قالام يەلەرى تاراپىنان سۋ تاسقىنىنان زارداپ شەككەندەرگە بايلانىستى ساۋالدار قويىلىپ, اتقارىلىپ جاتقان شارالار كەڭىنەن اڭگىمەلەندى. ءساۋىر ايى ناعىز سىن كەزەڭىنە اينالدى. بيىل ىلعالدىڭ مول تۇسۋىنە وراي جەرگىلىكتى بيلىك سۋ تاسقىنىنىڭ الدىن الۋ جۇمىستارىنا ءبىر كىسىدەي جۇمىلىپ وتىرعانىن ايتا كەلىپ, قۇمار ىرگەباي ۇلى ع.مۇسىرەپوۆ اۋدانىندا ورىن العان وقىس وقيعا ەرەكشە باقىلاۋدا تۇرعانىن, سۋ استىندا قالعان 235 ءۇيدىڭ بارىنە قارجىلىق جاردەم كورسەتىلەتىنىن, 7 باسپانانىڭ مۇلدەم جارامسىز قالعانىن, قازىر شىعىن كولەمى ەسەپتەلىپ جاتقانىن جەتكىزدى. اپاتتى جەرلەردى قالپىنا كەلتىرۋ ءىسى اياقتالىپ, ول جاققا قوسىمشا كۇشتەر جىبەرىلگەن. جامباراق وزەنىنە تاياۋ ورنالاسقان رۋزاەۆكا اۋىلىنىڭ سۋ باسقان 186 ءۇيى دە جاردەمسىز قالمايدى. 578 تۇرعىن قاۋىپسىز جەرلەرگە كوشىرىلىپ, ىستىق تاماقپەن, جاتىن ورىنمەن تولىق قامتاماسىز ەتىلگەن.
ءبىر شارۋا قوجالىعىنىڭ قورا-قوپسىسى سۋ استىندا قالىپ, جۇزگە جۋىق ۇساق مالى شىعىن بولدى. وعان دا ماتەريالدىق كومەك بەرىلەدى. وبلىس اكىمىنىڭ ايتۋىنشا, تابيعي اپاتقا بايلانىستى ارنايى كوميسسيا قۇرىلىپ, قۇرىلىس بريگادالارى تارتىلادى. شىعىن كولەمى ناقتى ەسەپتەلگەن سوڭ, بيۋدجەتتەن قارجى قاراستىرىلادى. باسقا دا شۇعىل شەشىمدەر قابىلدانادى. قازىر قارعىن سۋ دەڭگەيىنىڭ تومەندەگەنى بايقالادى. سۋ اپاتىنىڭ سالدارى بويىنشا كەشەندى شارالار ودان ءارى جالعاسۋدا.
اقان-بۇرلىق وزەنىنە جاقىن ورنالاسقان چيستوپولە ەلدى مەكەنىندە جاعدايدىڭ كۇردەلى ەكەنى ەسكەرىلىپ, تۇرعىندار مەن مالدار قاۋىپسىز جەرلەرگە كوشىرىلگەن.
ق.اقساقالوۆتىڭ سوزىنە قاراعاندا, جاعداي ءجىتى باقىلاۋدا تۇر. قاۋىپ سەيىلگەنشە كومەك ۇزىلمەيدى. وسىنداي قاتەردىڭ بولاتىنى كۇنىبۇرىن ەسكەرىلىپ, ازىق-ت ۇلىك پەن ءدارى-دارمەكتىڭ جەتكىلىكتى قورى قامتاماسىز ەتىلگەن. قاتەرلى ايماقتاردا تەحنيكا مەن قايىقتار سانى كوبەيتىلگەن.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
