ەلجان ءبىرتانوۆ ءوز سوزىندە: «قاراعاندى وبلىسىندا زاماناۋي نىسانداردىڭ بار ەكەندىگى قۋانتادى. رەسمي دەرەكتەرگە سۇيەنسەك, وبلىستاعى مەملەكەت تاراپىنان كورسەتىلەتىن تەگىن مەديتسينالىق قىزمەت كولەمىنىڭ 24 پايىزىن جەكەمەنشىك مەكەمەلەر اتقارىپ وتىر. بۇل – ءتيىمدى بيزنەس مودەلدىڭ جانە ءتيىمدى باسقارۋدىڭ كورسەتكىشى. ياعني, باسەكەلەستىك بار جەردە ساپالى مەديتسينالىق قىزمەت كورسەتۋ دە بولادى. بولاشاقتا مەديتسينالىق ساقتاندىرۋمەن قاتار, تۇرعىندار ساپالى مەديتسينالىق كومەك الاتىن بولادى. ۇستىمىزدەگى جىلدان باستاپ ەلباسىنىڭ تاپسىرماسى بويىنشا جەكەمەنشىك مەكەمەلەرگە تەگىن مەديتسينالىق قىزمەتتى بەرۋگە تەڭدەي جاعداي جاسالادى. قاراعاندىدا جەكەمەنشىك كلينيكالار سانى كوبەيۋدە, بۇل قۋانتارلىق جاعداي, – دەدى.
حالىق كەزدەسۋدەن ۇققانداي, ەلىمىزدە مىندەتتى مەديتسينالىق ساقتاندىرۋ جۇيەسى ەنگىزىلەدى. بۇل ورايدا, بەسىنشى ساۋىردەن باستاپ, جەرگىلىكتى ەمحانالاردا تىركەۋ كامپانيالارى باستالدى. كەز كەلگەن ازامات تەگىن مەديتسينالىق كومەك الۋ ءۇشىن ءوزى تاڭداعان ەمحاناسىنا كەلىپ تىركەلىپ, ءوزىنىڭ مىندەتتى ساقتاندىرۋ جۇيەسىندەگى ءمارتەبەسىن بىلە الادى. ول ءۇشىن ارنايى مامان ينتەرنەت ارقىلى قاراپ, ەمدەلۋشىنىڭ قاي ساناتقا جاتاتىنى تۋرالى اقپارات بەرەدى.
بارلىعى ءۇش سانات قاراستىرىلعان. ءبىرىنشى – جۇمىسشىلار. جۇمىسشىلار ءۇشىن بيىل 1 شىلدەدەن باستاپ جۇمىس بەرۋشى ساقتاندىرۋ قورىنا جارنا تولەي باستايدى. ەكىنشى – مەملەكەت تاراپىنان ساقتاندىرىلاتىن ادامدار. ولار − زەينەتكەرلەر, مۇمكىندىگى شەكتەۋلى ازاماتار جانە جۇمىسسىزدار. اقپارات مەملەكەتتىك اقپارات جۇيەسىنەن الىناتىنى سەبەپتى – بارلىعى تەگىس تەكسەرىلەدى. ءۇشىنشى سانات – ءوز-وزدەرىن جۇمىسپەن قامتاماسىز ەتەتىن ازاماتتار, ياعني جەكە كاسىپكەرلەر. ال كاسىبى تىركەلمەگەن نەمەسە ەڭ تومەنگى ايلىقتان بەس پايىز اۋدارۋشىلار, ياعني, اي سايىن 1 200 تەڭگەنى 1 شىلدەدەن باستاپ تولەۋدى باستاۋلارىنا بولادى.
سونداي-اق, وبلىستىق مەديتسينا قاۋىمداستىعىمەن كەزدەسۋ بارىسىندا ەلجان ءبىرتانوۆ مەملەكەت باسشىسىنىڭ جولداۋىندا ايتىلعانداي, ەلىمىزدە دەنساۋلىق ساقتاۋ سالاسىندا ساندىق تەحنولوگيالىق جاڭارتۋدى جەدەلدەتۋ قاجەتتىلىگىن اتاپ ءوتتى.
قورىتا ايتقاندا, مينيستر ساپارىنداعى باستى ماقسات – ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق ءباسەكەگە قابىلەتتىلىك» اتتى قازاقستان حالقىنا جولداۋىن ءتۇسىندىرۋ اياسىندا وبلىستاعى مەديتسينالىق نىساندار جۇمىسىمەن تانىسۋ جانە تۇرعىندارعا ساقتاندىرۋ ارقىلى ەم الۋ, ءوز قاراجاتىڭا ەم الۋعا قاراعاندا الدەقايدا ارزان جانە قولايلى ەمدەۋ مۇمكىندىگى بار جاڭا جۇيەنىڭ ءمان-جايى بولدى.
ميراس اسان,
«ەگەمەن قازاقستان»
قاراعاندى وبلىسى
