وتاندىق فارماتسەۆتيكالىق نارىق كولەمى 360 ملرد تەڭگەگە جۋىقتادى

وتاندىق فارماتسەۆتيكالىق نارىقتىڭ كولەمى 360 ملرد تەڭگەگە جۋىقتاعان. بۇل تۋرالى بۇگىن ۇكىمەت وتىرىسىنان كەيىن تىلشىلەر ساۋالىنا جاۋاپ بەرۋ كەزىندە قر دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا ايتتى. «ونىڭ ىشىندە 160 ملرد. تەڭگەسىن مەملەكەت ساتىپ الادى, وعان باعالار بەلگىلەنگەن. ال 280 ملرد. تەڭگە بيزنەس ساتىپ الاتىن ۇلەسكە تيەسىلى. ونداعى تاۋارلار مەن قىزمەتتەر رەتتەلمەيدى. دەگەنمەن دە ءبىز بۇل ماسەلەنى قاراستىرىپ جاتىرمىز, وسى رەتتە بيزنەسپەن بىرگە ءتيىستى شارالاردى قامتۋىمىز مۇمكىن»,-دەدى مينيستر. سونىمەن قاتار ول قازاقستاندا ءدارى-دارمەكتىڭ قىمباتشىلىعىنا بايلانىستى تۇسىنىك بەردى. «تەگىن بازالىق مەديتسينالىق كومەك باعدارلاماسى بويىنشا دارىلەردى رەسەيدەن ساتىپ الامىز. ەگەر دە بۇل ەلدە قىمباتتاسا, بىزدە دە باعا كوتەرىلەدى. ال ءدارىحانالاردا وتكىزىلەتىن ءدارى-دارمەكتىڭ باعاسىن ءبىز رەتتەي المايمىز», - دەدى تامارا دۇيسەنوۆا. سونىمەن قاتار ول 2015 جىلدان باستاپ قازاقستان رەفەرەنتتىك باعا قالىپتاستىرۋعا كوشكەنىن ەسكە سالدى. «تەگىن مەديتسينالىق كومەك اياسىندا ءبىز ساتىپ الاتىن دارىلىك زاتتار بويىنشا بارلىق باعالار تومەن, سەبەبى 2015 جىلدان باستاپ رەفەرەنتتىك باعا قالىپتاستىرۋعا كوشتىك. وسى ورايدا رەسەيدەگى, بەلارۋستەگى, قازاقستاننىڭ ىشىندەگى, سونىمەن قاتار, ەۋروپانىڭ بەس ەلىندەگى  باعالاردى قارايمىز. سوندىقتان دا ساتىپ الىناتىن ءدارى-دارمەك بويىنشا قانداي باعا قالىپتاسىپ وتىرعاندىعى تۋرالى ناقتى ايتا الامىز. وتكەن جانە ونىڭ الدىنداعى جىلداردا دارىلىك زاتتاردى 2014 جىلدىڭ باعاسىمەن الدىق. قاداعالاۋ شارالارى جۇزەگە اسىرىلىپ جاتىر. ءبىز تەگىن مەديتسينالىق كومەكتىڭ كەپىلدەندىرىلگەن كولەمى اياسىندا ساتىپ الىناتىن دارىلىك پرەپاراتتاردىڭ باعاسىن تولىقتاي رەتتەپ وتىرمىز. ال قالعاندارى تەك نارىققا بايلانىستى, ياعني ءاربىر ديستريبيۋتور وزىنشە وندىرۋشىمەن شارت بەكىتىپ, وسىندا جەتكىزىپ, بولشەك نارىقتا ساتادى», - دەپ ءتۇسىندىردى مينيستر.