سونداي-اق, ەلباسى ءوز ماقالاسىندا: «ەكىنشى, باسقا ايماقتارعا كوشىپ كەتسە دە تۋعان جەرلەرىن ۇمىتپاي, وعان قامقورلىق جاساعىسى كەلگەن كاسىپكەرلەردى, شەنەۋنىكتەردى, زيالى قاۋىم وكىلدەرى مەن جاستاردى ۇيىمداستىرىپ, قولداۋ كەرەك. بۇل - قالىپتى جانە شىنايى پاتريوتتىق سەزىم, ول اركىمدە بولۋى مۇمكىن. وعان تىيىم سالماي, كەرىسىنشە, ىنتالاندىرۋ كەرەك» دەپ ايتا كەتتى.
وسىعان وراي, فيلانتروپ ورالبەك بوتباي 50 جىلدىق مەرەيتويىنا وراي, «50 جىلدىققا 50 يگى ءىس» اكتسياسىن باستاپ, 2017 جىلى ەلىمىزدە وتەتىن ەكسپو 2017 كورمەسىنە قولداۋ كورسەتۋ ماقساتىندا, مەكتەپتە ۇزدىك وقىعان بايدىبەك اۋدانىنىڭ 30 وقۋشىسىنا ءوز قارجىسىنان تەگىن بيلەت تاراتىپ وتىر. شالعايدان كەلەتىن وقۋشىلاردىڭ جول-شىعىنى مەن جاتىن ورنىن كاسىپكەر ءوز موينىنا الىپ, حالىقارالىق كورمە جۇمىسىنا ۇلەس قوسپاق.
ول ودان بولەك, جەكە قاراجاتىنا ەلىمىزدىڭ جوو-دا گۋمانيتارلىق جانە تەحنيكالىق سالادا ۇزدىك كورسەتكىشتەرگە قول جەتكىزگەن ستۋدەنتتەرگە شاكىرتاقى تاعايىندادى. 2016-2017 وقۋ جىلدارىندا قوعامدىق جانە اكادەميالىق ورتادا ۇزدىك ناتيجە كورسەتكەن باكالاۆرياتتىڭ 10 ستۋدەنتىنە جاڭا وقۋ جىلىنان باستاپ, 6 اي بويىنا قارجىلاي كومەك كورسەتىلەدى. مۇنداي شاكىرتاقىلار جىل سايىن تۇراقتى تۇردە ۇيىمداستىرىلادى. تولىق اقپاراتتى www.oralbek.kz سايتىنان بىلۋگە بولادى. سونداي-اق, «تۇران» كوللەدجىنىڭ الەۋمەتتتىك جاعدايى تومەن 5 تالاپكەرىنە جاڭا وقۋ جىلىنان باستاپ, تولىق وقۋ گرانتىن بەرمەك.
