− قازاقى ناقىشتاعى كيىمدەردى زاماناۋي ستيلمەن ءۇيلەستىرۋ, اسىرەسە قىز-كەلىنشەكتەر اراسىندا سانگە اينالىپ كەلەدى. ۋنيۆەرسيتەت ستۋدەنتتەرى ىشىندە قازىر كۇندەلىكتى كيىم سىرتىنان قازاقى قامزولدى كيىپ جۇرەتىندەر كوپ. وزدەرىنە وتە جاراسادى. ارۋلارىمىز قازىردەن ۇلتتىق بەينەمىزدى ءبىرىزدى ەتۋگە ىقىلاستى. زاماناعا ساي ءساندى كەلبەت قالىپتاستىرىپ, ونى نازىك اشەكەي بۇيىمدارمەن ايشىقتاي تۇسۋدە. ۇلتتىڭ ۇرپاعىن ءتاربيەلەيتىن قىزداردىڭ سىرت كەلبەتىنىڭ مانىنە ونەگەلىك تۇرعىدان قاراعانى دۇرىس,− دەيدى «قىز جىبەك» كلۋبىنىڭ ءتورايىمى قازىنا ياحۋداەۆا.
جاقسى ءىستى «قىز جىبەك» كلۋبىنان كەيىن وسى وقۋ ورنىنىڭ عىلىمي كىتاپحانا ۇجىمى, ودان كەيىن ستۋدەنتتەرگە ۇلتتىق سالت-ءداستۇر, قولونەردى: شي, گوبەلەن, كىلەم توقۋ, كەستە تىگۋ, توقىما توقۋ, ءتۇرلى ۇلتتىق كيىمدەر ۇلگىسىن تىگۋدى ۇيرەتەتىن «كاسىپتىك ءبىلىم» كافەدراسىنىڭ ۇستازدارى قۋانا جالعاستىردى.
«كاسىپتىك ءبىلىم» كافەدراسىنىڭ مەڭگەرۋشىسى راحيا دارمەنوۆا قىزدار ۋنيۆەرسيتەتىنىڭ قولونەر شەبەرلەرى, تىگىنشى, ديزاينەر بولام دەگەن ستۋدەنتتەرى بۇگىندە ءتۇرلى ىسمەرلىك بايقاۋلاردىڭ جەڭىمپازدارى ەكەنىن ايتادى.
يگى باستاماعا قاتىستى بەلگىلى ەتنوگراف-عالىم, قازاق ۇلتتىق ادەت-عۇرىپ, سالت-ءداستۇر اكادەمياسىنىڭ اكادەميگى عاليا قايداۋىلقىزى: «بۇل اكتسيا وتەتىن دە كەتەتىن شارا بولماۋى ءتيىس. كيىم – ءاربىر ادامنىڭ كەلىستى كەلبەتىن قالىپتاستىراتىن, ءاربىر ۇلت پەن ۇلىستىڭ ارعى تەگىن, بەرگى تالعامىن, تانىمىن ۇيلەستىرەتىن, سونى باسقا جۇرتقا تانىتاتىن جاي عانا بوزبۇرشىك ەمەس, حالىقتىڭ جان دۇنيەسى, ومىرلىك ۇستانىمى جانە سول حالىقتىڭ وزىنە عانا ءتان بەت-كەلبەتىن ايقىندايتىن بەلگىسى. كيىنە ءبىلۋ دەگەن دەنەڭدى, ءتاندى عانا جابۋ ەمەس, وزىندىك ونەگەنىڭ ءبىر سالاسى بولۋى كەرەك», دەيدى.
ۋنيۆەرسيتەت قابىرعاسىندا «قىز قىلىعى», «بۇلبۇل قىزدار», «شەبەر قىزدار», «نازقوڭىر», «ىزدەنىس», «ءىنجۋ-مارجان», «ءۇمىت» سياقتى ۇيىرمەلەر جۇمىس ىستەيدى.
ايناش ەسالي,
«ەگەمەن قازاقستان»
الماتى
