كەلىسىمگە قازاقستان تاراپىنان قازاقستان رەسپۋبليكاسىنىڭ قارجى ءمينيسترى باقىت سۇلتانوۆ, يرلانديا تاراپىنان يرلانديانىڭ قازاقستاندا توتەنشە جانە وكىلەتتى ەلشىسى قىزمەتىن قوسا اتقارۋشى ەدريان ماكدەيد قول قويدى.
تاراپتار ساۋدا-ەكونوميكالىق سالادا ءوزارا ءتيىمدى ارەكەتتەسۋگە ناقتى مۇمكىندىكتەردىڭ بار ەكەنىن جانە اتالعان كونۆەنتسياعا قول قويۋ ىسكەرلىك سەرىكتەستىككە ەلەۋلى سەرپىن بەرەتىنىن اتاپ ءوتتى.
ساپار اياسىندا ەلشى ە.ماكدەيد سونداي-اق قر سىرتقى ىستەر ءمينيسترىنىڭ ورىنباسارى رومان ۆاسيلەنكومەن كەزدەسۋ وتكىزدى. سۇحباتتاسۋشىلار اعىمداعى جىل قازاقستان-يرلانديالىق بايلانىستارىنىڭ مەرەيلى جىلى بولىپ تابىلاتىنىن تىلگە تيەك ەتتى. ۇستىمىزدەگى جىلعى ساۋىردە ەكى ەل اراسىندا ديپلوماتيالىق قارىم-قاتىناستاردىڭ ورناعانىنا 25 جىل تولۋىنا وراي, ەكى ەل سىرتقى ىستەر ءمينيسترى قايرات ءابدىراحمانوۆ پەن چارلز فلاناگان قۇتتىقتاۋ حاتتارمەن الماستى.
ءوز حاتىندا چ.فلاناگان يرلانديا قازاقستاندى بۇۇ قاۋىپسىزدىك كەڭەسى شەڭبەرىندە تۇراقتى قولداپ وتىراتىنىن قۇپتاپ, دۋبلين قازاقستاننىڭ يادرولىق قارۋسىزداندىرۋ مەن تاراتپاۋ, ازىق-ت ۇلىك, سۋ جانە ەنەرگەتيكالىق قاۋىپسىزدىك ماسەلەلەرى بويىنشا ءىس-ارەكەتتەرىن قۋاتتايتىنىن جەتكىزدى.
«مۇنداي ارەكەتتەر يرلانديانىڭ بۇۇ-داعى باسىمدىلىقتارىمەن ۇندەسەدى», - دەگەندى اتاپ ءوتتى چ.فلاناگان.
سۇحباتتاسۋشىلار 2017 جىلى ەكى ەل ءوزارا ءتيىمدى جانە جەمىستى دامۋ باعدارىن جەتىلدىرۋدى جالعاستىراتىنىنا سەنىم ارتتى.
ر.ۆاسيلەنكو يرلاندىق ەلشىنى ماڭىزدى كەلىسىمگە قول قويۋمەن جانە ديپلوماتيالىق قارىم-قاتىناستاردىڭ مەرەيتويىمەن قۇتتىقتاي كەلە, استانا يرلانديامەن دوستىق بايلانىستاردى ودان ءارى كەڭەيتۋگە مۇددەلى ەكەنىن جەتكىزدى.
