كورەيا رەسپۋبليكاسىنىڭ دەنساۋلىق ساقتاۋ جانە الەۋمەتتىك قامسىزداندىرۋ مينيسترلىگىنە قاراستى KHIDI ۇكىمەتىنىڭ (كورەيا رەسپۋبليكاسى دەنساۋلىق ساقتاۋ يندۋسترياسىن دامىتۋ ينستيتۋتى) وكىلدەرىمەن بولعان باسقوسۋعا اتالعان ەلدەگى الدىڭعى قاتارلى ءتورت كلينيكانىڭ ماماندارىن KHIDI حالىقارالىق دەنساۋلىق ساقتاۋ دەپارتامەنىتىنىڭ ديرەكتورى و دجونگ حي باستاپ كەلدى.
ەكىجاقتى اڭگىمەدە ءوڭىر باسشىسى مارتەبەلى مەيماندارعا ايماعىمىزعا جاساعان ارنايى جۇمىس ساپارى ءۇشىن العىس ءبىلدىرىپ, الداعى ۋاقىتتا وڭتۇستىك كورەيا رەسپۋبليكاسىنىڭ دارىگەرلەرى مەن وڭتۇستىك قازاقستان وبلىسىنداعى اتالعان سالا جەتەكشىلەرى تاجىريبە الماسۋ ماقساتىندا تىعىز قارىم-قاتىناستا ىنتىماقتاستىق ورناتاتىنىنا سەنىم ءبىلدىردى.
«وڭتۇستىك قازاقستان وبلىسى ۇلى جىبەك جولىنىڭ بويى – توعىز جولدىڭ تورابىندا ورنالاسقان ءوڭىر. ايماعىمىز ازيا مەن ەۋروپانىڭ قاق ورتاسىنداعى مەكەن دەۋگە دە كەلەدى. تابيعاتى قولايلى, كليماتى تاماشا وبلىستا ەلىمىز بويىنشا حالىقتىڭ تىعىز ورنالاسقانىن دا ايتا كەتۋ كەرەك. مۇنان بولەك, رەسپۋبليكانىڭ كۇنگەيىنەن ورىن العان جەرمەن وتاندىق جانە شەتەلدىك ازاماتتاردىڭ ءجيى كەلىم-كەتىمى ورىن الاتىنىن ەسكەرسەك, ءبىزدىڭ وبلىستان وڭتۇستىك كورەيامەن بىرلەسكەن مەديتسينا سالاسىنا باعىتتالعان جوعارى وقۋ ورنىن سالۋعا بولادى دەپ ەسەپتەيمىن. سونىمەن بىرگە, وڭىردە قايتا وقىتىپ, ءبىلىمىن جەتىلدىرۋگە بولاتىن مەديتسينا سالاسىنىنىڭ ماماندارى كوپ», - دەدى اكىم.
ءوز كەزەگىندە ءسوز العان KHIDI حالىقارالىق دەنساۋلىق ساقتاۋ دەپارتامەنىتىنىڭ ديرەكتورى و دجونگ حي وڭتۇستىكتەگى مەديتسينالىق قىزمەت ساپاسىن ارتتىرۋ ءۇشىن ەكى باعىتتا جۇمىس ىستەلۋ قاجەتتىگىن ايتتى. ونىڭ ءبىرىنشىسى - وڭىردەگى مەديتسيناعا زاماناۋي تەحنولوگيالار مەن مەدقۇرىلعىلاردى ەندىرۋ بولسا, ەكىنشىسى - دارىگەرلەردى بىلىكتىلىكتى ارتتىرۋ كۋرستارىندا وقىتۋ. وقىتۋ جۇمىستارىنىڭ ءدال قازىرگى تاڭدا ساۋد ارابياسىنداعى دارىگەرلەرمەن جۇرگىزىلىپ جاتقانىن جەتكىزگەن و دجونگ حي مىرزا مۇنداي بايلانىستاردىڭ كۋۆەيت مەملەكەتىمەن دە ۇيىمداستىرىلىپ جاتقانىن مالىمدەدى.
جيىن قورىتىندىسى بويىنشا تاراپتار بىرلەسكەن جۇمىستاردى دامىتۋ شەڭبەرىندە ءوزارا ۋاعدالاسىپ, وڭتۇستىك كورەيانىڭ 4 كلينيكاسىمەن ىنتىماقتاستىقتى ارتتىرۋ ماقساتىندا وڭتۇستىك قازاقستان وبلىسىنىڭ دەنساۋلىق ساقتاۋ باسقارماسى مەن كورەيا رەسپۋبليكاسى دەنساۋلىق ساقتاۋ يندۋسترياسىن دامىتۋ ينستيتۋتى (KHIDI) اراسىندا تۇزىلگەن ىنتىماقتاستىق مەموراندۋمىنا قول قويىلدى.
