ناۋرىز تەك بەلگىلى كۇندەردە عانا تويلاناتىن مەرەكە ەمەس. اي بويى اتاپ وتسەڭ دە ارتىق ەتپەيتىن ايتۋلى دۋمان. بۇگىنگى شارانىڭ ماقساتى ناۋرىزدىڭ قادىر-قاسيەتىن ۇعىنىپ, ۇلىق مەرەكەنىڭ داڭقىن اسپەتتەۋگە ارنالدى. تامىرى تەرەڭدە جاتقان ءتۇبى ءبىر تۇركى حالىقتارىنا ورتاق مەرەكەنىڭ ارتىقشىلىقتارى جايلى كەڭىنەن ايتىلدى. بۇكىل جەر-انانى بۋساندىرىپ الەمگە شۋاق سىيلايتىن, جان بىتكەندى جادىراتىپ جانىڭا شۇعىلا قۇياتىن شۋاقتى شاقتىڭ ادەمى كورىنىسى شارا بارىسىندا وقىلعان باياندامالاردا كەڭ مازمۇندا كورىنىس تاپتى.
قازاقستان حالقى اسسامبلەياسىنىڭ اتىنان جيىلعان قاۋىمدى قۇتتىقتاعان پارلامەنت ءماجىلىسىنىڭ دەپۋتاتى احمەت مۋرادوۆ: «ناۋرىز كۇن مەن ءتۇن تەڭەلگەن, بەرەكە مەن بىرلىكتى نىعايتاتىن ۇلى مەرەكە. ونىڭ وتكەنى مەن بۇگىنىن, ومىرىمىزدەگى ماڭىزى مەن ارتىقشىلىقتارىن جاس ۇرپاقتىڭ ساناسىنا ءسىڭدىرىپ, كەلەشەك جاستارعا ۇلگى ەتۋ – ءبارىمىزدىڭ مىندەتىمىز. ءاربىرىمىز بۇل كۇندى ەرەكشە كۇتەمىز. بەيبىتشىلىك پەن تاتۋلىقتىڭ ارقاسىندا وسىنداي كۇنگە جەتىپ وتىرمىز», دەدى.
– ءبىز ءۇشىن بۇل كۇندى ەرەكشە اتاپ ءوتۋ ۇلكەن مانگە يە. ءبىر داستارقاننان ءدام تاتىپ, ارازداسقان جاندار تاتۋلاسىپ باق-ىرىسقا كەنەلەتىن بۇل مەيرام – بارشامىزدىڭ ورتاق قۇندىلىعىمىز. ايتۋلى مەرەكە ەلىمىزدىڭ ءار ايماعىندا اتاپ وتىلۋدە. جاستارىمىزدىڭ سالت-ءداستۇردى قۇرمەتتەپ, وسى مەرەكە ارقىلى تاتۋلىق قارىم-قاتىناستى نىعايتىپ باۋىرلاسۋى ءۇشىن بۇل كۇننىڭ ماڭىزى زور, – دەدى ۇيعىر ەتنومادەني ورتالىعى باسشىسىنىڭ ورىنباسارى سۇلەيمان ماكسۋتوۆ.
شارا اياسىندا «قازاقستان ۇيعىرلارى ەتنومادەني ورتالىعى» مۇشەلەرى سۋرەتشىلەرىنىڭ كورمەسى تاماشالانىپ, ۇيعىر حالقىنىڭ ۇلتتىق تاعامدارىنا تولى داستارقان جايىلدى. ءىس-شارانىڭ سوڭى «قوش كەلدىڭ, ءاز-ناۋرىز» دەپ اتالعان مەرەكەلىك كونتسەرتكە ۇلاسىپ, ۇلتتىق سپورت ويىندارى ويناتىلدى.
ارمان وكتيابر,
«ەگەمەن قازاقستان»
الماتى
