كەشە اۋدانعا وبلىس اكىمىنىڭ ورىنباسارى عاۋەز نۇرمۇحامبەتوۆ بارىپ, جاعدايدىڭ بارلىعىن كوزىمەن كوردى. اسىرەسە, سۋدىڭ دەڭگەيى 1,5 مەترگە دەيىن كوتەرىلگەن كوشەۆوە, قارامىرزا اۋىلدارىندا اۋىر جاعداي ورىن الدى. بۇل اۋىلداردا سۋ كىرگەن قورادا تۇرعان ۇساق مال, بۇزاۋ, شوشقا شىعىن بولدى. زەلەنوۆ اۋىلىندا 10 ءۇيدىڭ ءوزى جانە 5 ءۇيدىڭ اۋلاسى سۋدا قالعان. ولاردان 53 ادام قاۋىپسىز جەرگە كوشىرىلدى. قارامىرزا اۋىلىندا دا 7 ءۇي سۋدا تۇر, 7 ءۇيدىڭ قورا-قوپسىسى كىشىگىرىم كولشىككە اينالدى. ون ادام باسقا جەرگە كوشىرىلدى.
اۋليەكول اۋدانىنداعى كوكتال اۋىلىندا 15 ۇيگە سۋ كىرگەن, 15 ءۇيدىڭ اۋلاسىن سۋ باسقان. 42 ادام تۋىستارىنىڭ ءۇيىنە كوشىرىلدى, 55 ءىرى قارا, 81 ۇساق مال قۇرعاققا شىعارىلدى. ەكى اۋداندا دا ءتوتەنشە جاعدايلار دەپارتامەنتىنەن قۇتقارۋشىلار, قاجەتتى تەحنيكالار جۇمىس ءىستەۋدە, سونىمەن قاتار, اۋداندىق اتقارۋ ورگاندارىنان دا ادامدار مەن تەحنيكا جەتكىلىكتى بولىنگەن. توتەنشە جاعدايعا بايلانىستى قارعىن سۋدىڭ زاردابىنان بولعان شىعىندى ەسەپتەۋ كوميسسياسى قۇرىلىپ, جۇمىس ىستەي باستادى.
– سۋدىڭ بەتى ەندى قايتتى. قازىر سۋ باسقان ەلدى مەكەندەردىڭ بارلىق شىعىنىن ەسەپتەۋ مۇمكىن ەمەس. ازىرشە سۋدا قالىپ, ءولگەن مالدىڭ شىعىنى عانا وتەلەدى. سول ءۇشىن قۇرامىندا ۆەتەرينار, باسقا دا ماماندار بار كوميسسيا ىسكە كىرىستى. ال سۋدا قالعان تۇرعىنداردىڭ باسقا شىعىنى ءسال كەيىنىرەك, سۋدان تازارتىلىپ, كەپتىرۋ جۇمىستارى سەكىلدى زارداپتاردى جويۋ جۇمىستارى اياقتالعان سوڭ انىقتالادى, – دەدى قاراسۋ اۋدانى اكىمىنىڭ ورىنباسارى ەرلان بالجاقاەۆ.
وبلىس باسشىلىعىنىڭ شەشىمىمەن سۋ تاسقىنىنان زارداپ شەككەن تۇرعىندارعا قارجىلاي كومەك كورسەتىلەتىن بولدى.
ءنازيرا جارىمبەتوۆا,
«ەگەمەن قازاقستان»
قوستاناي
