وڭتۇستىك قازاقستان وبلىسى اكىمى ءباسپاسوز قىزمەتىنىڭ ۇيىمداستىرۋىمەن وتكەن اقپاراتتىق تۋرى بارىسىندا باق وكىلدەرى اتامەكەن اۋىلدىق وكرۋگىنىڭ ديقاندارى ەككەن كوكتەمگى قىرىققابات داقىلىن جيناۋ ماۋسىمىنىڭ كۋاسى بولدى. اۋداندا بيىل ەرتە ەگىلگەن كوكونىس داقىلدارىنىڭ جالپى كولەمى 996 گەكتاردى قۇراسا, ونىڭ 780 گەكتارىندا قىرىققابات جايقالىپ تۇر.
نەگىزىنەن ديقاندار سالماعى 1-1,5 كەلىدەن اسپايتىن نيدەرلاندىق پانديون سۇرپىن ەگىپتى. بۇل ءونىم تۇرىنە ەۋروپالىقتار مەن رەسەيلىكتەر تاراپىنان سۇرانىس كوپ. قىرىققاباتتىڭ ءبىر كەلىسى العاشقىدا 230 تەڭگەدەن بوساتىلسا, قازىر 130 تەڭگەدەن ساتىلىپ جاتىر.
«بيىل قىرىققابات داقىلىن اقپاننىڭ 8-ءشى جۇلدىزىنان باستاپ ەگە باستادىق. ەكىقاباتتى كلەنكامەن كومكەرىلىپ ەگىلەتىن داقىل 2 ايدىڭ كولەمىندە ءپىسىپ, جەتىلەدى. ەڭ باستىسى - كۇتىپ, قاراۋعا ءمان بەرىلۋى كەرەك. جەرىمىز تىڭ بولعاندىقتان بۇگىننىڭ وزىندە ءار گەكتاردان 25-30 تونناعا دەيىن ءونىم الىپ وتىرمىز», - دەيدى «سەرپىن» شارۋا قوجالىعىنىڭ توراعاسى سىرىم باتمانوۆ.
جالپى بيىل اۋداندا 17 مىڭ گەكتار جەرگە ءتۇرلى داقىلدار ەگىلىپتى. ونىڭ ىشىندە 136 گەكتار بيداي, 2500 گەكتار ماقتا, 44 گەكتار كۇنباعىس, 29,5 گەكتار سۇرلەمدىك جۇگەرى, 553 گەكتار داندىك جۇگەرى, 19 گەكتار كارتوپ, 1025 گەكتار جوڭىشقا, 11714 گەكتار قاۋىن-قاربىز, 62 گەكتار باۋ-باق جانە ءجۇزىم.
ايتا كەتەيىك, ماقتارالدىق شارۋالار ەگىستىك ەگۋدى ءالى دە جالعاستىرىپ جاتىر. ءالى الدا 13 884 گەكتارعا بۇرشاقتى داقىلدار, 80 مىڭنان استام گەكتارعا تەحنيكالىق داقىلدار, 34 مىڭ گەكتارعا كوكونiس پەن باقشا داقىلدارىن ەگۋدi جوسپارلاپ وتىر.
