لەككو قالاسىنداعى «Teatro Societa» مەن ەزينو-لاريوداعى «Teatro Comunale» كونتسەرتتىك زالدارى – يتالياداعى تانىمال مادەني وشاقتاردىڭ قاتارىنان سانالادى. كورەرمەندەرى دە كوپ. «قازاقكونتسەرتتىڭ» ارتىستەرى وسى ەكى ۇلكەن ساحنادا ونەر كورسەتكەن.
فولكلورلىق-ەتنوگرافيالىق ءانسامبلدىڭ ارتىستەرى دومبىرا, قىلقوبىز, جەتىگەن مەن سازسىرناي ۇندەرىمەن, ال, وسى كۇنى ەلگە ءبىرشاما تانىمال ازامات جىلتىركوزوۆ, ايزادا قاپونوۆا, ەرلان رىسقالي, گۇلميرا تاپاي, باتىرجان سماقوۆ پەن داۋرەن ورازبەكوۆ سىندى انشىلەر اكادەميالىق ورىنداۋشىلىق قابىلەتتەرىمەن قازاق اۋەنىنىڭ, ءانىنىڭ تەرەڭ يىرىمدەرىنە بويلاپ, بولەكشە قاسيەتىن تانىتقان.
كونتسەرتتىك باعدارلامادا انمەن قوسا كۇي ونەرىنە دە ەرەكشە باسىمدىق بەرىلگەن. ايان وماروۆ پەن اقەركە تاجىباەۆا سەكىلدى جاستار كونە ەكى ىشەكتى, ىسپالى مۋزىكالىق اسپاپ قىلقوبىزدا ءا.قازاقباەۆتىڭ «تىلەپ سارىنى» كۇيىن ورىنداسا, بەلگىلى كۇيشى سەكەن تۇرىسبەك باستاعان دومبىراشىلار توبى قازاقتىڭ اردا كۇيلەرىمەن يتاليا ساحنالارىن دۇبىرلەتكەن.
يتاليالىق كورەرمەندەردى تامساندىرعان نارسە – ولاردىڭ ءتول تۋىندىلارىنىڭ قازاقتىڭ مۋزىكالىق اسپابىمەن ورىندالۋى. ك.مونتەۆەرديدىڭ اتاقتى «Si dolce el tormento» تۋىندىسىن قىلقوبىز بەن جەتىگەن اسپاپتارىمەن ورىنداعان باتىرجان سماقوۆ, ايان وماروۆ پەن ۆەنەرا تابىس تىڭدارماندارعا جاقسى كوڭىل كۇي سىيلاسا, حالىقارالىق بايقاۋلاردىڭ لاۋرەاتى ايزادا قاپونوۆا مەن قازاقستاننىڭ ەڭبەك سىڭىرگەن قايراتكەرى ازامات جىلتىركوزوۆتىڭ يتاليان تىلىندە ءان شىرقاعانىن دا اتاپ ءوتۋ كەرەك.
ايگۇل سەيىلوۆا,
«ەگەمەن قازاقستان»
