مۇناي ونىمدەرىن كوپ تۇتىنامىز

قازاقستاندا مۇناي ونىمدەرىن تۇتىنۋ كولەمى جىل سايىن ارتىپ كەلەدى. وعان ەلىمىزدەگى جەڭىل اۆتوكولىكتەردىڭ ەداۋىر كوبەيۋى اسەر ەتتى. بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا ەنەرگەتيكا ۆيتسە-ءمينيسترى اسەت ماعاۋوۆ ءمالىم ەتتى. ونىڭ ايتۋىنشا, ەلىمىزدە بەنزين باعاسىنىڭ قىمباتتاۋىنا مۇناي ونىمدەرىن تۇتىنۋ كولەمىنىڭ ەداۋىر ارتۋى اسەر ەتكەن. «بۇگىنگى تاڭدا حالىقتىڭ, سونداي-اق, كوپتەگەن باق وكىلدەرىنىڭ كوكەيىندە جۇرگەن سۇراق بەنزين باعاسىنا بايلانىستى ەكەنى تۇسىنىكتى. بىرىنشىدەن, ەلىمىزدە مۇناي ونىمدەرىن تۇتىنۋ كولەمىنىڭ ەداۋىر ارتقانىن اتاپ وتكەن ءجون. كەشە ءبىز وسى ماسەلەگە بايلانىستى دوڭگەلەك ۇستەل وتكىزدىك. مۇناي ونىمدەرىن تۇتىنۋ كولەمىنىڭ ەداۋىر ارتۋى ەلىمىزدە جەڭىل اۆتوكولىك سانىنىڭ ايتارلىقتاي وسۋىمەن بايلانىستى. ماسەلەن, 2001 جىلى ەلىمىزدەگى جەڭىل اۆتوكولىك سانى 1 ملن 58 مىڭ بولسا, 2016 جىلى ولاردىڭ سانى 3 ملن 924 مىڭدى قۇرادى. سايكەسىنشە, مۇناي ونىمدەرىن تۇتىنۋ كولەمى دە 2001 جىلعى 3 ملن 590 مىڭنان 2016 جىلى 8 ملن 775 مىڭعا ارتتى. ەلىمىزدە جەڭىل اۆتوكولىك سانى مەن مۇناي ونىمدەرىن تۇتىنۋ كولەمىنىڭ ارتۋىنا بايلانىستى بەنزين باعاسى ءوستى», – دەپ ءتۇسىندىردى ءا.ماعاۋوۆ. ول سونداي-اق, سۇرانىسقا ساي مۇناي وڭدەۋ زاۋىتتارى دا جىل سايىن ءوز ونىمدەرىنىڭ كولەمىن ارتتىرىپ كەلە جاتقانىن اتاپ ءوتتى. «2001 جىلى اۆتوكولىك بەنزينىن ءوندىرۋ كورسەتكىشى 1 ملن 536 مىڭ توننا بولسا, 2016 جىلى بۇل كورسەتكىش 2 ملن 900 مىڭ تونناعا دەيىن ءوستى, – دەدى ۆيتسە-مينيستر. – ايتسە دە, مۇناي ونىمدەرىن ءوندىرۋ كولەمى ەكى ەسەگە ارتقانىمەن, قازاقستان ءالى دە يمپورتقا تاۋەلدى. ەلدەگى تۇتىناتىن بەنزيننىڭ 30 پايىزى, ال ديزەل وتىنىنىڭ 15 پايىزى كورشى رەسەيدەن ساتىپ الىنادى». ايدار ورىسباەۆ, «ەگەمەن قازاقستان»