مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ورىنباسارى اليك شپەكباەۆ نەگىزگى بايانداما جاسادى. اتقارىلعان ىستەر جايىندا ايتا كەلىپ, ول نورماتيۆتىك-قۇقىقتىق اكتىلەردىڭ جوبالارىن مىندەتتى تۇردە سىبايلاس جەمقورلىققا قارسى ساراپتاما جاساۋ جانە ايقىندالعان سىبايلاس جەمقورلىق قاۋىپتەرى جونىندەگى ۇسىنىستاردى مىندەتتى تۇردە ورىنداۋ ينستيتۋتىن قالپىنا كەلتىرۋدى ۇسىندى. ودان باسقا, اگەنتتىك ەتيكالىق تۇرعىداعى تارتىپسىزدىكتەردىڭ جەكەلەگەن قۇرامىن مەملەكەتتىك قىزمەتتىڭ بەدەلىن ءتۇسىرۋ ارەكەتتەرىنىڭ قاتارىنا جاتقىزۋدى ۇسىنىپ وتىر.
داريعا نازارباەۆا سىبايلاس جەمقورلىقپەن كۇرەس «ەلەستەرمەن كۇرەسكە» اينالىپ كەتپەۋىنە نازار اۋداردى. «ادامدى جازالاۋ ءۇشىن شەشىم قابىلداۋدا ادەپسىزدىكتى قالاي ولشەۋگە بولادى؟ وندا ادام تاعدىرى, ونىڭ وتباسىنىڭ تاعدىرى شەشىلەدى. بۇل جەردە وتە مۇقيات بولۋ كەرەك», − دەدى ول. سەناتور, سونىمەن, بىرگە سىبايلاس جەمقورلىق جونىندە ءتارتىپ بۇزۋشىلىقتار تۋرالى حابارلاعان ازاماتتارعا جان-جاقتى قولداۋ كورسەتۋدى ۇسىندى. «ولاردى قورعاۋدى جانە لايىقتى ماراپاتتاۋدى قامتاماسىز ەتۋ قاجەت», دەپ سانايدى سەناتور.
سەناتورلار نۇرتاي ابىقاەۆ, سەرىك جاقسىبەكوۆ, لياززات قيىنوۆ, راشيت احمەتوۆ, سەرىك اقىلباي, سارسەنباي ەڭسەگەنوۆ ءوز ۇسىنىستارى مەن ەسكەرتپەلەرىن ايتتى. دەپۋتاتتار پارلامەنت جانىنان عىلىمي-زەرتتەۋ ينستيتۋتىن قۇرۋدى, مەملەكەتتىك قىزمەتشىلەردى تاڭداۋ بارىسىنا جان-جاقتى نازار اۋدارۋدى, مەملەكەتتىك قىزمەتشىلەرگە لايىقتى ەڭبەكاقى تولەۋ ءمۇمكىندىگىن قاراستىرۋدى, قوعامدىق كەڭەستەر جۇمىستارىن جەتىلدىرۋدى ۇسىندى.
دوڭگەلەك ۇستەل سوڭىندا د.نازارباەۆا: «بەس ينستيتۋتتىق رەفورمانى ىسكە اسىرۋ جونىندەگى «100 ناقتى قادام» ۇلت جوسپارىندا بارلىق ماڭىزدى ءماسەلەلەر قاراستىرىلعان بولاتىن. پارلامەنت قاجەت زاڭداردى قابىلدادى, بىراق ولار جۇمىس ىستەمەي وتىر, ويتكەنى, بيۋروكراتيا وعان نازار اۋدارمادى», − دەدى.
