قازاق پوەزياسى يسپان تىلىندە سويلەدى

قازاق اقىندارىنىڭ شىعارمالارى يسپان تىلىنە اۋدارىلدى. ادەبيەت تاريحىندا تۇڭعىش رەت پيرەنەي تۇبەگىندە قازاق ءسوزىنىڭ رۋحى اسقاقتادى. XIX عاسىردان باستاپ بۇگىنگە دەيىنگى كورنەكتى اقىنداردىڭ تۋىندىلارى ەنگەن انتولوگيانىڭ تۇساۋكەسەر ءراسىمى يسپانيانىڭ مادريد قالاسىندا ءوتتى. قازاقستان مەن يسپانيا اراسىندا ديپلوماتيالىق قارىم-قاتىناستار ورناعانىنا 25 جىل تولۋىنا ورايلاستىرىلعان سالتاناتتى شاراعا يسپان پەن-كلۋبىنىڭ باس حاتشىسى, نەوپوليتان جانە ماللارمە پاريج اكادەمياسىنىڭ كوررەسپوندەنت-مۇشەسى, ەۋروپا اقىندارى فەستيۆالىنىڭ نەگىزگى قۇرىلتايشىسى, اتالمىش انتولوگيانىڭ ادەبي اۋدارماسىن جاساعان حۋستو حورحە پادرون باستاعان زيالى قاۋىم وكىلدەرى قاتىستى. قازاقستاننىڭ يسپانياداعى ەلشىسى باقىت ءدۇي­سەنباەۆ بۇل جوبانىڭ ەكى ەل اراسىنداعى رۋحاني بايلانىستى نىعايتۋداعى ماڭىزى زور ەكەنىنە توقتالدى. «انتولوگيا يسپانياداعى بارلىق كىتاپ دۇكەندەرىنە تاراتىلادى. ءبىر كىتاپپەن شەكتەلىپ قالماي, بولاشاقتا باسقا دا قازاق اقىندارىنىڭ شىعارمالارىن اۋدارۋدى, ناسيحاتتاۋدى جوسپارلاپ وتىرمىز», دەدى ول. الپىستان استام قازاق اقىندارىنىڭ ولەڭدەرىن يسپانشا سويلەتكەن اۋدارماشى حوسە حورحە پادرون بايان­داما جاساپ, اباي قۇنانباەۆ, مىرجاقىپ دۋلاتوۆ, قاسىم امانجولوۆپەن بىرگە داۋلەتكەرەي كاپ ۇلىنىڭ دا تۋىندىلارىن وقىپ بەردى. «ەلۋ جىلعا جۋىق ۋاقىت الەم اقىندارىنىڭ ولەڭدەرىن اۋدارىپ كەلەمىن. وسى انتولوگيامەن جۇمىس ىستەگەندە جۇزدەگەن قازاق اقىنىنىڭ شىعارماشىلىعىمەن تانىستىم. شۇرايلى دا كوركەم تىلدەرى مەنى بىردەن باۋراپ الدى. قازاق ادەبيەتىنىڭ كوكجيەگى كەڭ, كەلەشەگى كەمەل», – دەپ اتاپ ءوتتى ح.پادرون. تۇساۋكەسەر راسىمىنە انتولوگيانى قۇراستىرعان اقىندار داۋرەن بەرىكقاجى ۇلى مەن تاناكوز تولقىنقىزى ارنايى باردى. سونداي-اق, ولەڭدەرى انتولوگياعا ەنگەن وڭايگۇل تۇرجان, الماس احمەتبەك ۇلى, داۋلەتكەرەي كاپ ۇلى, ساعىنىش نامازشاموۆا, انار شامشادينوۆا, جانار ابسادىق, جانار ايلاشەۆامەن بىرگە وسى جولداردىڭ اۆتورى دا قاتىستى. باقىتگۇل باباش, «ەگەمەن قازاقستان»