فۋتبولدا ەڭ كوپ گول سوعاتىن قورعاۋشىلار كىمدەر؟

فۋتبولدا شابۋىلعا ءجيى ارالاساتىن قورعاۋشىلاردىڭ كومانداعا تيگىزەر ۇلەسى زور. زينەدين زيدان تۇسىنداعى «رەال» قورعانىسى وسىنى ۇستاناتىن بولۋى كەرەك, ءدال وسى پوزيتسياداعى ارىپتەستەرىنەن 18 گولمەن كوش ىلگەرى كەلەدى. ناقتىراق ايتار بولساق, كورولدىك كلۋبتىڭ كاپيتانى سەرحيو راموس 8 گولمەن توپ باستاپ تۇرسا, ارىپتەسى رافاەل ۆاران 4 دوپ سوعىپ ۇلگەرگەن. ال سول قاپتالعا جاۋاپتى مارسەلو ەكى گولمەن تۇر. سونداي-اق, دانيەل كارۆاحال, دانيلو, پەپە, ناچو فەرناندەس قارسىلاستارىن ءبىر رەتتەن قاپى قالدىرعان. مادريد ۇجىمىنىڭ بۇل كورسەتكىشىنە ازىرگە ەشكىم ىلەسە الماي كەلەدى. يسپانيا بىرىنشىلىگىنىڭ 19-تۋرىندا «مالاگاعا» قارسى ويىندا راموس ەكى مارتە مەرگەندىگىمەن تانىلماسا, كومانداسى ءۇشىنشى ويىن قاتارىنان جەڭىلىس تابار ەدى. وسى كورسەتكىش بويىنشا ەكىنشى ورىندا 12 گولمەن يتاليانىڭ «يۋۆەنتۋس» كومانداسى, ال ۇزدىك ۇشتىكتى فرانتسيانىڭ «پاري-سەن-جەرمەنى» تۇيىندەپ تۇر.