استانادا جارتى عاسىردان استام ۋاقىتتا ەلىمىزدىڭ اگرووندىرىستىك كەشەنى ءۇشىن 60 مىڭنان استام بىلىكتىلىگى جوعارى ماماندار دايىنداپ شىعارعان س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە جاڭادان سالىنعان ستۋدەنتتەر ءۇيى اشىلدى.
سالتاناتتى ءىس-شاراعا ءبىلىم جانە عىلىم ۆيتسە-ءمينيسترى ەلميرا سۇحامبەرديەۆا, اۋىل شارۋاشىلىعى مينيسترلىگىنىڭ جاۋاپتى حاتشىسى ەرمەك كوشەرباەۆ, پارلامەنت سەناتىنىڭ اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ توراعاسى سەرگەي پلوتنيكوۆ, استانا قالاسى اكىمىنىڭ ورىنباسارى ەرمەك امانشاەۆ جانە بەلگىلى قوعام قايراتكەرلەرى, ۇستازدار مەن ستۋدەنتتەر قاتىستى.
جيىندا ءسوز العان س.سەيفۋللين اتىنداعى قازاتۋ رەكتورى اقىلبەك كۇرىشباەۆتىڭ ايتۋىنشا, ستۋدەنتتەر ءۇيى سوڭعى 40 جىلدا جاڭادان سالىنىپ وتىرعان عيمارات.
«بىلتىر جاس ماماندارعا, ماگيسترانتتار مەن دوكتورانتتارعا ەسىل وزەنىنىڭ سول جاعالاۋىنان 120 پاتەرلى ءۇش ءۇي پايدالانۋعا بەرگەن بولاتىنبىز. ءسويتىپ, بارلىق وقىتۋشىلاردى جاتاقxانامەن قامتاماسىز ەتتىك. بۇگىن كوپتەن كۇتكەن قۋانىشتى ءسات – جاڭا ستۋدەنتتەر ءۇيى اشىلىپ وتىر. سوڭعى جاتاقحانا كەڭەس كەزىندە, وسىدان 40 جىل بۇرىن سالىنعان ەدى. جاتاقحانا قۇرىلىسىنا مەملەكەت بيۋدجەتىنەن 1 ملرد تەڭگە اقشا ءبولىندى. بۇگىندە ۋنيۆەرسيتەت ستۋدەنتتەرىنىڭ 75 پايىزى جاتىن ورىنمەن قامتاماسىز ەتىلىپ وتىر» دەدى رەكتور.
جاتاقحانا نەگىزىنەن شالعايدان كەلگەن ستۋدەنتتەرگە بەرىلەدى. ۋنيۆەرسيتەتتىڭ 1 كۋرس ستۋدەنتى, ەرەيمەنتاۋلىق ءمادينا انۋاربەكقىزى ستۋدەنتتەر ۇيىنەن بولمە العانىنا قۋانىشتى ەكەنىن, بار جاعداي جاسالعانىن جەتكىزدى.
جاتاقحانا 592 جاتىن ورىنعا قاراستىرىلعان. 9 قاباتتى ستۋدەنتتەر ۇيىندە قازىرگى زامانعى تەلەكوممۋنيكاتسيا جەلىسى, جوعارى جىلدامدىقتاعى Wi-Fi جەلىسى, جاستار ورتالىعى, كىتاپxانا, دارىگەرلىك بەكەت, اسxانا, سپورت زالى, شاxمات پەن توعىزقۇمالاق جانە كىر جۋ بولمەسى بار.
ايا ءومىرتاي,
«ەگەمەن قازاقستان»
