مىنە, جاڭا عانا گازەتىمىز شىعاتىن استانا, الماتى, قىزىلوردا, اقتوبە, شىمكەنت, پاۆلودار, تاراز, ورال, قاراعاندى, تالدىقورعان, وسكەمەن, اتىراۋ قالالارىنداعى باسپاحانالاردان سول مالىمەتتەر كەلىپ ءتۇستى. ءار باسپاحانانىڭ ەرتەڭگى ءنومىردى قانشا دانامەن باسقالى جاتقانىن قوسىپ كەپ جىبەرگەندە ءبىز مىنا شاعىن ماقالانىڭ باسىنا قويعان سان شىعا كەلدى. 160 412! ءيا, بۇگىننەن باستاپ “ەگەمەن قازاقستان” وسىنداي تارالىممەن تارايدى. ءبىر جىلدىڭ ىشىندە تارالىم 10 مىڭعا ءوستى! كۇزدە مينيسترلىگىمىزدىڭ كەڭەيتىلگەن القا ءماجىلىسى وتكەن. سويلەگەنبىز. ءمينيستردىڭ كەلەر جىلعى تارالىمنىڭ جايى جونىندەگى سۇراعىنا “شامامەن 155 مىڭنىڭ ماڭايىنا باراتىن شىعارمىز”, دەگەنبىز. سولاي ايتۋىن ايتقانمەن, گازەتتەر تىنباي جازىپ, تەلەارنالار تىنباي كورسەتىپ جاتقان قارجى داعدارىسى وقىرمانداردىڭ باسپاسوزگە جازىلىم كەزىندەگى كوڭىل-كۇيىنە اسەر ەتەر مە ەكەن, ونداي جاعدايدا تارالىمنىڭ وتكەن جىلعى دەڭگەيىن ساقتاپ قالۋدىڭ ءوزىن ولجا ساناعان ءجون-اۋ دەگەن الاڭ كوڭىلدىڭ بولعانى دا راس ەدى. ەندى سول كۇدىك-كۇماننىڭ ءبارى سەيىلىپ سالا بەردى. بۇكىل الەمدى جايلاعان قارجى داعدارىسىنىڭ ءبىزدىڭ ەلىمىزدەگى احۋالعا ىقپال جاساي الماعانىن “ەگەمەن قازاقستانعا” جازىلۋشىلار قاتارىنىڭ قالىڭداي تۇسكەنىنەن دە كورۋگە بولادى. ەكسپورتتىڭ كولەمى جارتىسىنا دەيىن كەمىپ كەتكەن, سول جارتىنىڭ ءوزىنىڭ قۇنى بىرنەشە ەسە ارزانداپ كەتكەن جاعدايدا دا جالاقىنى, زەينەتاقىنى, شاكىرتاقىنى ۋاقتىلى بەرىپ قانا قويماي, بۇرىن مەجەلەنگەن دەڭگەيدە ءوسىرىپ وتىرعان ەل ءۇشىن, ەكونوميكانى ءارتاراپتاندىرۋدىڭ جاسامپازدىق جوسپارلارىن جۇزەگە اسىرۋ ارقىلى ءوندىرىس اۋقىمىن ازايتپاۋعا, قايتا وسىرۋگە قول جەتكىزگەن, بىردە-ءبىر بانكتى بانكروتتىققا ۇرىندىرماي امان الىپ قالعان, اقىر اياعى الاياقتارعا الدانعان ۇلەسكەرلەرگە دەيىن ۇيلەرىنە كىرگىزىپ وتىرعان ەر ءۇشىن وسىندايدا قالاي ماقتانباسسىڭ, اعايىن! 160 412. بۇل سان – ەل گازەتى ءوزىنىڭ توقسان جىلدىق تويىنىڭ تۇسىندا باعىندىرعان بيىك. بۇل سان – قازىرگى كەزەڭدەگى قازاق رۋحى باعىندىرعان بيىكتىڭ ءبىر ولشەمى. بۇل ساننىڭ استارىندا حالقىمىزدىڭ ەلدىك ساناسىنىڭ ورنىعا تۇسكەنى تۇر, بۇل ساننىڭ استارىندا قازاق ءتىلىنىڭ دەڭگەي-دارەجەسى, ونىڭ مەملەكەتتىك ءتىل رەتىندەگى مارتەبەسىنىڭ وسكەنى تۇر, بۇل ساننىڭ استارىندا ەل تۇرعىندارىنىڭ ءال-اۋقاتى جاقسارعانى تۇر. دەمەك, بۇل – بارشامىزدىڭ باعىندىرعان بيىگىمىز. جاقىندا عانا گازەتىمىزدىڭ توقسان جىلدىعىنا بايلانىستى قۇتتىقتاۋعا, باس باسىلىمنىڭ جاڭا عيماراتىن اشۋعا كەلگەندە پرەزيدەنت نۇرسۇلتان نازارباەۆ “ارنا مەديا” ۇلتتىق اقپاراتتىق حولدينگىنە قاراستى باق باسشىلارىنا سۇحبات بەرگەنى بەلگىلى. سوندا ەلباسى “ەگەمەن قازاقستاننىڭ” تارالىمىنا ارنايى توقتالىپ, “38 مىڭنان 150 مىڭعا دەيىن ءوسۋ گازەتتىڭ قازىرگى دەڭگەيىن بىلدىرەتىن كورسەتكىشتەردىڭ ءبىرى عوي. مىنە, مۇنىڭ ءوزى-اق ۇلكەن باعا. ياعني, گازەت قاجەت, وقىلادى, قىزعىلىقتى دەگەن ءسوز. سىزدەردىڭ جۇمىستارىڭىزعا بەرىلگەن ەڭ ءادىل, ەڭ ءدال باعا وسى” دەگەن بولاتىن. سول باعانى بىزگە ءسىز بەرىپ وتىرسىز, ارداقتى وقىرمان! وسى تاڭداۋىڭىز ارقىلى ءسىز ءوزىڭىزدىڭ تۋعان مەملەكەتىڭىزبەن بىرگە تىنىستايتىن, ەلىم دەيتىن, جەرىم دەيتىن, ءتىلىم دەيتىن جۇرەگىڭىزدى تانىتىپ وتىرسىز, وسى تاڭداۋىڭىز ارقىلى ءسىز ءوزىڭىزدىڭ الاش قامىن ويلاعان ازاماتتىق كەلبەتىڭىزدى تانىتىپ وتىرسىز. راحمەت سىزگە! ەلدىك دەگەن وسىندايدان قۇرالادى. ۇلتتىق رۋح وسىندايدان دا تانىلادى. جاڭا جىلدا جازار جاقسىلىعىمىز, جەتكىزەر جاڭالىعىمىز كوپ بولسىن!
ساۋىتبەك ابدراحمانوۆ.
