ونىڭ باستاماسى وزگە كاسىپكەرلەر تاراپىنان قولداۋ تاپتى. ارداگەرلەر كەڭەسى, «قىزىل جارتى اي» قوعامى دا قولۇشىن بەرۋگە ءازىر. ءسويتىپ, بۇگىندە سۋ تاسقىنىنان وتە-ءموتە قيىندىق كورگەن وتباسىلارىنا قايىرىمدىلىق جاساۋ ماقساتىمەن ارنايى ەسەپشوتتار مەن پۋنكتتەر اشىلا باستادى. جينالعان قاراجات پەن قۇرىلىس زاتتارى, تۇرمىستىق بۇيىمدار رۋزاەۆ اۋىلدىق وكرۋگىنىڭ تۇرعىندارىنا تابىس ەتىلەدى. نوۆويشيم اۋىلىنداعى «باليتسكي» جك قۇرىلىس الاڭىندا ماتەريالدىق كومەكتەردى ساقتاۋعا ءجانە ۇلەستىرۋگە ارنالعان ەكى پۋنكت قۇرىلدى.
سۋ تاسقىنىنا دۋشار بولعان «بوگاتىرەۆ» سەرىكتەستىگىنىڭ جەتەكشىسى اليحان باراحاەۆتىڭ كۇپتى كوڭىلى ورنىنا ءتۇسىپ, ۇرەي ۋايىمنان ارىلعان سىڭايلى. جەرگىلىكتى بيلىك ورىندارى كەلگەن زالالدى وتەپ, كوكتەمگى ەگىس ناۋقانىن تالاپقا ساي ءوتكىزۋىنە ۋادە بەرگەن. سول سيياقتى ماكسيم رۋدەنكو, سەرگەي سينەلنيك سەكىلدى تۇرعىندار دا وتەماقىدان ءۇمىتتى.
توتەنشە جاعدايلار جونىندەگى دەپارتامەنت ماماندارىنىڭ ءسوزدەرىنە قاراعاندا, تاياۋ كۇندەردىڭ ىشىندە ەسىل وزەنى ارناسىنان اسادى دەپ كۇتىلۋدە. پەتروپاۆل سۋ تورابىنىڭ جەتەكشىسى قايرات مۇحاماديەۆ سۋ دەڭگەيى ءبىر قالىپتا ۇستالىپ تۇرعانىن, تاسقىنعا قارسى قۇرىلعان كوميسسيا شۇعىل اتقاراتىن شارالاردى ناقتىلاعانىن جەتكىزدى.
ايماق باسشىسى قۇمار اقساقالوۆ جاعدايدى تىكەلەي ءوز باقىلاۋىنا الىپ, كومەك شارالارىن, شىعىندى ەسەپتەۋ جۇمىستارىن جەدەل ءجۇزەگە اسىرۋعا, قاۋىپ-قاتەردىڭ الدىن الۋعا, تۋىنداي قالعان جاعدايدا بارلىق كۇشتى جۇمىلدىرۋعا ناقتى تاپسىرمالار بەردى. سەلەكتورلىق جيىندا سۋ شايعان اۋماقتار مەن قاتتى زارداپ كورگەن ادامدارعا جان-جاقتى قولداۋ جاسالاتىنىن, دۇرلىگۋگە ەشقانداي نەگىز جوقتىعىن قاداپ ايتتى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
