«اق بۇلاقتىڭ» العاشقى جوباسى اۋىلدا جۇزەگە استى

ماڭعىستاۋ حالقى ءۇشىن اۋىز سۋ – ماڭىزدى ماسەلە. ءوڭىر تۇرعىندارىنىڭ الىپ سۋ ايدىنىنىڭ جاعالاۋىندا وتىرىپ اۋىز سۋدى ارمانداۋى دا – ۇيرەنشىكتى قۇبىلىس. سەبەبى, وڭىردە سۋ كوزدەرىنىڭ تاپشىلىعى مەن تەڭىز سۋىنىڭ تۇزدىلىعى ماسەلەنى باسقاشا شەشۋگە ماجبۇرلەيدى. «اق بۇلاق» مەملەكەتتىك باعدار­لاماسىنىڭ جەمىسى وبلىستىڭ ەڭ شالعاي, حالقى كوپ اۋدانى بەينەۋ اۋدانىندا جۇزەگە اسىپ, كەنتتە سۋ تازارتۋ كاسىپورىنى ىسكە قوسىلدى. كاسىپورىننىڭ مىندەتى – ەدىل وزەنىنەن كەلگەن سۋدى تازارتىپ, حالىقتى اۋىز سۋمەن قامتۋ. مەكەمەدەگى سىيىمدىلىعى 45 مىڭ تەكشە مەتر بولاتىن بەس بىردەي ءسۇزۋ قازاندىقتارى تاۋلىگىنە 12 مىڭ تەكشە مەتر سۋدى وڭدەيدى. سۋ الدىمەن تۇشىتىلىپ, ودان سوڭ بىرنەشە رەت سۇزگىدەن وتكىزىلىپ, ابدەن تازارتىلادى. ءار تاۋلىك سايىن تازارتىلعان, ىشۋگە جارامدى سۋ قۇبىر ارقىلى تۇرعىندارعا تاراتىلادى. زامانا تالاپتارىنا ساي جاڭا تەحنولوگيامەن جابدىقتالعان كەشەندەگى قۇرىلعىلاردىڭ جارتىسىنان كوبى, ياعني 60 پايىزى وتاندىق ءونىم بولسا, تەحنيكانىڭ 40 پايىزى شەتەلدىك قوندىرعىلار. مەردىگەر اسقار كەرەلباەۆتىڭ ايتۋىن­شا, سۋ تازارتۋ كاسىپورنى ماڭعىستاۋ وب­لىسى اۋداندارىنىڭ ىشىندە ءبىرىنشى رەت بەينەۋ اۋدانىندا جۇزەگە اسىرىلعان. 2014 جىلى باستالعان جۇمىستى 2016 جىلى اياقتاعان. جاڭا قۇرىلىستىڭ قۇبىرلارى ءۇش ەلدى مەكەنگە تارتىلعان, تاعى ەكى ەلدى مەكەنگە جاقىن ارادا قۇبىر جۇرگىزىلەدى. قۇبىرمەن جەتكىزىلەتىن سۋ ءۇيدى-ۇيگە كەزەڭ-كەزەڭىمەن جەتكىزىلەتىن بولادى, دەمەك بەينەۋلىكتەر ءۇشىن سۋ تاسيتىن كولىكتەرگە تاپسىرىس بەرىپ, كەزەك كۇتەتىن كۇندەر ارتتا قالاتىن كەز الىس ەمەس. گۇلايىم شىنتەمىرقىزى, «ەگەمەن قازاقستان» ماڭعىستاۋ وبلىسى سۋرەتتى تۇسىرگەن سەرىك مايەمەروۆ