سىرت الاڭدا جاۋاپسىز ءۇش دوپ سوعىپ, ايدارىنان جەل ەسكەن ەلوردالىق كلۋبتىڭ ەرلىگىن الماتىدا «قايرات» تا قايتالادى. كاحابەر تسحادادزە شاكىرتتەرى اياقدوپ الامانى باستالعالى توپ باسىنداعىلاردىڭ جۋان ورتاسىندا جۇرگەن «ورداباسى» كلۋبىن 3:0 ەسەبىمەن ويسىراتا ۇتتى. ءسويتىپ, الماتىلىق كلۋب ۇزدىك ۇشتىكتىڭ ىشىنەن ويىپ ورىن الدى.
بۇل تۋرعا دەيىن توپ باستاپ كەلە جاتقان «ەرتىس» ءوز الاڭىندا «قايسارمەن» ۇپاي بولىسۋگە ءماجبۇر بولدى. پاۆلودارلىقتار ماتچتىڭ 83-ءشى مينۋتىندا ەسەپ اشقانىمەن, ويىننىڭ سوڭىنا دەيىن تاباندىلىق تانىتا المادى. جەڭىستىڭ جالىنان ۇستاتپاعانى ءوز الدىنا, كوش تىزگىنى دە ۋىستان سۋسىپ كەتتى. ال, بىرىنشىلىكتە بىرازعا دەيىن توپ باستاعان «دالا قاسقىرلارى» بولسا, سىرعىپ-سىرعىپ, تۋرنير كەستەسىنىڭ بەلورتاسىنا ءتۇستى...
تۋرنير كەستەسىندەگى كورشىلەر «تاراز» بەن «اقجايىق» بۇل جولى بەت جىرتىسپاي, 0:0 ەسەبىمەن تەڭ تارقاستى.
كوش سوڭىنداعى «شاحتەردىڭ» شيرايتىن ءتۇرى كورىنبەيدى. كەنشىلەر بۇل جولى «توبىلدى» قابىلداپ, تاعى دا تەڭ ءتۇستى. ەسەپ – 1:1. قازىر چەمپيوناتتا جەڭىسكە جەتپەگەن ەكى كوماندا بولسا, سونىڭ ءبىرى وسى – «شاحتەر». ونىڭ ۇستىنە, قاراعاندىلىقتار ءوز قاقپاسىنا گولدى ەڭ كوپ جىبەرگەن كوڭىلشەك كلۋب. كوماندا ءار ويىنعا شاققاندا ورتاشا ەسەپپەن ەكى دوپتان جىبەرىپ وتىر.
جەتىنشى تۋردا «اقتوبە» مەن «اتىراۋ» اراسىنداعى ويىن كەيىنگە شەگەرىلدى. سەبەپ – اقتوبەدەگى ستاديون مەن قوسالقى الاڭ ويىن وتكىزۋگە ازىرشە دايىن ەمەس ەكەن.
جەتىنشى تۋردا وينالعان ماتچتاردىڭ ناتيجەسى مىناداي بولىپ اياقتالدى:
«شاحتەر» – «توبىل» – 1:1 (0:1), سكورىح, 45+2 – ءوزىنىڭ قاقپاسىنا (0:1). تاجىمبەتوۆ, 48 (1:1). «وقجەتپەس» – «استانا» – 0:3 (0:0), مۋجيكوۆ, 61 (0:1). گراحوۆاتس, 64 – پەنالتيدەن (0:2). مۇرتازاەۆ, 79 (0:3). «قايسار» – «ەرتىس» – 1:1 (0:0), رودريگو, 83 (0:1). نتيبازونكيزا, 86 (1:1). «تاراز» – «اقجايىق» – 0:0 (0:0). «قايرات» – «ورداباسى» – 3:0 (2:0), يسلامحان, 6 (1:0). گوۋ, 43 (2:0). يليچەۆيچ, 70 (3:0). «اكتوبە» – «اتىراۋ», ويىن كەيىنگە شەگەرىلدى.
سۇرمەرگەندەر اراسىنداعى سىندا جەرار گوۋ («قايرات») جەتى گولمەن الدا كەلەدى. ەكىنشى ورىنداعى الەكسەي ششەتكيننىڭ («توبىل») ەنشىسىندە ءتورت گول بار.
23 ءساۋىر كۇنى وتەتىن 8-ءشى تۋردا كوماندالار بىلايشا جۇپ قۇراپ, ءوزارا كۇش سىناسادى:
«ورداباسى» – «توبىل», «ەرتىس» – «قايرات», «اكجايىق» – «قايسار», «استانا» – «تاراز», «اتىراۋ» – «وقجەتپەس», «اقتوبە» – «شاحتەر».
قايرات ءابىلدينوۆ,
«ەگەمەن قازاقستان»
