وسىنىڭ الدىندا بۇل تەاتر «دوستار سەرتىن» ساحنالاعانى بەلگىلى. «ەر توستىك» − ەلىمىزدىڭ ميۋزيكل تاريحىنداعى ەكىنشى قويىلىم. حالقىمىزدىڭ ەڭ ادەمى قيال-عاجايىپ ەرتەگىلەرىنىڭ ءبىرى كورەرمەنگە ميۋزيكل تۇرىندە ۇسىنىلدى. ەرتەگى كەيىپكەرلەرىنىڭ ەسىمى كوبىمىزدىڭ جادىمىزدا بالا كەزدەن جاتتاۋلى بولسا, ەر توستىك پەن شالقۇيرىق, كەنجەكەي مەن بەكتورى, تەمىر حان مەن مىستان, تاعىسىن تاعى بەينەلەردى ەندى ساحنادان ۇشىراستىردىق.
الەمدەگى العاشقى ميۋزيكلدەر تۇساۋى وتكەن عاسىردىڭ الپىسىنشى جىلدارى كەسىلگەن بولسا, سودان بەرى دۇنيە ءجۇزىنىڭ ەڭ تاڭداۋلى تەاترلارىندا ءجۇزدەگەن ميۋزيكلدەر قويىلدى, ءالى دە قويىلۋ ۇستىندە. ونىڭ ءىشىندە ەڭ تابىستى ميۋزيكلدەردىڭ قاتارىندا امەريكالىق اقىن توماس س.ەلليوتتىڭ شىعارماسىنا نەگىزدەلىپ جازىلعان «مىسىقتاردى» اتاۋعا بولادى. ول اقش-تا جانە ۇلىبريتانيادا بىرنەشە ميلليوننان اسا كورەرمەن جيناعان اتاقتى ميۋزيكل. جيىرما جىلعا جۋىق ۋاقىت الەمنىڭ ساحنالارىنان ءتۇسپەگەن ميۋزيكل شىنىندا دا وتە كەرەمەت. مۇنى نە ءۇشىن ايتىپ وتىرمىز دەگەنگە كەلسەك, ميۋزيكل جاساعاندا سول ەلدىڭ, مەملەكەتتىڭ تالعامى, مەنتاليتەتى ەسكەرىلەتىنىن ماماندار ايتادى.
«قازاقستان» ورتالىق كونتسەرت زالىندا وتكەن «ەر توستىكتىڭ» پرەمەراسىنا حالىق كوپ جينالدى. جاڭالىققا جانى قۇمار جۇرتشىلىقتى اكتەرلەردىڭ ءان ايتا ءجۇرىپ بيلەگەنى, بيلەي ءجۇرىپ ءبىر-ءبىرىمەن جاۋاپتاساتىنى, اراسىندا نەشە ءتۇرلى قيمىل-ارەكەت جاساعانى, ۇستەرىنە كيگەن ادەمى كوستيۋمدەرى, ءبىر ساتتە اۋىسىپ وتىراتىن كەرەمەت دەكوراتسيالار قىزىقتىرعانى ءسوزسىز. ميۋزيكل ەرتەگى جەلىسىندە ءتۇسىرىلگەنىمەن, ونى سول قالپىندا قايتالامايدى. ستسەناريست پەن قويۋشى رەجيسسەردىڭ اۆتورلىق شەشىمدەرى ءساتتى جۇزەگە اسقان. بىراق, تەحنيكالىق كەمشىلىكتەر دە جوق ەمەس ەكەنىن ايتۋ پارىز. ميكروفوننان شىعاتىن ءبىر عانا جارىقشاق داۋىستىڭ ءوزى ءاپ-ادەمى كومپوزيتسيانى بۇزىپ جىبەرۋگە تولىعىمەن جەتەتىنى ونشا ەسكەرىلمەگەن.
ميۋزيكلدە كادىمگى ادام اتا, حاۋا انا زامانىنان بەرگى ادامزاتتى تولعاندىرعان ماسەلەلەر فيلوسوفيالىق تۇرعىدا قويىلىپ, ءاربىر كەيىپكەر مەن ءىس-ارەكەت سيمۆولعا اينالعان. ميفولوگيالىق, ءدىني, فيلوسوفيالىق قاباتتار ارقىلى تانىمدى بايىتۋ كوزدەلگەن. ليبرەتتونىڭ اۆتورى جاس ستسەناريست ءانناس باعدات بىلاي دەيدى: «ليبرەتتونى جازۋ بارىسىندا ەرتەگىنىڭ بارلىق نۇسقاسىن وقىپ شىقتىم. ءتۇركىلىك دۇنيەتانىمىمىزدى بەينەلەيتىن ۇعىمداردىڭ كۋلتتىق ەتيمولوگياسىن ىزدەپ تاۋىپ, تانىستىم. ارينە, ونىڭ ءبارى ۇزاق اڭگىمە. نەگىزگىسى مىناۋ – حالىقتىڭ ارمانىنان جارالعان باس قاھارماننىڭ «سەگىز قىرلى, ءبىر سىرلى» ەكەندىگى. ەرتەگىدە ونىڭ بەينەسىن دوستارى تولىقتىرادى. ال, ميۋزيكلدە «دوستارى» باس قاھارماننىڭ ءبىر-ءبىر قاسيەتىنە اينالدى. مىسالى, شالقۇيرىق – اقىل, تاۋسوعار – ۇيات, ساققۇلاق – ادالدىق, جەلاياق – سابىر, كولتاۋىسار – قۇت, ەپتى – قارەكەت جانە قىراعى – سەنىم. وسىنداي قاسيەتتەردى بويىنا جيناعان توستىككە دۇنيەدە ەڭ قىمبات نارسە – ار. مۋزىكا تاساسىندا جۇتىلىپ كەتپەۋ ءۇشىن اكتەرلەردىڭ «ار» ءسوزىن بىرنەشە رەت ايتۋى ءتيىس بولدى».
ميۋزيكلدىڭ قويۋشى رەجيسسەرى – ەسلام نۇرتازين, مۋزىكا اۆتورى – بولاتبەك نۇرقاسىموۆ. ال اكتەرلەر – جاڭادان اشىلعان «Astana Musical» تەاترى ءۇشىن ارنايى تاڭدالىپ الىنعان جاس ماماندار. ايتا كەتەيىك, «ەر ءتوستىك» ميۋزيكلى ەكسپو قارساڭىندا دا كورەرمەندەرگە تارتۋ ەتىلەدى.
ايگۇل سەيىلوۆا,
«ەگەمەن قازاقستان»
استانا
