كومىر ءوندىرۋ كولەمى نەلىكتەن قىسقاردى؟

بۇگىن ۇكىمەت وتىرىسىندا قر ەنەرگەتيكا ءمينيسترى قانات بوزىمباەۆ قازاقستاندا كومىر ءوندىرۋ كولەمىنىڭ قىسقارۋ سەبەپتەرىن ءتۇسىندىردى. «ءبىرىنشىسى, رف ۇكىمەتىنىڭ 2014 جىلعى 21 ماۋسىمداعى بۇيرىعىنا قاتىستى ياعني, 2030 جىلعا دەيىن رەسەي كومىر ونەركاسىبىن دامىتۋدىڭ باعدارلاماسىن قابىلدادى. وندا رف ەلەكتر ستانسالارىندا ەكىباستۇز كومىرىنىڭ ورنىنا كۋزنەتسك كومىرىن تۇتىنۋ قاراستىرىلعان. سونىمەن قاتار, رەسەيلىك جىلۋ ەلەكتر ورتالىقتارىنىڭ ءبىر بولىگى تابيعي گازدى جاعۋعا اۋىستىرىلدى. جۇزەگە اسىرىلعان جوبالار كۋزنەتسكتىك كومىردى جاعۋعا كوشتى», - دەدى بوزىمباەۆ. ءبىر ايتا كەتەرلىگى, كومىر ءوندىرۋ كولەمىنىڭ قىسقارۋى وزگە ەلدەردە دە بايقالۋدا. بۇعان «جاسىل» ەكونوميكاعا كوشۋ بويىنشا الەمدىك ۇدەرىس ىقپال ەتۋدە. قر ەنەرگەتيكا مينيسترلىگىنىڭ مالىمەتىن بويىنشا, 2016 جىلى 98 ملن. توننا كومىر وندىرىلگەن. بۇل جوسپاردىڭ 96 پايىزى. وتكەن جىلى ىشكى نارىققا 71,8 ملن. توننا جەتكىزىلسە, ەكسپورتقا 26,2 ملن.توننا شىعارىلدى.  ال 2017 جىلعى جوسپارعا 100 ملن. توننا قامتىلىپ وتىر.