وسى تىلەۋدىڭ ءوزى مەنىڭ وزىمە دە كۇش-قۋات بەرەدى: پەش ءتۇبىنەن ج ۇلىپ الىپ, كۇرەس كىلەمىنىڭ ءتورىنە دەدەكتەتىپ الىپ بارادى. سول كۇدىرەتتى كۇش كۇنى بۇگىنگە دەيىن مەنى تۇعىردان تۇسىرمەي, بالۋان باپتاتىپ ءجۇر!
وسى ايتقانىمنىڭ بارلىعى دا ىشىمدە قالار ما ەدى, ەگەر, كەشە ەل گازەتى «ەگەمەن قازاقستاننان» ەلباسىمىز نۇرسۇلتان ءابىش ۇلى نازارباەۆتىڭ «بولاشاققا باعدار: رۋحاني جاڭعىرۋ» دەگەن ماقالاسىن وقىماعانىمدا...
اسىرەسە, «جاڭعىرۋ اتاۋلى بۇرىنعىداي تاريحي تاجىريبە مەن ۇلتتىق داستۇرلەرگە شەكەدەن قاراماۋعا ءتيىس. كەرىسىنشە, زامانا سىنىنان ءسۇرىنبەي وتكەن وزىق داستۇرلەردى تابىستى جاڭعىرۋدىڭ ماڭىزدى العىشارتتارىنا اينالدىرا ءبىلۋ قاجەت. ەگەر جاڭعىرۋ ەلدىڭ ۇلتتىق-رۋحاني تامىرىنان ءنار الا الماسا, ول اداسۋعا باستايدى», دەگەن جولدار مەنىڭ جانىمدى ءدۇر ءسىلكىندىرىپ, ويداعى ايتسام دەپ جۇرگەن ءسوزدەردىڭ سىرتقا شىعۋىنا تۇرتكى بولدى.
قاراپ تۇرسام, بار سانالى عۇمىرىمدى كيەلى سپورت – كۇرەس ونەرىنە ارناپپىن. قولىمنان قازاعىمنىڭ ءجۇرەكتى دە, بىلەكتى تالاي بالاسى ءوتتى. ءبىر-ءبىرىنە مۇلدە ۇقسامايتىن ءمىنەزدەر, ءبىرىنەن-ءبىرى اسىپ ءتۇسىپ جاتقان دۇدۇلدەر مەن دارىندار. بىراق, قۇدانىڭ قۇدىرەتى, سولاردىڭ بويىندا ەرىكسىز تاڭداي قاقتىراتىن ورتاق ءبىر قاسيەت بولاتىن. جانە دە مەن ونى جازباي تانيتىنمىن. ول – ۇلتتىڭ جادىلىق كودىنا جازىلىپ قالعان ءور نامىس ەدى!
مىنە, مەن جارتى عاسىردان استام ۋاقىت باپكەرلىك عۇمىرىمدا وسى نامىس دەگەن الداسپاندى شاما-شارقىمشا قايراپ كەلەمىن. سول الداسپان اعايىندى بايشولاقوۆتار بولىپ, الەمدىك ايدىك جارىستاردا جارقىرادى. تاپ بۇگىندە شىنكەەۆتەردەي قازاق كۇرەسىنىڭ كوگىندە كۇن ساۋلەسىنە شاعىلىسىپ ءجۇر!
ءيا, ءبارىن ايت تا, ءبىرىن ايت دەيتىن بولساق, بۇگىنگى كۇندە ۇلتتىق ءتول سپورتىمىز – تامىرىنا قان جۇگىرگەن قازاق كۇرەسى جاندانىپ, جاڭعىرىپ كەلەدى. بىلە بىلگەن ادامعا وسى كۇرەسىمىزبەن بىرگە سەرتكە سۋارىلعان كۇرەسكەر رۋح تا, قايسارلىققا قايرالعان ءور نامىس تا قايتا ورالدى ەمەس پە؟! مىنە, ۇلتتىق قۇندىلىقتار تۇرعىسىنان العاندا, ءتول كۇرەسىمىزدىڭ توڭىرەگىندەگى بۇل جاڭعىرۋدى مەن شىن مانىندەگى ۇلتتىق-رۋحاني تامىردان ءنار العان, نامىستى جانىعان جاڭعىرۋ دەپ ۇعامىن!
ديحانباي بيتكوزوۆ,
قازاقستان رەسپۋبليكاسىنىڭ قۇرمەتتى سپورت قايراتكەرى
قاراعاندى
