زاۋىتتار شىعاراتىن ءونىم كولەمى 16 ميلليارد تەڭگەنى قۇراعانىمەن, الەۋەت 27 پايىز عانا پايدالانىلىپ وتىرعانىن اتاپ كورسەتىپ, ەڭبەك ونىمدىلىگىن ەكى ەسە ارتتىرۋ, ىشكى-سىرتقى ينۆەستيتسيالىق قارجى كوزدەرىن تارتۋ مىندەتتەرىن قويعان بولاتىن. ايماق باسشىسىنىڭ ەندىگى ساپارى ەلدى مەكەندەرگە باعدارلانعان.
قۇمار ىرگەباي ۇلى ات باسىن تىرەگەن العاشقى نىسان ەسىل اۋدانىنا قاراستى «ەگىن» جشس-ءى بولدى. سەرىكتەستىك ەگىنشىلىكپەن تۇراقتى تۇردە اينالىسىپ كەلەدى. 5 مىڭ گەكتارعا بيداي, 2 مىڭ گەكتارعا مايلى داقىلدار ءوسىرەدى. سوڭعى جىلدارى ءونىمدى قالدىقسىز وڭدەۋ تەحنولوگياسىن يگەرىپ, ۇدەمەلى يندۋستريالىق-يننوۆاتسيالىق دامۋ باعدارلاماسى اياسىندا ديىرمەن مەن ماكارون كەشەنىن ىسكە قوستى. شەتەلدىك قۇرال-جابدىقتار ورناتىلعان تسەحتاردا جىلىنا 3443 توننا ۇن, 746 توننا ماكارون, 834 توننا كەبەك وندىرىلەدى. ەكى جۇزگە جۋىق ادام ەڭبەككە تارتىلىپ, جۇمىس ءۇش اۋىسىمدا ۇيىمداستىرىلعان. شارۋاشىلىق باسشىسى ۆلاديمير چۋبىكيننىڭ ايتۋىنشا, ۇكىمەت اراپىنان اۋىل شارۋاشىلىعىن دامىتۋعا جان-جاقتى قولداۋ كورسەتىلگەن. «قازاگروقارجى» كومپانياسى ارقىلى ليزينگكە «دجون دير», «MacDon» سەكىلدى زاماناۋي تەحنيكالار ساتىپ الىنىپتى. ماشينا-تراكتور پاركىندە «متز-82» ماركالى 14 تراكتور, 16 ءدان جينايتىن كومباين, 4 ەگىستىك كەشەن بار. سەرىكتەستىكتىڭ ساپالى ءارى قولجەتىمدى ونىمدەرى ەلىمىزدەن تىسقارى ايماقتارعا دا جونەلتىلەدى. اتاپ ايتقاندا, رەسەيگە, تۇرىكمەنستانعا, قىرعىزستانعا, وزبەكستانعا ەكسپورتتالادى.
ق.اقساقالوۆ شارۋاشىلىقتىڭ وندىرىستىك الەۋەتىمەن تانىسقاننان كەيىن وڭىردە استىقتى وڭدەۋمەن جانە وتكىزۋمەن اينالىساتىن كاسىپورىنداردىڭ سانىن كوبەيتۋ قاجەتتىگىنە نازار اۋداردى.
– ەلباسى بيىلعى جولداۋىندا اگرارلىق سەكتوردى ەكونوميكانىڭ جاڭا درايۆەرىنە اينالدىرۋ تالابىن قويىپ, كوپتەگەن پوزيتسيالار بويىنشا الەمدە ءىرى اگرارلىق ەكسپورتتىق ءونىم وندىرۋشىلەردىڭ ءبىرى بولاتىنىمىزدى ايتتى. وبلىستا قايتا وڭدەۋ ءوندىرىسىنىڭ كولەمى 20 پايىز توڭىرەگىندە عانا. بۇل – تومەن كورسەتكىش. سوندىقتان الداعى ۋاقىتتا شيكىزات وندىرىسىنەن ساپالى وڭدەلگەن ءونىم شىعارۋعا دەيىن جەتۋ جولدارىن تىنباي قاراستىرۋىمىز قاجەت. وسى سالانى وركەندەتۋ, العا باستىرۋ ايرىقشا ماڭىزدى. اسىرەسە, اۋىلدىقتاردى جىل بويى تۇراقتى جۇمىسپەن قامتيتىن ءوندىرىس ورىندارىن اشۋعا جاپپاي جۇمىلۋ كەرەك. ەلدى مەكەندەردىڭ ينفراقۇرىلىمىن دامىتۋعا, جولدار سالۋعا, قۋات كوزىن تارتۋعا مەملەكەت قارجى اياعان ەمەس. بيزنەسكە دە قولايلى جاعدايلار جاسالعان, – دەدى قۇمار ىرگەباي ۇلى.
اگروقۇرىلىم كوكتەمگى ەگىس ناۋقانىنا ساقاداي ساي. نارىق سۇرانىسىنا بايلانىستى مايلى داقىلدار كولەمى ارتتىرىلماق. ءوڭىر باسشىسى قىتايلىق كومپانيالاردان 60 مىڭ توننا كەبەككە تاپسىرىس تۇسكەنىن, وسى جاعىن دا قاپەردە ۇستاۋلارىن ەسكەرتتى.
اۋدانداعى «اگروحيمسناب»–ىرگەلى شارۋاشىلىقتاردىڭ ءبىرى. وعان تاجىريبەلى مامان ۆاسيلي شكودين جەتەكشىلىك ەتەدى ءبىرى. سەرىكتەستىك ەگىنشىلىكپەن قاتار مال وسىرۋمەن دە شۇعىلدانادى. ءتورت ت ۇلىك ساتىپ الۋعا – 40 ميلليون تەڭگە, قورا-قوپسى سالۋعا 18 ميلليون تەڭگە نەسيە الىپتى. «سىباعا» باعدارلاماسىنا قاتىسا وتىرىپ, مال باسىن 465-كە جەتكىزگەن. سيىرلار بۇزاۋلاي باستاپتى.
– وتكەن جىلدى تابىستى اياقتادىق. 59 توننا ەت ءوندىرىلىپ, 130 باس اسىل تۇقىمدى تايىنشا ساتىلدى. بيىل تابىندارعا 150-170 ءتول قوسىلادى دەگەن ۇمىتتەمىز, – دەيدى ىسكەر باسشى.
شارۋاشىلىقتىڭ جاڭا تەحنولوگيا بويىنشا سالىنعان قورالارى وبلىس اكىمىنىڭ نازارىن اۋداردى. ايماقتىڭ قىتىمىر اۋا رايىنا ىڭعايلانىپ تۇرعىزىلعان. مۇندا ەگىنشىلىك پەن مال شارۋاشىلىعىندا 50 ادام جۇمىس ىستەيدى.
ق.اقساقالوۆ قىزىلجار اۋدانى «زەنچەنكو جانە ك» كوممانديتتىك سەرىكتەستىگىندە دە بولىپ, اۋىل ازاماتتارىنىڭ دەنشىلىگىن تۇراقتى جۇمىسپەن قامتىپ وتىرعان شارۋاشىلىقتىڭ مەملەكەتتىك-جەكەمەنشىك ءارىپتەستىك اياسىندا قىرۋار ءىس اتقارعانىن بولە-جارا اتاپ كورسەتتى. بيىل نوۆونيكولسكوە اۋىلىندا جاڭا دەنە شىنىقتىرۋ-ساۋىقتىرۋ كەشەنى پايدالانۋعا بەرىلدى. سپورت كەشەنىنىڭ قۇرىلىسىنا جانە جابدىقتار ساتىپ الۋعا 240 ميلليون تەڭگە قاراجات جۇمسالعان. ەكى مىڭعا جۋىق تۇرعىنى بار اۋىل ءۇشىن بۇل الەۋمەتتىك نىساننىڭ ماڭىزى زور. كەشەندە ۆولەيبول مەن باسكەتبول ويناۋعا ارنالعان الاڭ, جاتتىعۋ زالى, مەديتسينالىق كابينەت, بيليارد زالى ورنالاسقان. كوممانديتتىك سەرىكتەستىكتىڭ باس ديرەكتورى گەننادي زەنچەنكو مامىر ايىندا ۇزىندىعى 25 مەترلىك باسسەيننىڭ ىسكە قوسىلاتىنىن جەتكىزدى.
سەرىكتەستىكتىڭ قاراجاتىنا تۇرعىزىلعان جاڭا زاماناۋي ءدارىگەرلىك امبۋلاتوريا دا اۋىل تۇرعىندارىنا ساپالى قىزمەت كورسەتەدى. مۇندا دارىگەرگە دەيىنگى تەكسەرۋ, مەديتسينالىق مۇراعات, فيزيوتەراپيا جانە تاعى باسقا كابينەتتەر جۇمىس ىستەيدى. عيماراتتىڭ جالپى اۋماعى – 416 شارشى مەتر. وسى ماڭايداعى جەتى اۋىلدىڭ 3,7 مىڭ تۇرعىنى ەم-دوم الۋ مۇمكىندىگىنە يە.
كومانديتتىك سەرىكتەستىك وزىق تەحنولوگيالاردى كەڭىنەن قولدانىپ كەلەدى. ماشينا-تراكتور پاركى تۇگەلدەي جاڭارتىلىپ, ەگىنشىلىك مادەنيەتىن جەتىلدىرۋدىڭ, اۋىسپالى ەگىس جۇيەسىن جاڭارتۋدىڭ, توپىراق وڭدەۋدىڭ جاڭا ءادىستەرى ەنگىزىلگەن. سەلەكتسيالىق شارالاردى عىلىمي نەگىزدە ءجۇرگىزۋدىڭ ارقاسىندا تابىندار اسىلتۇقىمدى مالمەن تولىعىپ, ءونىم كولەمى ايتارلىقتاي ارتقانى بايقالادى. ءار سيىردان جىلىنا 7 مىڭ ليتر ءسۇت ساۋىلادى. كۇنىنە 40 توننا ءسۇت وندىرىلەدى. رەسەيدىڭ قورعان جانە تۇمەن وبلىستارىمەن ارىپتەستىك قارىم-قاتىناس ورناتىلعان.
−اۋىل شارۋاشىلىعى تاۋار وندىرۋشىلەرى پايدالى ءارى ءتيىمدى جۇمىس ىستەۋلەرى قاجەت. تۇرعىندارعا سپورتپەن اينالىسۋعا, ساپالى مەديتسينالىق كومەك الۋلارىنا جاعداي جاساۋلارى مىندەتتى. گەننادي گەننادەۆيچ باسقاراتىن شارۋاشىلىقتان وزگەلەر ۇلگى العاندارى ءجون بولار ەدى. ويتكەنى, جىل وتكەن سايىن ءسۇت ونىمدەرىنە دەگەن سۇرانىس ىشكى-سىرتقى نارىقتا ارتىپ كەلەدى. وڭىردە ءوزىن دە, وزگەلەردى دە تولىق قامتاماسىز ەتەتىن وسىنداي كەشەندەر سانىن كوبەيتۋ باستى باعدار بولىپ قالا بەرەدى, – دەدى ۇجىم مۇشەلەرىمەن كەزدەسۋدە ايماق باسشىسى ق. اقساقالوۆ.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
