ەل تىنىشتىعىن قولدايدى

ورتالىق كوممۋنيكاتسيالار قىزمەتىندە مەملەكەت باسشىسى نۇرسۇلتان نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابەلەتتىلىك» اتتى جولداۋىنا ارنالعان ءباسپاسوز ءماسليحاتى ءوتتى. وعان «قازاقستان رەسپۋبليكاسىنىڭ جەرگىلىكتى سوعىس جانە اۋعان سوعىسى ارداگەرلەرىنىڭ وداعى» قوعامدىق ۇيىمىنىڭ توراعاسى ءشارىپباي وتەگەنوۆ قاتىستى. بريفينگتە ول ەلباسى جولداۋىنداعى نەگىزىگى باسىمدىقتارىنىڭ ءبىرى – ينستيتۋتسيونالدى قايتا قۇرۋ, قاۋىپسىزدىك جانە سىبايلاس جەمقورلىقپەن كۇرەس تۋرالى ايتتى. «ءبىز, اۋعان سوعىسى ارداگەرلەرى ەكسترەميزم جانە تەرروريزم يدەيالارىن تاراتۋعا قارسى مەملەكەتتىك شارالار مەن قوعامدىق باستامالاردى تولىق قولدايمىز. وسى يدەولوگيانىڭ قوعام ساناسىنا سىڭۋىنە جول بەرمەۋ كەرەك دەي وتىرىپ, راديكالدىق اعىمدار, ۇلتارالىق, ناسىلدىك جانە ءدىني ارازدىقتى ناسيحاتتاۋعا قارسى بۇقارالىق اقپارات قۇرالدارى مەن بۇكىلالەمدىك عالامتوردى قولدانۋعا قاتاڭ شەكتەۋ, اقپاراتتىق كەڭىستىكتى باقىلاۋدى كۇشەيتۋدى قولدايمىز!», – دەدى ش.وتەگەنوۆ. ونىڭ ايتۋىنشا, ەلباسىنىڭ جىل سايىنعى جولداۋىن قولداي وتىرىپ, ينتەر­ناتسيوناليست-جاۋىنگەرلەر بارلىق جەردە تەرروريزم مەن ءدىني ەكسترەميزممەن كۇرەسۋدى ءارى قاراي جالعاستىرا بەرۋلەرى كەرەك. وسىعان بايلانىستى ول مەملەكەتتىك جانە قوعامدىق ينستيتۋتتاردىڭ ءتيىمدى ءوزارا جۇمىسى ءۇشىن ەكسترەميزم مەن تەرروريزم يدەولوگياسىنا قارسى ءىس-قيمىل جونىندەگى بىرىڭعاي ۇلتتىق ستراتەگيا ازىرلەۋدى ۇسىندى. «لاڭكەستىكپەن كۇرەسۋ ءۇشىن اۋعان سوعىسى مەن باسقا دا اسكەري شيەلەنىستەردىڭ ارداگەرلەرىنىڭ قوعامدىق بىرلەستىكتەرىنىڭ ءرولىن كۇشەيتۋ قاجەت. ءبىزدىڭ ەلگە ولاردىڭ بەدەلى مەن تاجىريبەسىن پايدالانا وتىرىپ, راديكاليزم, ەكسترەميزم جانە تەرروريزم يدەولوگيالارىن ناسيحاتتاۋىنا جول بەرمەۋ كەرەك», – دەدى ول. داستان كەنجالين, «ەگەمەن قازاقستان»