كومىر ونەركاسىبىن دامىتۋدىڭ جاڭا جول كارتاسى دايىندالدى

قر ەنەرگەتيكا مينيسترلىگىنىڭ پايىمىنشا, ەلدە كومىر ءوندىرۋ كولەمىنىڭ تومەندەۋى تۇرعىسىندا كومىرلى وڭىرلەردى دامىتۋ شارالارىن كۇشەيتۋ قاجەت, دەپ حابارلايدى قازاقپارات. «مونوقالالاردى, ونىڭ ىشىندە تەك كومىر وندىرىسىمەن اينالىساتىن قالالاردى تۇراقتى دامىتۋ ماقساتىندا جەرگىلىكتى اتقارۋ ورگاندارى جاڭا وندىرىستەردى قۇرۋعا, كادرلاردى قايتا وقىتۋ, ينفراقۇرىلىمدىق جوبالاردى دامىتۋعا نەگىزدەلگەن ەكونوميكانى ءارتاراپتاندىرۋ جۇمىستارىن كۇشەيتۋى ءتيىس», - دەدى قر ەنەرگەتيكا ءمينيسترى قانات بوزىمباەۆ ۇكىمەت وتىرىسىندا. وسى ورايدا ول ەكىباستۇز قالاسىن مىسال رەتىندە كەلتىردى. بۇل قالادا تەمىر جول ماشينا قۇرىلىسى بويىنشا بىرقاتار جوبالار ىسكە اسىرىلعان, سونىمەن قاتار ەنەرگەتيكالىق ماشينا قۇرىلىسى باعىتىندا وندىرىستەر سالىندى. بۇدان بولەك, قۇرىلىس يندۋسترياسى مەن جىلىجاي شارۋاشىلىقتارى دامىپ كەلەدى. دەگەنمەن دە, مينيسترلىك بىرنەشە باعدارلامالاردى كەڭەيتۋ جولىمەن ەلىمىزدە كومىر ءوندىرۋ دەڭگەيىن قولداۋ مەن ساقتاۋ بويىنشا جۇمىستاردى كۇشەيتۋ كەرەكتىگىن العا تارتتى. ونىڭ ىشىندە كەشەندى تۇردە كومىردى تەرەڭدەتىپ وڭدەۋ اياسىندا كومىردەن ديزەل وتىنىن جانە باسقا دا سينتەتيكالىق ونىمدەردى شىعارۋ ەسكەرىلمەك. «سونىمەن قاتار بۇگىندە شاحتالىق مەتاندى ەلەكتر ەنەرگياسىن وندىرۋگە پايدالانۋ باعىتىندا جۇمىستار اتقارىلۋدا. بۇل ءوز كەزەگىندە پارنيكتىك گازدارمەن لاستانۋدى ايتارلىقتاي تومەندەتەدى. وسى ورايدا قاراعاندى وبلىسىن گازبەن قامتاماسىز ەتۋ ماقساتىندا مەتاندىق-كومىر قاباتتارىن بارلاۋ مەن ءوندىرۋدى ەسكەرىپ وتىرمىن», – دەدى مينيستر.