مەنەدجمەنت زاڭسىزدىقتى ازايتادى

وڭتۇستىك قازاقستان وبلىستىق پروكۋراتۋراسىنىڭ 2016 جىلدىڭ قورىتىندىسى بويىنشا وتكىزگەن القا ماجىلىسىندە جاسالعان بايانداماعا قاراعاندا, وتكەن جىلدىڭ ەكىنشى جارتى جىلدىعىنان باستاپ پروكۋرورلار كۇندەلىكتى جۇمىسپەن قاتار, ءوز سالاسىنا جوبالىق مەنەدجمەنتتى ەنگىزۋدى قولعا العان. ال جوبالىق مەنەدجمەنت دەگەن نە؟ «ءبىر سوزبەن ايتساق, بۇل ءناتي­جەگە باعىتتالعان كوماندالىق جۇمىس جانە ءبىزدىڭ وڭىرىمىزگە ءتان وزەكتى ماسەلەلەردى شەشۋ ماقساتىنداعى ءوزارا بايلانىسقان بىرەگەي ءىس-شارالار جيىنتىعى. قىزمەتكەرلەردى ءبىر مەزەتتە قايتا باعدارلاۋ ءۇشىن ناقتى تاپسىرما نەمەسە نۇسقاۋ بەرۋ جەتكىلىكسىز بولدى. تەك ۇيرەتىپ وقىتۋ مەن جوبالىق ءتاسىلدى ەنگىزۋدىڭ وزىنە 3 ايدان استام مەرزىم كەتتى. وسى سالاداعى جۇمىس تيىمدىلىگىنىڭ تومەندىگىنە بايلانىستى ورىنبا­سارلارىمنىڭ اراسىنداعى قىز­مەتتىك مىندەتتەر قايتا ءبولىندى, ونىڭ بىرەۋى كۇندەلىكتى جۇمىستان بوساتىلىپ, جوبالاردى ورىنداۋ مىندەتى جۇكتەلدى. جۇمىستىڭ جاڭا ادىستەرىن ەنگىزە وتىرىپ, ءبىز 12 جوبانى جۇزەگە اسىرۋعا كىرىستىك, ولاردىڭ ارقايسىسى ءبىزدىڭ وڭىرگە وزدىگىنشە وتە ماڭىزدى», دەلىندى وبلىس پروكۋرورى يبراھيم يمانوۆ جاساعان باياندامادا. وسىعان وراي, ءبىر-ەكى جوباعا ارنايى توقتالا كەتەيىك. حالىق سەنىمىنەن شىعۋدىڭ باستى جولى – ازاماتتاردىڭ وتىنىشتەرىن ساپالى قاراۋ مەن قۇقىقتارىن قورعاۋ. سول سەبەپتى وڭتۇستىكتىڭ پروكۋرورلارى باس پروكۋراتۋرا سەكىلدى «ءتيىمدى شاعىمدار قوعامى» اتتى جوباسىن ىسكە اسىرۋعا كىرىسكەن. ويتكەنى, شاعىمدانۋ, ارىزدانۋ – وڭتۇستىك وڭىرىندە وتە وزەكتى ماسەلە. سول شاعىمداردىڭ سانى جىلىنا 10 پايىزعا ءوسىپ وتىرادى, بىراق, وكى­نىشكە قاراي, ولاردىڭ 18 پايىز­ى­نا عانا جاۋاپ بەرىلەدى ەكەن. اتالعان جوبا اياسىندا «قو­عام­دىق قابىلداۋ» ينستيتۋتى قۇرىلعان. جەكە قابىلداۋلار تەك كونسۋلتاتيۆتىك كەڭەس مۇشە­لەرىنىڭ قاتىسۋىمەن وتكىزىلەدى. بۇل كەڭەستىڭ قۇرامىنا وبلىستىڭ ابىرويلى ازاماتتارى مەن پروكۋراتۋرا ارداگەرلەرى ەنگەن. ناتيجەسىندە وسىنداي تاجىريبەلى ازاماتتاردىڭ قابىلداۋىندا بولىپ, كەڭەس العان ازاماتتار قايتا شاعىمدانۋدان باس تارتىپ, جەكە قابىلداۋعا جازى­لۋشىلاردىڭ سانى 2 ەسەگە ازايعان. جوبا ىسكە اسىرىلعان 4 ايدىڭ وزىندە پروكۋراتۋراعا تۇسكەن وتىنىشتەردىڭ سانى 30 پايىزعا تومەندەپتى. وبلىستىق پروكۋراتۋرا قولعا العان تاعى ءبىر ماسەلە – جەر تەلىمى ءتوڭى­رەگىندەگى زاڭسىزدىقتارعا جول بەرمەۋگە قاتىستى. «جەر ۋچاسكەلەرىنە ءوز بەتىنشە يەلىك ەتۋدى جويۋ» جوباسى اياسىندا جەر ۋچاسكەلەرىنە ءوز بەتىنشە يەلىك ەتۋدىڭ 452 فاكتىسى انىقتالعان. قولدانىلعان شارالار نەگىزىندە كەيبىر جەرلەردى قالا اكىمدىگى زاڭداستىردى, كەيبىرىنە ۋاقىتشا پايدالانۋ قۇقىعى بەرىلدى. قال­عاندارى ءوز بەتىنشە جەردى بوساتقان. قولعا الىنعان شارالار بارىسىندا وبلىستىق كاداستر ور­تالىعىندا جەر ۋچاسكەلەرىنىڭ ورنالاسۋى مەن كوورديناتتارىنىڭ زاڭسىز وزگەرتىلگەنى, كاداسترلىق ىستەرگە وڭدى-سولدى جالعان ءمالى­مەتتەردىڭ ەنگىزىلگەنى انىقتالعان. بازا كىمنىڭ بولسا, سونىڭ قولىندا جۇرگەن. سودان پروكۋراتۋرانىڭ جۇرگىزگەن جۇمىستارىنىڭ ءناتي­جەسىندە جەرگە ورنالاستىرۋ قىز­مەتىمەن اينالىساتىن 79 جەكە مەكەمەلەرمەن كەلىسىمشارتتار بۇزىلسا, كاداستر مالىمەتتەرىن زاڭسىز قولدانۋدىڭ جولى كەسىلىپ, بازانى اشىق قولدانۋعا مۇمكىندىك جويىلعان. بۇل وسى سالاداعى الاياق­تىق دەرەكتەرىن 7 ەسەگە تومەن­دەتۋگە مۇمكىندىك بەرگەن. عالىمجان ەلشىباي, «ەگەمەن قازاقستان» وڭتۇستىك قازاقستان وبلىسى