«كوك كيت» كوپ ءتىل بىلەتىن سياقتى

وڭتۇستىك قازاقستان وبلىسىندا ءۇش ميلليونعا جۋىق حالىق تۇرسا, نەگىزىن جەرگىلىكتى ۇلت قۇرايدى. وبلىستىڭ بىرقاتار اۋداندارىندا وزگە ۇلتتىڭ وكىلدەرىن ەمگە ىزدەسەڭىز دە تاپپايسىز. رەسەيدە «كوك كيت» دەگەن سويقان ويىن باستالعاندا ءبىر ارىپتەسىمىز الەۋ­مەتتىك جەلىگە «كوك كيت» ورىسشا بىلمەيتىندەرگە قورقىنىشتى ەمەس ەكەن» دەپ ازىلدەپ جازعان. ولاي ەمەس ەكەن. تالاي ءجاسوسپىرىمدى ازداعان ۋاقىتتىڭ ىشىندە وزىنە قول جۇمساۋعا اپارعان جانتۇرشىگەرلىك ويىن وڭتۇستىك جاستارىنا دا جەتىپتى. جاقىندا قالالىق ءبىلىم باسشىلىعى مەن اتا-انالار جيىنىندا وبلىس پروكۋرورى ءبىرىنشى ورىنباسارىنىڭ مىندەتىن اتقارۋشى حالي ماماتاەۆ مىناداي دەرەك كەلتىردى. سوڭعى ءبىر اپتادا 8 ءجاسوسپىرىم مەن كامەلەت جاسىنا تولعان ءبىر تۇرعىننىڭ تۋىستارى ىشكى ىستەر ورگاندارىنا كومەك سۇراپ, ارىزدانعانىن ايتتى. ولاردىڭ ايتۋىنشا, بالالارىنا تۇندە بەلگىسىز بىرەۋلەر قوڭىراۋ شالىپ, «كوك كيت» ويىنىن ويناۋعا ۇگىتتەگەن. – بىزگە بەلگىلى بولعانداي, ءجاسوس­پىرىمدەردىڭ ۇيالى تەلەفوندارىنا قوڭىراۋ شالىپ, ولاردى قورقىتىپ, ويىنعا ۇگىتتەگەندەر قا­زاق تىلىندە حابار­لاسقان. ولارعا «ويناماساڭ سەنىڭ اپكەڭدى, اعاڭدى نە بولماسا باسقا دا تۋىسىڭدى ءولتىرىپ كەتەمىز» دەپ قورقىتقان. وسىعان وراي, وبلىستىق ىشكى ىستەر دەپارتامەنتىنىڭ بىلىكتى ماماندارىنان ارنايى توپ قۇرىلدى. حابارلاسقانداردى ىزدەستىرۋ شارالارى جۇرگىزىلىپ جاتىر. سونداي-اق, اتالمىش 9 دەرەك بويىنشا قر قىلمىستىق كودەكسىنىڭ 105-بابى 3-تارماعىمەن ءىس قوزعالىپ, تەرگەۋ امالدارى جۇرگىزىلۋدە. وسى جەردە تاعى ءبىر ەسكەرتە كەتەتىن ماسەلە, كۇدىكتى تۇلعالاردىڭ كىنالارى دالەلدەنسە, ولار 3 جىلدان 7 جىلعا دەيىن باس بوستاندىقتارىنان ايىرىلادى. مۇنداي ارەكەتتەرگە جول بەرگەندەر قاتاڭ جازالانادى, – دەدى ول. اتا-انالار مەن ءبىلىم ءبولىمىنىڭ باسشىلارى باس قوسقان جيىندا ساقتىق شارالارى جايىندا ۇسىنىستار ايتىلدى. سولاردىڭ ءبىرى – جاسوسپىرىمدەردىڭ قولىنداعى قىم­بات سمارتفونداردى قاراپايىم بايلانىس قۇرالدارىنا اۋىستىرۋ. ءبىلىم ءبولىمىنىڭ باسشىلارى دا وسى ۇسىنىستى قولداپ وتىر. ەندى مەكتەپتە جاس جەتكىنشەكتەرگە سمارتفون ۇستاۋعا تىيىم سالىنادى. بۇل ءبىر جاعىنان بالانىڭ قۇقىن شەكتەۋ سياقتى كورىنگەنىمەن, ولاردىڭ ءومىرىن ساقتاپ قالۋدان ماڭىزدى ەمەس. سمارتفوندى تاركىلەۋ بار ماسەلەنى شەشپەيدى. ەندىگى ماسەلە, اتا-انالار مەن ۇستازداردىڭ ءجيى باس قوسىپ, وسى ىندەتپەن كۇرەسۋدە جۇيەلى جۇمىس جۇرگىزە الۋىندا بولىپ وتىر. باقتيار تايجان, «ەگەمەن قازاقستان»