دانا ابايدىڭ جۇمباعى كوپ, سىرى تەرەڭ, ءمانى ءماڭگىلىك مۇرالارىن زەرتتەۋدە عۇلاما مۇحتار اۋەزوۆ كوشىن باستاعان ابايتانۋشىلاردىڭ ءدال قازىرگى كەزدە بەلدى دە بەدەلدىسى, ءداستۇر جالعاستىعى مەن كوش تىزگىنىن قولعا العان مەكەمتاس مىرزاحمەت ۇلى ەكەندىگى انىق. «ابايتانۋ تاريحى» اتتى قۇندى ەڭبەگىندە عالىم ابايتانۋدىڭ تۇتاس كارتيناسىن جاسايدى.
مەكەمتاس مىرزاحمەت ۇلىنىڭ ەڭبەكتەرىنىڭ عىلىمي قۇندىلىعىن وقىرمان قاۋىمعا كەڭىنەن ناسيحاتتاۋ ءۇشىن وتكىزىلگەن كونفەرەنتسيانى جازۋشى مارحابات بايعۇت جۇرگىزىپ وتىردى.
«اباي جۇرگەن ىزبەنەن» اتتى كونفەرەنتسيادا «ابايدى شىعىسپەن بايلانىستىرا زەرتتەۋشى – م.مىرزاحمەت ۇلى», «ابايدىڭ ادامگەرشىلىك ءىلىمى – م.مىرزاحمەت ۇلى زەرتتەۋلەرىندە», «مەكەمتاس عىلىمىنىڭ بيىگى», «باۋىرجانتانۋ عىلىمىنىڭ نەگىزىن سالۋشى» دەگەن تاقىرىپتار بويىنشا باياندامالار تىڭدالدى.
كونفەرەنتسيا بارىسىندا قازاق عىلىمىنىڭ ءىرى تۇلعاسىن سوزگە تارتتىق.
− تۇركىستاندا ياساۋي اتىنداعى حقتۋ-ءدىڭ قازىعى قاعىلعاننان كەيىن ۋنيۆەرسيتەتكە جۇمىسقا شاقىرىلدىم, – دەدى مەكەمتاس مىرزاحمەت ۇلى. – رەكتوراتتا مەنەن ياساۋي تۋرالى سۇرادى, شىنىمدى ايتسام, ءوزىم ءبىلىڭكىرەمەيدى ەكەنمىن. ءويتكەنى, كەڭەس وكىمەتى قازاقتى ءبىرىكتىرمەي, توز-توز ەتۋ ءۇشىن ياساۋيدى جامانداپ, مانسۇقتاپ تاستاعان. كەيىن شاكىرتتەرىممەن تولىق زەرتتەپ, كىتابىن شىعاردىق. بايقاعانىمىز, ياساۋي − قازاقتى ەشقايدا اداستىرماس تەمىرقازىعى ەكەن. ياساۋي مەن اباي باردا قازاق امان بولادى. كەيىنگى ۇرپاق وسىنى ءبىلۋى كەرەك.
قازاق مۇددەسى ءۇشىن وت پەن سۋعا ءتۇسىپ, ادالدىعىنان اينىمايتىن كورنەكتى عالىم وسىلاي دەيدى.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
