«بيىلعى اسسامبلەيانىڭ سەسسياسى ەرەكشە مەزگىلدە وتكەلى وتىر. ەلىمىزدىڭ ءۇشىنشى مۇشەلگە اياق باسۋمەن بىرگە بۇل اسا كۇردەلى كەزەڭ. قازىرگى الەمدەگى احۋال ەل تىنىشتىعى تۇراقتى دامۋدىڭ ەڭ ماڭىزدى شارتى ەكەندىگىنە كوزىمىزدى تاعى دا جەتكىزىپ وتىر. قيىن كەزەڭدە بىرلىگىمىزدىڭ ۇيىتقىسى, باستاۋى رەتىندە قۇرىلعان اسسامبلەيامىز وزىنە جۇكتەلگەن قاستەرلى ميسسيانى وتە ۇلكەن دارەجەدە ورىنداپ كەلە جاتىر. بۇگىنگى اسسامبلەيا تاريحى - تۇراقتىلىقتىڭ, تاتۋلىقتىڭ, بەيبىتشىلىك پەن كەلىسىمنىڭ شەجىرەسى. بىرلىكتىڭ كيەلى بەسىگى, ەلدى ورتاق ماقساتقا جۇمىلدىراتىن بىرەگەي تەتىگى», - دەدى ەلباسى.
مەملەكەت باسشىسىنىڭ ايتۋىنشا, الدىمىزعا قويىپ وتىرعان ەڭ باستى ماقسات - وركەندەپ ءوسىپ, 2050 جىلى ەڭ جوعارى دارەجەدەگى 30 ەلدىڭ قاتارىنا قوسىلۋ.
«ءبىز الەمدىك احۋال قانداي بولسا دا العا قاراي ۇمتىلۋىمىز كەرەك. كورىپ وتىرسىزدار, قانشا داعدارىستان ءوتىپ كەلەمىز. ەشقايسىسىندا ءبىز سۇرىنگەنىمىز جوق, ەكونوميكامىزدى تومەن تۇسىرمەدىك. بيىل ەلىمىز كەشەندى جاڭعىرۋعا كىرىستى. وشاقتىڭ ءۇش اياعىنداي بولاتىن ەكونوميكالىق, ساياسي جانە رۋحاني باعىتتىڭ قاي قايسىسى دا ايرىقشا ماڭىزدى. قازاقستاننىڭ ءۇشىنشى جاڭعىرۋى دەگەن ەكونوميكالىق تۇلەۋدىڭ باسىن مەن ءوزىم جولداۋىمدا ايتتىم. مەملەكەتتى باسقارۋدى جەتىلدىرە تۇسكەن كونستيتۋتسيالىق رەفورمالار - ساياسي جاڭعىرۋدىڭ نەگىزى. ال «بولاشاققا باعدار: رۋحاني جاڭعىرۋ» اتتى ماقالاعا وزەك بولعان جوبالار رۋحاني كەمەلدەنۋدىڭ باستاۋى», - دەدى ەلباسى.
فوتو: ەرلان وماروۆ «ەگەمەن قازاقستان»
