كەلەسى اپتادا, ياعني 14 قاڭتاردا قازاقستان توراعالىعىمەن وتەتىن ۆەناداعى تۇراقتى كەڭەستىڭ العاشقى ماجىلىسىنە قىزۋ دايىندىق ءجۇرىپ جاتىر. وقىرماندار ەسىنە سالا كەتەيىك, تۇراقتى كەڭەس – ەقىۇ-نىڭ ءار اپتانىڭ بەيسەنبىسى سايىن ۆەناداعى ەلشىلەر دەڭگەيىندە جينالاتىن شەشىم شىعارۋشى ورگان. ونىڭ جۇمىسىنا قازىرگى توراعانىڭ وكىلى باسشىلىق ەتەدى. ادەتتە, جىل باسىنداعى العاشقى تۇراقتى كەڭەس – ەقىۇ قاۋىمداستىعى, اسىرەسە, ديپلوماتيالىق توپتار ايرىقشا قىزىعۋشىلىقپەن كۇتەتىن وقيعا. سەبەبى, ونىڭ ماجىلىسىندە توراعالىقتىڭ جىل بويىنا جوسپارلاناتىن ارەكەتتەر باعدارلاماسى تانىستىرىلادى. ءماجىلىس باسىندا پرەزيدەنت نۇرسۇلتان نازارباەۆتىڭ كەڭەس قاتىسۋشىلارىنا ارنالعان بەينەجولداۋى بەرىلەدى. كەڭەس وتىرىسىنا ەقىۇ-نىڭ قازىرگى توراعاسى, ەلىمىزدىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ قاتىسىپ, قازاقستاننىڭ ۇيىمداعى توراعالىعى كەزىندەگى باسىم باعىتتارى تۋرالى بايانداما جاسايدى. 1 قاڭتار كۇنى ەقىۇ حاتشىلىعىنىڭ ءباسپاسوز جانە قوعامدىق اقپارات ءبولىمى قازاقستان توراعالىعىنىڭ باستالۋىنا وراي حالىقارالىق بۇقارالىق اقپارات قۇرالدارىنا ارناپ ءباسپاسوز رەليزىن تاراتتى. وندا: “قازاقستان ەقىۇ توراعالىعىن قابىلداپ, ەقىۇ قۇندىلىقتارى مەن قاعيداتتارىن قالتقىسىز ۇستاناتىندىعىن, بارلىق مۇشە مەملەكەتتەر مۇددەلەرىن ەسكەرەتىندىگىن, سونىمەن قاتار, ەۋرازيالىق كەڭىستىكتىڭ قاۋىپسىزدىگىنە ناقتى ۇلەس قوساتىن ماڭىزدى ۇنقاتىسۋ الاڭى رەتىندەگى ەقىۇ ءرولىن دامىتاتىندىعىن راستايدى”, دەلىنگەن. ءبولىم ەقىۇ-نىڭ قازىرگى توراعاسى, قازاقستاننىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆتىڭ ءسوزىن كەلتىرە وتىرىپ, “قازاقستان ۇيىمدا توراعالىق ەتەتىن العاشقى ورتالىق ازياداعى ەل جانە بۇرىنعى كەڭەس وداعى رەسپۋبليكاسى. بۇل مۇشە مەملەكەتتەردىڭ تەڭ قۇقىققا يە ەكەندىگى تۋرالى قاعيداتتىڭ كۇشىندە ەكەنىنىڭ دالەلى, سونىمەن قاتار, ستراتەگيالىق ماڭىزدى وڭىردە جانە ەقىۇ كەڭىستىگىندە قازاقستان ءرولىنىڭ ارتۋدا ەكەنىن مويىنداۋ بولىپ تابىلادى”, – دەدى. “ەقىۇ توراعاسى رەتىندە قازاقستان بەيتاراپتىق جانە ۇيلەسىمدىلىك قاعيداتتارى نەگىزىندە ۆەنادان شىعىس پەن باتىسقا سوزىلعان ۇيىمعا مۇشە مەملەكەتتەر ۇستانىمىن جاقىنداتۋعا, ۆانكۋۆەردەن ۆلاديۆوستوكقا دەيىنگى كەڭىستىكتەگى ىنتىماقتاستىقتىڭ نىعايۋى مەن قاۋىپسىزدىكتىڭ بەكۋىندەگى ۇيىم ءرولىنىڭ وسۋىنە جاعداي جاساماق”, – دەدى. ءسوزىن جالعاستىرا كەلە ول: “قازاقستان “كورفۋ ۇدەرىسىن” جالعاستىرادى جانە ۇزاق قاقتىعىستار وڭىرىندەگى احۋالدى تۇراقتاندىرۋ مەن ولاردى شەشۋدەگى, حالىقارالىق كولىك دالىزدەرىن دامىتۋداعى, تولەرانتتىلىق پەن ءوزارا تۇسىنىستىكتى نىعايتۋداعى ەقىۇ جۇمىستارىنا جاڭا سەرپىن بەرۋگە ۇمتىلاتىن بولادى. قازاقستان ەكىنشى دۇنيەجۇزىلىك سوعىستىڭ اياقتالعانىنا 65 جىل, حەلسينكي قورىتىندى اكتىسىنە 35 جىل جانە جاڭا ەۋروپالىق پاريج حارتياسىنا 20 جىل تولۋى قارساڭىنا كەلەتىن ەقىۇ سامميتىنە دايىندىق پەن ونى ۇيىمداستىرۋعا قاتىستى بارلىق ەقىۇ سەرىكتەستەرىمەن بەلسەندى جۇمىس جۇرگىزەتىن بولادى”, – دەدى. اتاپ وتەرلىك قىزىق ءجايت, 14 قاڭتارداعى العاشقى تۇراقتى كەڭەس وتىرىسىن ەقىۇ-نىڭ ينتەرنەتتەگى YouTube ارناسى ارقىلى تىكەلەي ەفيردەن نەمەسە جازبا تۇرىندە كورۋگە بولادى. ول ءۇشىن www.youtube.com/osce ادرەسىنە كىرۋ قاجەت. ال تۇراقتى كەڭەس ءماجىلىسى قارساڭىڭدا قازاقستاننىڭ ەقىۇ-داعى توراعالىعىنىڭ اشىلۋىنا وراي ۆەنا قالاسىنداعى حوفبۋرگ يمپەراتور سارايىندا سالتاناتتى كونتسەرت قويىلادى. وعان ەلىمىزدىڭ ءبىر توپ اتاقتى ونەر شەبەرلەرىنىڭ قاتىسۋى كۇتىلۋدە. ياعني, ەۋروپا قازاقستاننىڭ ساياسي باستامالارىمەن تانىسىپ قانا قويماي, سونىمەن قاتار, مادەني جەتىستىكتەرىن تاماشالايتىن بولادى. ەقىۇ شتاب-پاتەرىندە قازىرگى توراعا قانات ساۋداباەۆ ۇيىم حاتشىلىعى, ينستيتۋتتارى, تىستاعى ميسسيالارى باسشىلارىمەن ءماجىلىس وتكىزەدى. وقىرماندارىمىزعا بەلگىلى بولعانىنداي, قازىرگى تاڭدا ۇيىمنىڭ بىرنەشە ينستيتۋتى قىزمەت ەتەدى, سولاردىڭ ىشىندە دەموكراتيالىق ينستيتۋتتار مەن ادام قۇقىقتارى جونىندەگى بيۋرو, باق بوستاندىعى جونىندەگى وكىلىنىڭ ءوفيسى, از ۇلتتار جونىندەگى جوعارعى كوميسسار جانە ت.ب. بار. ەقىۇ-نىڭ ءتورت نەگىزگى ايماقتارىندا شوعىرلانعان 18 ميسسياسى جۇمىس ىستەيدى. ولار بالقان تۇبەگىندە (البانيا, بوسنيا جانە گەرتسەگوۆينا, چەرنوگوريا, حورۆاتيا, سەربيا, كوسوۆو, بيۋر ماكەدونيا), شىعىس ەۋروپادا (بەلارۋس, مولدوۆا, ۋكراينا), وڭتۇستىك كاۆكازدا ء(ازىربايجان, ارمەنيا, ەقىۇ-نىڭ مينسك كونفەرەنتسياسىنىڭ تاقىرىبى بولىپ تابىلعان جانجال (ياعني, تاۋلى قاراباق ماسەلەسى) جونىندەگى توراعانىڭ جەكە وكىلىنىڭ ءوفيسى) جانە ورتالىق ازيادا (قازاقستان, قىرعىزستان, تاجىكستان, تۇركىمەنستان, وزبەكستان). ۆەناعا ساپارى اياسىندا ەلىمىزدىڭ سىرتقى ساياسات ۆەدومستۆوسىنىڭ باسشىسى, سونداي-اق اۆستريا رەسپۋبليكاسىنىڭ باسشىلىعىمەن, وسى قالادا ورنالاسقان بۇۇ جانە باسقا دا حالىقارالىق ۇيىمدار جەتەكشىلەرىمەن كەزدەسەدى دەپ جوسپارلانۋدا.
تالعات جۇماعۇلوۆ – ۆەنادان.
