كيبەر كيلىگۋدەن قورعايدى

الەمگە تانىمال «كاسپەرسكي زەرتحاناسى» كومپانياسىمەن سەرىكتەستىك اياسىندا ءال-فارابي اتىنداعى قازۇۋ-دە «اقپاراتتىق قاۋىپسىزدىك» ورتالىعى اشىلدى. ءبىلىم ورداسىنداعى بۇل وقۋ ورتالىعى اقپاراتتىق قاۋىپسىزدىك سالاسىنداعى كيبەر-قاۋىپ پەن زاماناۋي ترەند تۋرالى ءبىلىمنىڭ قاينار كوزى بولماق. سونداي-اق, رەسۋرستاردى جاھاندىق عالامتور كەڭىستىگىندەگى كيبەر-شابۋىلداردان قورعاۋدىڭ قۇرىلىمدىق جۇيەسىن قۇرۋ جۇمىستارى دا قولعا الىنباق. اتالعان ورتالىقتا جوعارى وقۋ ورىندارىنىڭ ستۋدەنتتەرىمەن قاتار, مەملەكەتتىك مەكەمەلەر مەن كاسىپورىنداردىڭ قىزمەتكەرلەرى دە ءبىلىمىن جەتىلدىرە الادى. «كاسپەرسكي زەرتحاناسى» ءبىلىم بەرۋ باعدارلاماسىنىڭ جەتەكشىسى دميتري پوستەل­نيكتىڭ ايتۋىنشا, «كاسپەرسكي زەرتحاناسىنىڭ» جۇمىسى اقپا­راتتىق قاۋىپ پەن كيبەر قاۋىپسىزدىك تۋرالى ءبىلىم ساپاسىن ارتتىرۋعا باعىت­تالعان. كومپانيا ءونىم­دەرى سەرتيفيكاتتالعان جانە حا­لىق­ارالىق نارىققا شىعا­رىلعان. ءبىلىم بەرۋ سالاسى ار­قىلى ءوز تاجىريبەمىزبەن ءبولى­سۋگە جانە كيبەر-قورعانىس بو­يىنشا قازاقستاندىق ەڭبەك نارىعىنداعى ماماندار الەۋەتىن جوعارى مامانداندىرىلعان قىزمەتكەرلەرمەن تولىق قامتا­ماسىز ەتۋگە مۇمكىندىك بار. بۇگىندە عالامدىق اقپا­راتتاندىرۋ قوعامعا ۇلكەن ءوز­گە­رىستەر ەنگىزۋدە. ماماندار اقپارات­تىق تەحنولوگيا سالاسىن­داعى قاۋىپ-قاتەردىڭ الدىن الۋ ماقساتىندا زامانعا ساي ءارى وزىق تەحنولوگيالار ۇسىنۋدا. كيبەر-قاۋىپسىزدىك جانە ءبىلىم بەرۋ سالاسى بويىنشا رەسەيلىك زەرتحانامەن ىنتىماقتاستىق تۋرالى كەلىسىم اياسىندا ماسكەۋدەگى «كاسپەرسكي زەرتحاناسىنىڭ» ەڭ ۇزدىك ساراپشىلارى اقپان ايىن­دا الماتىعا ارنايى كەلىپ, وقۋ ورنىنىڭ وقىتۋشىلارى مەن ستۋدەنتتەرىنە, سونداي-اق مەم­لەكەتتىك مەكەمەلەر مەن كوم­پانيالاردىڭ وكىلدەرىنە ارنالعان سەمينارلار جۇرگىزىپ, دارىستەر وقىماق. ايتا كەتەرلىگى, ءال-فارابي اتىنداعى قازۇۋ تسيفرلى تەحنولوگيالاردى قولدانا وتىرىپ, ءبىلىم بەرۋ مەن عىلىمي-زەرتتەۋ جۇمىستارىن بەلسەندى تۇردە جۇرگىزىپ كەلەدى. ءبىلىم ورداسىندا ايگىلى «Hewlett-Packard», «Microsoft», «Cisco», «Konika Minolta», «Fujitsu», «Sam­sung» جانە باسقا دا ءبىر­قاتار كومپانيالاردىڭ ورتالىقتارى مەن زەرتحانالارى اشىلىپ, جەمىستى جۇمىس ىستەپ كەلە جات­قاندىعى سونىڭ ايعاعى. ميرا بايبەك, «ەگەمەن قازاقستان» الماتى