ش.ايمانوۆ اتىنداعى «قازاقفيلم» كينوستۋدياسىنىڭ «دەبيۋت» شىعارماشىلىق-وندىرىستىك بىرلەستىگى قىسقامەتراجدى كوركەم فيلمدەردىڭ ستسەناريلەرىن قاراستىرۋ ءۇشىن بايقاۋ جاريالادى. بۇل تۋرالى كينوستۋديانىڭ ءباسپاسوز قىزمەتى مالىمدەدى.
شارت بويىنشا, بايقاۋعا قازاقستان رەسپۋبليكاسىنىڭ ازاماتتارى عانا قاتىسا الادى.
«ستسەناري كولەمى 5-20 بەت بولۋى كەرەك. ءماتىن قازاق نەمەسە ورىس تىلدەرىندە قابىلدانادى. سونداي-اق كينەماتوگرافيا سالاسىندا بۇرىن جاساعان رەجيسسەرلىك جوبالارى, تاجىريبەسى بولسا قۇبا-قۇپ» دەلىنگەن ءباسپاسوز بايانىندا.
ستسەناري مازمۇنىندا كونستيتۋتسيالىق قۇرىلىمدى كۇشتەپ وزگەرتۋدى ۇگىتتەۋ نەمەسە ناسيحاتتاۋ; رەسپۋبليكانىڭ تۇتاستىعىن بۇزۋ; مەملەكەت قاۋىپسىزدىگىنە زيانكەستىك جاساۋ; الەۋمەتتىك, ناسىلدىك, ۇلتتىق, ءدىني, تەكتىك جانە رۋلىق ۇستەمدىكتى, قاتىگەزدىك پەن زورلىق-زومبىلىقتى ۇگىتتەۋ نەمەسە ناسيحاتتاۋ كورىنىستەرى, سونىمەن قاتار پورنوگرافيالىق جانە ارناۋلى سەكسۋالدىق-ەروتيكالىق سيپاتتاعى كورىنىس ساحنالار بولماۋى ءتيىس.
ستسەناريلەر 2017 جىلدىڭ 1 مامىرىنا دەيىن قابىلدانادى. «دەبيۋت» ءشوب قابىلدانعان ستسەناريلەردىڭ وندىرىسكە جىبەرىلۋىنە كەپىلدىك بەرمەيدى.
ش. ايمانوۆ اتىنداعى «قازاقفيلم» اق – كوركەم, دەرەكتى, انيماتسيالىق كينو ءوندىرىسى مەن وندىرىستەن كەيىنگى كەزەڭدە تۇرعان ونىمدەرمەن (ونىڭ ىشىندە مونتاجداۋ, دىبىستاۋ, ت.ب.) اينالىساتىن قازاقستانداعى نەگىزگى كينوكومپانيا. ش.ايمانوۆ اتىنداعى «قازاقفيلم» كينوستۋدياسىنىڭ تاريحى 1934 جىلدان باستاۋ الادى.
