بيزنەس مەملەكەتپەن بەلسەندىرەك جۇمىس ىستەۋ كەرەك - ەرمەكباەۆ

قازاقستاندىق بيزنەس مەملەكەت جانە ۇكىمەتتىك ەمەس ۇيىمدارمەن بەلسەندىرەك جۇمىس ىستەۋ كەرەك. مۇنداي پىكىردى قر ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ ءبىلدىردى. وسى ورايدا ءتيىمدى ۇشجاقتى سەرىكتەستىك جۇيەسىن ورناتۋ قاجەت, دەپ جازادى primeminister.kz. بۇگىندە قر-دا وسىنداي ءوزارا ءىس-قيمىلعا ارنالعان جاڭا الاڭ بار – بۇل ازاماتتىق باستامالارعا قولداۋ كورسەتۋ ورتالىعى. ورتالىق قىزمەتى اياسىندا بيزنەس ۇەۇ-عا ءتۇرلى گرانتتار بەرە الار ەدى. سوعان بايلانىستى ارنايى ورىنداردا بيزنەستىڭ ۇەۇ-مەن الەۋمەتتىك سەرىكتەستىككە قاتىسۋىنا مونيتورينگ جۇيەسىن ۇيىمداستىرۋ وتە ماڭىزدى. جالپى, مەملەكەتتىڭ ۇەۇ-مەن ءوزارا ءىس-قيمىل جاساسۋ دەڭگەيىن ءارى قاراي ارتتىرۋ ماقساتىندا بىرقاتار جۇيەلىك شارالاردى ىسكە اسىرۋ ۇسىنىلادى. مىسالعا, ورتالىق جانە جەرگىلىكتى مەملەكەتتىك ورگاندارعا بىرلەسكەن جوبالارىنىڭ تيىمدىلىگىن ارتتىرۋ ءۇشىن مەملەكەتتىك الەۋمەتتىك تاپسىرىس قىزمەتتەرىنىڭ ساپاسىن ارتتىرۋ باعىتىندا جۇمىستار اتقارىپ, جوبالاردىڭ تاقىرىپتامالارىن قالىپتاستىرۋ ۇدەرىسىنە ۇەۇ-دى بەلسەندىرەك تارتۋ كەرەك, سونىمەن قاتار, الەۋمەتتىك جوبالاردىڭ سالالىق باعىتتىلىعىن كەڭەيتۋ قاجەت. مينيسترلىك ازاماتتىق سەكتور ماسەلەلەرى جونىندەگى قولدانىستاعى نورماتيۆتىك بازانى تەكسەرۋمەن اينالىسۋدا. انىقتالعان كەمشىلىكتەردى ەسكەرە وتىرىپ, مەملەكەتتىك الەۋمەتتىك تاپسىرىس ناتيجەلەرىن قالىپتاستىرۋ, باقىلاۋ جانە باعالاۋدىڭ, ۇەۇ قىزمەتتەرىن ستاندارتتاۋدىڭ ناقتى قۇقىقتىق تەتىكتەرىن ازىرلەۋ جوسپارلانۋدا. سونىمەن قاتار, ۇەۇ-مەن بىرگە گرانت بەرۋ ەرەجەلەرىنە وزگەرىستەر ازىرلەنىپ جاتىر. ورتالىق مەملەكەتتىك ورگانداردى تاقىرىپتامالار مەن قارجىلاندىرۋ كولەمىن قالىپتاستىرۋعا تارتۋ, ال جەرگىلىكتى اتقارۋشى ورگاندارعا وڭىرلىك ۇەۇ ءۇشىن گرانتتىق قارجىلاندىرۋ قۇقىعىن ءبولىپ بەرۋ ۇسىنىلۋدا. مينيستر ۇەۇ-دىڭ شاعىن قالالار مەن اۋىلدارداعى تۇراقتىلىعىنا ول جەرلەردە اقپاراتتىق-رەسۋرستىق ورتالىقتاردىڭ قىزمەتىن ۇيىمداستىرۋ ارقىلى قول جەتكىزۋگە بولاتىنىن ايتىپ ءوتتى. ۇەۇ ساراپشىلارىنىڭ پىكىرىنشە, وبلىس ورتالىقتارىندا, استانا, الماتى قالالارىندا ۇەۇ مەن باستاما ءبىلدىرۋشى ازاماتتار ءۇشىن قىزمەتتەردىڭ كەڭ سپەكترىن ۇسىناتىن كونسالتينگتىك ورتالىقتار قۇرۋ قاجەت. وسى ورايدا اكىمدىكتەرگە «ءبىر تەرەزە» قاعيداسى بويىنشا ازاماتتىق ورتالىقتار اشۋ ءۇشىن بوس عيمارات تاۋىپ بەرۋ مۇمكىندىگىن قاراستىرۋ ۇسىنىلادى. ولاردىڭ قىزمەتىن ۇيلەستىرۋ ازاماتتىق باستامالارعا قولداۋ كورسەتۋ ورتالىعىنىڭ تاراپىنان جۇرگىزىلۋى مۇمكىن. بۇدان وزگە, بيزنەس-قوعامداستىقتاردى الەۋمەتتىك سەرىكتەستىككە كەڭىنەن تارتۋ ءۇشىن مەملەكەت, بيزنەس جانە «اسار» ۇەۇ اراسىندا ۇشجاقتى الاڭ قۇرۋ ۇسىنىلادى. فورۋم فورماتىن ەلىمىزدىڭ ءتۇرلى وڭىرلەرىندە جىل سايىنعى نەگىزدە وتكىزۋ قاجەت. اتالعان الاڭنىڭ باسىم باعىتتارىنىڭ ءبىرى الەۋمەتتىك كاسىپكەرلىكتى دامىتۋ بولادى.