ۇكىمەت باسشىسىنىڭ جىل سايىنعى ەلىمىز ايماقتارىن ارالاپ, جاعدايمەن تىكەلەي تانىسۋى الدىمەن استانامەن ىرگەلەس ءوندىرىستى وڭىردەن باستالۋىنا قاراعاندىلىقتار ۇلكەن ءمان بەرەدى. وتاندىق يندۋستريانىڭ قارا شاڭىراعى سانالاتىن, دامۋدىڭ جاڭا كەزەڭىندە كوشباسشىلىق ورنىن جوعارىلاتقان ولكەگە ءۇمىت پەن جاۋاپكەرشىلىك جۇگى اسا سالماقتى ەكەنى بەلگىلى. ول ابىرويلى اقتالىپ كەلەدى. ءمالىم سەبەپتەرگە قاراماستان بىلتىرعى بەلگىلەنگەن مىندەتتەر تىڭعىلىقتى ورىندالدى. الدا ودان دا اۋقىمدى ىستەر تۇر. جۇمىس ساپارىندا بۇقار جىراۋ اۋدانىنا ارنايى اتباسىن بۇرعان ك.ءماسىموۆ بوتاقارا كەنتىندە “100 مەكتەپ, 100 اۋرۋحانا” باعدارلاماسى اياسىندا شاڭىراق كوتەرگەن جاڭا ەمدەۋ ورتالىعىنا سوقتى. ەكى جىل ىشىندە سالىنىپ, پايدالانۋعا بەرىلگەن نىساننىڭ اشىلۋ سالتاناتىنا قاتىستى. ءبىر اۋىسىمدا 200 سىرقاتتى قابىلدايتىن ەمحاناسى جانە 100 توسەكتىك اۋرۋحاناسى بار اتالعان ورتالىق ساپالى مەديتسينالىق قىزمەت كورسەتۋگە نەگىزدەلگەنىنە ءىشىن ارالاپ كورۋ كەزىندە كوز جەتكىزدىك. ايماقتا سوڭعى ۋاقىتتا جوعارى تەحنولوگيالىق كاسىپورىندار قاتارىن ۇلعايتۋ باعىتىندا ءىرى يندۋستريالىق-يننوۆاتسيالىق جوبالار ىسكە اسىرىلۋدا. جىلىنا 130 مىڭ جىلىتۋ رادياتورىن شىعاراتىن “كaztherm” جشس سولاردىڭ ءبىرى سانالادى. سەرىكتەستىك جەتەكشىلەرى كارىم قاجىمقان ۇلىن ونىڭ جۇمىسىمەن جان-جاقتى تانىستىرىپ, قۇرىلىس ۇيىمدارىنىڭ ۇلكەن سۇرانىسىنا يە وسىناۋ ءوتىمدى ءونىمدى ءوندىرۋ كولەمى ۇلعايا تۇسەتىندىگىن اتادى. پرەمەر-مينيستر بۇدان كەيىن قاراعاندى قالاسىنىڭ “گۇلدەر” شاعىن اۋدانىندا جاقىندا ەسىك اشقان “بالاقاي” بالاباقشاسىنىڭ تاربيەشىلەرى جانە تاربيەلەنۋشىلەرىمەن كەزدەستى. مۇندا ەلىمىزدىڭ مەكتەپكە دەيىنگى مەكەمەلەرىندە العاش رەت ۇيىمداستىرىلعان وقىتۋدىڭ يننوۆاتسيالىق فورمالارى كابينەتى جۇمىس ىستەيدى. ونىڭ بالدىرعانداردىڭ ەستە ساقتاۋ, ەسەپتەۋ, وقۋ, جازۋ داعدىلارىن ويىن ارقىلى ۇيرەتۋگە, بەرىكتىرۋگە مۇمكىندىك بەرەتىندىگى نازار اۋدارتتى. سونىمەن بىرگە تاعى ءبىر ەرەكشەلىك, ءاربىر ءبۇلدىرشىننىڭ دامۋى مەن ۇلگەرىمى جايىندا ەلەكتروندى دەرەكتەر بانكى جاسالعان. مۇنىڭ ءوزى اتا-انالار بالالارىنىڭ ءبىلىمى مەن بەيىندىك قابىلەتتەرىن ينتەرنەت ارقىلى ءبىلىپ, باقىلاي الىپ وتىرۋلارىنا وتە ىڭعايلى جاعداي تۋعىزادى. بىلتىر وبلىستا “جول كارتاسى” باعدارلاماسى بويىنشا اتقارىلعان ىستەر ەل ءىشى تىنىسىنا تىڭ سەرپىن بەردى. سولاردىڭ ەلەۋلى ءبىر كورىنىسى رەتىندە ك.ستانيسلاۆسكي اتىنداعى ورىس دراما تەاترى عيماراتىنىڭ قايتادان قۇلپىرىپ, جاڭارىپ, ونەرسۇيەر قاۋىممەن تانىعىسىز قالىپتا قاۋىشۋىن اتاۋعا بولادى. بۇدان ەلۋ جىل بۇرىن وتاۋ تىككەن مۇندا بۇرناعى جىلعا دەيىن س.سەيفۋللين اتىنداعى قازاق دراما تەاترى دا قوڭسىلاس بولىپ كەلگەن ەدى. عاجايىپ جاڭا عيماراتقا ورىن تەبىسىمەن مۇندا ونەر ورداسىن ادەمى كەسكىن-كەلبەتكە كەلتىرۋ قولعا الىنىپ, ول قالا كوركىنە اينالدى. ۇكىمەت باسشىسى رەسەي فەدەراتسياسىنىڭ قازاقستان رەسپۋبليكاسىنداعى ەلشىسى ميحايل بوچارنيكوۆپەن بىرگە تەاتر الدىندا جينالعانداردىڭ قۋانىشىنا ورتاقتاسىپ, اتاقتى رەجيسسەرگە ورناتىلعان ەسكەرتكىشكە گۇل شوقتارى قويىلدى. كورشى ەلدىڭ مادەنيەت سالاسى وكىلدەرى اتىنان تەاترلار قايراتكەرلەرى وداعى توراعاسىنىڭ ءبىرىنشى ورىنباسارى, رەسەي حالىق ءارتىسى ەۆگەني ستەبلوۆ ءسوز سويلەپ, ورىس ونەرىنە, ونىڭ تۇلعالى ساڭىلاعىنا دەگەن قازاقستاندىقتاردىڭ زور قۇرمەتىنە العىس سەزىمىن جەتكىزدى. قاراعاندىدا جاسالىپ, شىعارىلۋى جولعا قويىلعان “ارگلابين” ءدارىسى بۇگىندە الىسقا ايان. ەلباسىنىڭ تىكەلەي قولداۋىمەن قۇرىلعان, “فيتوحيميا” حالىقارالىق عىلىمي-وندىرىستىك حولدينگى مەن قاراعاندى فارماتسەۆتيكالىق كەشەنى وتاندىق بىرەگەي فيتوپرەپاراتتاردى كەشەندى تۇردە بيولوگيالىق بەلسەندى زاتتاردى ىزدەستىرۋدەن باستاپ, دارىلىك شيكىزاتتى ءوسىرۋ, ولاردى وڭدەپ, جاڭا فيتوپرەپاراتتاردىڭ دايىن دارىلىك تۇرلەرىنىڭ تاجىريبەلىك-ونەركاسىپتىك مولشەرىن شىعارۋعا دەيىن جەتكىزۋ جۇمىستارىن جۇرگىزۋدە. پرەمەر-مينيستر وسىندا بولعاندا بۇل ىستەرگە ەرەكشە زەيىن قويدى. پرەپاراتتاردى ءوندىرۋدىڭ تولىق تسيكلى, سونىڭ ىشىندە دايىن ءونىمنىڭ ساپاسىن باقىلاۋ, بيولوگيالىق بەلسەندى زاتتاردىڭ جانە ءدارى-دارمەكتىڭ ستاندارتتى ۇلگىلەرىنىڭ رەسپۋبليكالىق بانكى كورسەتىلدى. مەملەكەت باسشىسىنىڭ تاپسىرماسى بويىنشا ءبىرىنشى جانە ەكىنشى كەزەكتەرى مەرزىمىندە پايدالانۋعا بەرىلگەن فارماتسەۆتيكالىق كەشەننىڭ ەندى ءۇشىنشى كەزەگىن ىسكە قوسۋ كۇن تارتىبىندە تۇر. ول فيتوپرەپاراتتاردىڭ سۋبستانتسيالارى نەگىزىندە تابلەتكالى جانە تۇيىرشىكتى دارىلىك تۇرلەردى دايىنداۋعا, سونداي-اق, ەكسپورتقا باعىتتالعان وتاندىق پرەپاراتتار شىعارۋ كولەمىن ارتتىرۋعا ىقپال ەتپەك. سوندىقتان ۇكىمەت باسشىسىنا اتالعان حولدينگ پەن كەشەن جەتەكشىلەرى ءمالىم ەتكەندەي, وسى قۇرىلىستىڭ مەجەلى ۋاقىتتا اياقتالۋى ءۇشىن قارجىنىڭ جەتكىلىكتى ءبولىنۋى قاجەت. بۇل ۇسىنىستىڭ قولداۋ تاباتىندىعى ايتىلدى. بۇعان قوسا دارىلەردى كەپىلدەمەلىك نەگىزدە ساتىپ الۋعا “سامۇرىق-قازىنا” قورى تاراپىنان ۇزاق مەرزىمگە كەلىسىم-شارت جاساۋعا ىقپال ەتىلەتىندىگى دە اتاپ كورسەتىلدى.
ايقىن نەسىپباي,
قاراعاندى.
