استانا تورىندە تاراپتار اتىستى دوعارۋ رەجىمىنىڭ ساقتالۋ بارىسى, وسى رەجىمنىڭ بۇزىلۋىنا مونيتورينگ جاساۋدىڭ ۇشجاقتى تەتىكتەرىن جەتىلدىرۋ, بىتىمگە قوسىلعان ايماقتارداعى احۋال, تۇتقىندارعا قاتىستى ءمالىمەتتەر الماسۋ ماسەلەلەرى, قارۋلانعان وپپوزيتسيا مەن تەرروريستەردىڭ ارا-جىگىن انىقتاۋدى قامتاماسىز ەتۋ ماسەلەلەرى تالقىلاندى. سونداي-اق, يۋنەسكو دۇنيەجۇزىلىك مادەني مۇرالارىنىڭ سيرياداعى نىساندارىن مينادان تازارتۋعا حالىقارالىق قوعامداستىقتىڭ كومەگى قاجەتتىگى ءسوز بولدى.
ەكى كۇنگە سوزىلعان كەلىسسوزدەر قورىتىندىسى بويىنشا تاراپتار بىرلەسكەن مالىمدەمە قابىلدادى. اتالعان قۇجاتتا تاراپتار وزدەرىنىڭ اتىستى دوعارۋ رەجىمىنىڭ ساقتالۋىن قولدايتىندارىن جەتكىزدى. ولار بۇۇ اياسىنداعى جەنەۆا كەلىسسوزدەرىن تولىقتىرۋشى ءارى نىعايتۋشى رەتىندە استانا پروتسەسىنىڭ ماڭىزى جوعارى ەكەنىن ايرىقشا اتاپ كورسەتتى. 23 ناۋرىزدا جەنەۆا كەلىسسوزدەرىنىڭ جالعاسىن تاباتىنىنا ريزاشىلىقتارىن ءبىلدىردى.
وسى كەلىسسوزدەر كەزىندە تاراپتار 3-4 مامىردا استانادا كەلەسى جوعارى دەڭگەيدەگى كەزدەسۋدى وتكىزۋگە جانە 18-19 ساۋىردە تەگەراندا ساراپشىلىق دەڭگەيدەگى الدىن الا كونسۋلتاتسيا وتكىزۋگە ۋاعدالاستى. ەلوردا تورىندە ەكى كۇنگە سوزىلعان كەلىسسوزدەرگە قاتىسقان تاراپتار وسى كەزدەسۋدى ۇيىمداستىرعانى ءۇشىن قازاقستان پرەزيدەنتى مەن ەل ۇكىمەتىنە العىس بىلدىرگەنىن اتاپ وتكەن ءجون.
ەلىمىزدىڭ سىرتقى ساياسات ۆەدومستۆوسى حابارلاعانداي, قازاقستان تاراپى ەلوردادا وتكەن كەزدەسۋدى سيريا داعدارىسىن ساياسي رەتتەۋ پروتسەسىنە قوسىلعان ناقتى ۇلەس دەپ باعالادى.
ارنۇر اسقار,
«ەگەمەن قازاقستان»
