ەلوردانىڭ جاڭا ۆوكزال كەشەنى 54 پويىزعا قىزمەت كورسەتەدى. ونىڭ 22-ءسى – «تۇلپار-تالگو» جۇردەك پويىزى, 16-سى – ستاندارتتى جانە تاعى 16-سى – قالاارالىق پويىزدار.
«ەكسپو-2017 حالىقارالىق كورمەسى قارساڭىندا استانادان مىنا باعىتتار بويىنشا قوسىمشا پويىزدار قاتىنايتىن بولادى: «استانا-ماڭعىشلاق», «استانا-اتىراۋ», «استانا-شىمكەنت», «استانا-قوستاناي», «ماڭعىشلاق-استانا», «تاراز-استانا», «ورال-استانا», «قاراعاندى-استانا».
«قازىرگى ۋاقىتتا استانا قالاسىنىڭ اكىمدىگىمەن بىرلەسىپ جاڭا ۆوكزالعا دەيىن قوعامدىق كولىكتەردى, سونىمەن بىرگە جۇردەك باعدارلاردى ۇيىمداستىرۋ ماسەلەسى قاراستىرىلۋ ۇستىندە».
ايتا كەتەرلىگى, ەكسپو-2017 حالىقارالىق مامانداندىرىلعان كورمەسى 10 ماۋسىمدا باستالىپ, 10 قىركۇيەكتە اياقتالاتىن بولادى. كورمەگە 2 ميلليوننان استام ادام كەلەدى دەپ كۇتىلۋدە. ولار كورمەنى كەمىندە ەكى رەت ارالايدى دەپ جوسپارلانعان. جالپى كورمەنى تاماشالاۋشىلاردىڭ 85 پايىزىن قازاقستان ازاماتتارى, ال قالعان 15 پايىزىن شەتەلدىكتەر قۇرايدى. شەتەلدىك قوناقتاردىڭ باسىم بولىگى تمد ەلدەرى مەن قىتايدان كەلەتىنى كۇتىلۋدە. قازىرگى ۋاقىتتا 112 مەملەكەت پەن 18 حالىقارالىق ۇيىم ەكسپو كورمەسىنە قاتىساتىندىعىن رەسمي تۇردە راستاپ وتىر.
وسى جىلدىڭ ناۋرىز ايىندا ءماجىلىستىڭ بۇرىنعى دەپۋتاتى تاڭىربەرگەن بەردىوڭعاروۆ ءوزىنىڭ بلوگىندا جاڭا تەمىرجول ۆوكزالىنىڭ قۇرىلىس بارىسى تۇسىرىلگەن ۆيدەونى جاريالاعان بولاتىن.
