باسقوسۋدا مەملەكەتتىك قىزمەت سالاسىنداعى استانا وڭىرلىك حابى باسقارۋشى كوميتەتىنىڭ توراعاسى ءاليحان بايمەنوۆ بۇگىنگى تاڭدا وڭىرلىك حابتى جاھاندىق الاڭ دەۋگە بولاتىنىن جەتكىزدى.
– جاھاندانۋ مەن اقپاراتتىق-كوممۋنيكاتسيالىق تەحنولوگيالار مەملەكەتتىك قىزمەتتى دامىتۋدا جاڭا سىناقتاردى العا قويىپ وتىر. تۇپتەپ كەلگەندە, مەملەكەتتىك ورگاندار باسەكەلەستىك ورتادا جۇمىس ىستەي باستادى. وسىنداي جاعدايدا شەت مەملەكەتتەرمەن اراداعى ارىپتەستىك بايلانىس – ۋاقىت تالاپتارىنا لايىقتى جاۋاپ ىزدەۋگە ماڭىزدى قۇرال بولادى. بۇل ءبىزدىڭ ۇيىم رەتىندە ءوسىپ-وركەندەپ كەلە جاتقانىمىزدىڭ كورىنىسى. شەت مەملەكەتتەردىڭ ءتيىستى ۇيىمدارىمەن سەرىكتەستىگىمىز تەرەڭدەپ كەلەدى. حابتى وڭىرلىك دەپ اتاساق تا, ءىس جۇزىندە ول وڭىرلىك اۋقىمنان شىعىپ, جاھاندىق الاڭعا اينالدى, – دەدى ول.
بىرىككەن ۇلتتار ۇيىمى الداعى ۋاقىتتا قازاقستاننىڭ مەملەكەتتىك قىزمەت سالاسىنداعى تاجىريبەسىن باسقا ەلدەرگە ۇسىنۋعا نيەتتى. بۇل تۋرالى بۇۇ باس حاتشىسىنىڭ وڭتۇستىك-وڭتۇستىك ىنتىماقتاستىعى جونىندەگى وكىلى حورحە چەديەك ايتتى. استانا وڭىرلىك حابى باسقارۋشى كوميتەتىنىڭ توراعاسىمەن اراداعى ىنتىماقتاستىق تۋرالى حات الماسۋ راسىمىنەن كەيىنگى سوزىندە حورحە چەديەك:
– بۇۇ وڭتۇستىك-وڭتۇستىك ىنتىماقتاستىعى جونىندەگى باسقارماسى قازاقستاننىڭ جيناعان تاجىريبەسىن باسقا وڭىرلەرگە تاراتۋعا نيەتتى. بۇگىنگى تاڭدا دۇنيە جۇزىندە مەملەكەتتىك قىزمەت پەن مەملەكەتتىك باسقارۋدىڭ ءرولى ۇزدىكسىز ءوسىپ كەلەدى. سەبەبى, جاڭا جاھاندىق, ايماقتىق ماسەلەلەردىڭ شەشىمى مەملەكەتتىك قىزمەتپەن جانە مەملەكەتتىك باسقارۋدىڭ ساپاسىمەن تىكەلەي بايلانىستى, – دەدى.
كونفەرەنتسيا بارىسىندا ءسوز العان سىرتقى ىستەر ءمينيسترىنىڭ ورىنباسارى ەرجان اشىقباەۆ وڭىرلىك حابتى قازاقستان مەن بۇۇ اراسىنداعى جەمىستى ءارى تابىستى ىنتىماقتاستىقتىڭ ايقىن مىسالدارىنىڭ ءبىرى دەپ باعالادى. ونىڭ ايتۋىنشا, حاب حالىقتىڭ سۇرانىسىنا جاۋاپ بەرەتىن ءتيىمدى مەملەكەتتىك تەتىكتىڭ ماڭىزدى بولشەگى بولىپ تابىلادى. ول «100 ناقتى قادام» ۇلت جوسپارىندا ايتىلعان كاسىبي مەملەكەتتىك قىزمەتتى قالىپتاستىرۋعا دا يگى ىقپالىن تيگىزەدى.
مەملەكەتتىك قىزمەت سالاسىنداعى استانا وڭىرلىك حابى 2013 جىلى ەل ۇكىمەتىنىڭ باستاماسىمەن جانە بۇۇ دامۋ باعدارلاماسىنا وراي قۇرىلعان بولاتىن.
ارنۇر اسقار,
«ەگەمەن قازاقستان»
