زەينەتاقى جيناقتارىنا مەملەكەتتىك كەپىلدەمە قاراستىرىلعان, ال ونى ەشكىم دە الىپ تاستاعان جوق, ول ءتىپتى ينفلياتسيانى دا ەسكەرەدى. سوندىقتان, زەينەتاقى تيەسىلى بارشا ازامات ونى الاتىن بولادى. بۇل جەردە ەشقانداي دا كۇمان بولماۋى ءتيىس, – دەدى ۆەدومستۆو باسشىسى.
ازەربايجان ۇكىمەتى بانكتىڭ قارىزىن تولەۋ تۋرالى شەشىم قابىلداعان. سوندىقتان, بجزق-عا دا, حالىقارالىق بانككە قارجى سالعان باسقا كومپانيالارعا دا ەشقانداي قاۋىپ جوق.
بانكتەر اراسىنداعى كەلەسى ءبىر كەلىسىم – حالىق بانكى مەن قازكوممەرتسبانكتىڭ قوسىلۋىنا قاتىستى ايتقاندا, اقپارات جانە كوممۋنيكاتسيالار ءمينيسترى ناقتى ناتيجەلەرگە قول جەتكىزبەي تۇرىپ, بۇل كەلىسىمنىڭ نە بەرەتىنىن ءدال بولجاۋ قيىن ەكەنىن اتاپ كورسەتتى.
– بانكتەردىڭ قوسىلۋى – قالىپتى ۇدەرىس. بۇل جەردە ازاماتتاردىڭ دەپوزيتتەرىمىزدى جوعالتىپ المايمىز با دەگەن الاڭداۋشىلىعى باسقا اڭگىمە. اسا ماڭىزدى جايتقا نازار اۋدارعىم كەلەدى: قازكوممەرتسبانك تە, حالىق بانك تە قازاقستان ازاماتتارى سالىمدارىنا كەپىلدىك بەرەتىن قارجى قورلارىنا قاتىسۋشى بولىپ تابىلادى. سوندىقتان, الاڭداۋعا ەش نەگىز جوق, – دەپ سەندىردى داۋرەن اباەۆ.
