داۋرەن اباەۆ تەلەفونداردى مىندەتتى تىركەۋ تۋرالى نورمانى ءتۇسىندىردى

قر اقپارات جانە كوممۋنيكاتسيا ءمينيسترى داۋرەن اباەۆ Facebook جەلىسىندە تەلەفونداردى مىندەتتى تىركەۋ تۋرالى نورمانى ءتۇسىندىردى. "قۇرمەتتى دوستار, ۇيالى تەلەفونداردىڭ IMEI-كودتارىن تىركەۋ بويىنشا بىرقاتار سۇراققا جاۋاپ بەرىپ, تۇسىندىرگىم كەلەدى. بىرىنشىدەن, ءبىز تىركەۋ پروتسەدۋراسىن دايىنداۋعا كىرىسىپ كەتكەن جۇمىس توبىن قۇردىق. مامىر ايىنىڭ سوڭىنا دەيىن جاسالىپ, ازاماتتارعا جان-جاقتى تۇسىندىرىلەدى. ەكىنشىدەن, ءبىز تۇرعىلىقتى جەر بويىنشا ۋاقىتشا تىركەۋدىڭ تاجىريبەسىن ەسەپكە الدىق, سوندىقتان پروتسەدۋرا بارىنشا جەڭىل بولادى جانە ۇزىن-سونار كەزەك پەن دۇرلىگۋ تۋعىزبايدى", - دەپ جازدى مينيستر. ۇشىنشىدەن, ءمينيستردىڭ ايتۋىنشا, IMEI-كودتار بازاسىن جاساۋدىڭ حالىقارالىق تاجىريبەسى, ماسەلەن ۇلىبريتانيا, تۇركيا, ءازىربايجان تاجىريبەلەرىنىڭ ەسەپكە الىنادى. "تورتىنشىدەن, جۇيە ىسكە قوسىلعاندا تەلەفون ۇرلىعىن ايتارلىقتاي ازايتۋى كەرەك. سەبەبى تۇرعىن تەلەفونىنىڭ ۇرلانعانىن پوليتسياعا حابارلاسا, ونى ق ۇلىپقا تۇسىرۋگە بولادى. سوندا تەلەفون ۇرلىعىنىڭ ماقساتى بولماي قالادى. بۇگىندە ءىىم مالىمەتىنشە, ەلىمىزدە جىل سايىن 60 مىڭ شاماسىندا تەلەفون ۇرلانادى, ال قايتارىلۋ مۇمكىندىگى 5 پايىز عانا. ونىڭ ۇستىنە, كوپ جاعدايدا بالالار جابىرلەنۋشى بولىپ جاتادى. ەندى ولاردى قىلمىسكەرلەردىڭ قۇربانى بولۋىنىڭ الدىن الۋعا مۇمكىندىك بەرەتىن قۇرالىمىز بولادى", - دەپ جازدى مينيستر.