ەلوردالىق جولاۋشىلار كولىگى باسقارماسىنىڭ مالىمەتتەرىنە سايكەس, استانادا زاڭسىز تاسىمالداۋشىلاردىڭ كولىك قۇرالدارىنىڭ تەحنيكالىق جاعدايى ناشار, باسىم بولىگى توقسانىنشى جىلداردان بەرى پايدالانىلىپ كەلەدى.
تەكسەرۋ جۇرگىزۋ بارىسىندا تاسىمالداۋشىلاردا كولىك قۇرالىنا تەحنيكالىق بايقاۋ مەن ازاماتتىق-قۇقىقتىق جاۋاپكەرشىلىكتى مىندەتتى ساقتاندىرۋ بولماي شىقتى, سونداي-اق, قاجەت رۇقسات قۇجاتتار مەن كەلىسۋلەر دە تابىلمادى. قولدانىستاعى زاڭنامانىڭ تالاپتارىنا سايكەس, ءار جۇرگىزۋشى مىندەتتى تۇردە رەيس الدىندا مەديتسينالىق تەكسەرۋدەن وتۋگە ءتيىس, بۇل دا كولىك قاۋىپسىزدىگىن قامتاماسىز ەتۋدىڭ باستى شارالارىنىڭ ءبىرى بولىپ تابىلادى.
قر ينۆەستيتسيالار جانە دامۋ ءمينيسترىنىڭ 2015 جىلعى 26 ناۋرىزداعى №349 بۇيرىعىمەن بەكىتىلگەن اۆتوكولىك كولىگىمەن جولاۋشىلار مەن جۇكتەردى تاسىمالداۋ ەرەجەلەرىنە سايكەس, اۆتوكولىكپەن جولاۋشىلار مەن جۇكتەردى تاسىمالداۋعا استانا قالاسىنىڭ جولاۋشىلار كولىگى باسقارماسىمەن رەسمي كەلىسىمدەرگە وتىرعان جەكە كاسىپكەرلەر مەن زاڭدى تۇلعالار جىبەرىلەدى.
ال زاڭسىز تاسىمالداۋشى اتالعان زاڭنامانىڭ نورمالارىن بۇزادى, استانا قالاسىنىڭ اكىمدىگىمەن كەلىسىمسىز جۇمىس ىستەيدى, سالىق زاڭناماسىنىڭ تالاپتارىنا سايكەس سالىق تولەمەيدى, جولاۋشىلار اعىنى كوپ باعىتتاردى تاڭدايدى.
وسى ورايدا استانا قالاسىنىڭ جولاۋشىلار كولىگى باسقارماسى ەلوردا تۇرعىندارى مەن قوناقتارىن قالاارالىق جولاۋشىلار تاسىمالىمەن اينالىساتىن زاڭسىز تاسىمالداۋشى جۇرگىزۋشىلەردىڭ قىزمەتىن پايدالانۋ قاۋىپتى ەكەنىن ەسكەرتەدى. سونداي-اق, تاۋەكەلدەر مەن اۋىر سالداردى بولدىرماۋ ءۇشىن ازاماتتارعا جۇيەلى تاسىمالداۋشىلاردىڭ قىزمەتىن پايدالانىپ, بيلەت ساتىپ الۋ ارقىلى «ساپارجاي» اۆتوۆوكزالى ارقىلى ساپارعا شىعۋعا كەڭەس بەرەدى.
