جۇكتەلگەن مىندەتتەردى جۇزەگە اسىرۋعا الەۋەت جەتەدى

شىعىس قازاقستاندا بيىل «بارشاعا تەگىن كاسىبي-تەحنيكالىق ءبىلىم بەرۋ» جوباسى اياسىندا 1730 ادام كاسىبي دايىندىقتان وتەدى. ءسۇتتى ساتىپ الۋ جانە وڭدەۋ بويىنشا 12 قاناتقاقتى كووپەراتيۆ قۇرىلادى. مەديتسينالىق كادرلاردى قايتا دايارلاۋعا قاتىستى ءۇش جىلدىق باعدارلاما ازىرلەنىپ, ءوڭىردىڭ 150 دارىگەرى شەت ەلدىڭ ۇزدىك كلينيكالارىندا شەبەرلىكتەرىن شىڭدايدى. وسكەمەندەگى د.سەرىكباەۆ اتىنداعى شىعىس قازاقستان مەملەكەتتىك تەح­نيكالىق ۋنيۆەرسيتەتىندە ايماقتاعى ءىرى كاسىپورىندارمەن بىرلەسە وتىرىپ قۇنى 8 ملرد تەڭگەنى قۇرايتىن 10 عىلىمي-زەرتتەۋ جوبالارى جۇزەگە اسىرىلادى. سەمەي قالاسىندا 2017 جىلدان باستاپ «تۇرعىن ءۇي جيناق بانكىنىڭ» سالىمشىلارى ءۇشىن جىل سايىن 1200 پاتەر سالىنادى. ەلباسى نۇرسۇلتان نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋى جان-جاقتى تالقىلانعان اكتيۆ جينالىسىندا وبلىس اكىمى دانيال احمەتوۆ ماڭىزدى ستراتەگيالىق قۇجاتتى جۇزەگە اسىرۋ اياسىندا وڭىردە وسىنداي بىرقاتار اۋقىمدى جوبالاردىڭ قولعا الىناتىنىن جەتكىزدى. جىلدىڭ باستى قۇجاتىن تالقى­لا­عان جيىندا ايماقتاعى ءىرى كاسىپ­ورىندار مەن جوعارى وقۋ ورىندارى­نىڭ وكىلدەرى ويلارىن ورتاعا سالدى. «كازتسينك» جشس مەتاللۋرگيا بو­يىنشا اتقارۋشى ديرەكتورى تۇرار­بەك ازەكەنوۆ مىڭداعان ادام ەڭبەك ەتەتىن الپاۋىت كاسىپورىننىڭ ۇجىمى ەل­باسى جولداۋىن زور ىقىلاسپەن قابىلداعانىن, زاۋىت الدىندا بىرنەشە ۇلكەن مىندەتتەردىڭ تۇرعانىن, الداعى ۋاقىتتا تاۋار ساپاسى مەن ەڭبەك ونىمدىلىگىن ارتتىرۋدى كوزدەپ وتىرعاندارىن تىلگە تيەك ەتتى. وبلىستاعى جاستاردىڭ اتىنان ءسوز العان وسكەمەندەگى د.سەرىك­باەۆ اتىن­داعى شىعىس قازاقستان مەم­لە­كەتتىك تەحنيكالىق ۋنيۆەرسيتەتىنىڭ تاربيە جۇمىسى جونىندەگى باسقارما­سىنىڭ باسشىسى رينات تەمىرجان جولداۋ­دىڭ ءوز قاتارلاستارىن ەرەكشە جىگەرلەن­دىرگەنىن اتاپ ءوتتى. «ءبىزدىڭ ۋنيۆەرسيتەت قازاقستاننىڭ ەكونوميكاسىن دامىتۋ ماقساتىندا جۇزەگە اسىرىلىپ جاتقان ۇدەمەلى يندۋستريالاندىرۋ باعدارلاماسىنا كادرلار دايىنداۋعا ىرىكتەلگەن رەسپۋبليكاداعى ون جوعارى وقۋ ورنىنىڭ قاتارىنا كىرەدى. مۇندا جاڭاشىل ويلايتىن, الدىڭعى قاتارلى ماماندار دايارلانۋدا. ەڭ باستىسى, مەكتەپتەر مەن جوعارى وقۋ ورىندارى اراسىندا تىعىز بايلانىس ورناعان. بولاشاقتا مۇنداي وقۋ ورىندارىندا ءبىلىم الۋعا دۇنيەجۇزىنىڭ وقۋشىلارى قىزىعۋشىلىق تانىتادى دەگەن جوسپار بار», – دەدى ول. «وريكا قازاقستان» اكتسيونەرلىك قوعامىنىڭ باس ديرەكتورى يۋليا يۋگاي بۇعان دەيىنگى ەكى جاڭعىرۋدىڭ ەل ومىرىندە ەرەكشە ماڭىزعا يە بولعانىن, مەملەكەت باسشىسىنىڭ ۇسىنعان ءۇشىن­شى جاڭعىرۋى قازاقستاننىڭ دامۋى­نا تىڭ سەرپىلىس بەرەتىن عالام­دىق دەڭگەيدەگى قۇندى قۇجات ەكەندىگىن ايتتى. ازامات قاسىم, «ەگەمەن قازاقستان» شىعىس قازاقستان وبلىسى