2016 جىلى قىزىلوردا وبلىسىندا 79,0 ملرد تەڭگەنىڭ ءونىمى ءوندىرىلدى

قىزىلوردا وبلىسىنىڭ اكىمى قىرىمبەك كوشەرباەۆتىڭ توراعالىعىمەن وتكەن اگروونەركاسىپ كەشەنىن دامىتۋ جانە اۋىلشارۋاشىلىعى كووپەراتسيالارى ماسەلەلەرىنە ارنالعان جيىندا وتكەن جىلى اتقارىلعان جۇمىستار قورىتىندىلاندى. جيىندى اشا وتىرىپ, ايماق باسشىسى وتكەن جىلى اۋىل شارۋاشىلىعى سالاسىن ءارتاراپتاندىرۋ باعىتىندا اۋقىمدى ىستەر اتقارىلعاندىعىن اتاپ ءوتتى. كۇرىشتەن كەزەكتى رەكوردتىق ءونىم جينالدى, اۋىل شارۋاشىلىعىنىڭ وزگە دە  سالالارىندا ءوسىم بايقالادى. دەگەنمەن, اۋىلشارۋاشىلىق ونەركاسىبىنىڭ قارقىندى دامۋىن قامتاماسىز ەتۋ ءۇشىن الدا كوپتەگەن اۋقىمدى ىستەردى اتقارۋ مىندەتى تۇر. وبلىس اكىمىنىڭ ورىنباسارى سەرىك قوجانيازوۆتىڭ ايتۋىنشا, 2016 جىلى اگرارلىق سەكتوردى مەملەكەتتىك قولداۋعا 9,1 ملرد. تەڭگە ءبولىنىپ, كورسەتكىش 2015 جىلمەن سالىستىرعاندا 11,1% ارتقان. 79,0 ملرد. تەڭگەنىڭ ءونىمى وندىرىلگەن نەمەسە ءوسىم 2015 جىلمەن  سالىستىرعاندا  7,3%-عا ۇلعايعان. اۋىل شارۋاشىلىعىنىڭ نەگىزگى قورىنا سالىنعان ينۆەستيتسيا كولەمى 2016 جىلى 3822,3 ملن. تەڭگەنى قۇراپ, بىلتىرعى جىلمەن سالىستىرعاندا 2,2 ەسەگە ارتتى. 2016 جىلى وبلىس بويىنشا 133 اۋىل شارۋاشىلىعى كووپەراتيۆى قۇرىلعان: مال شارۋاشىلىعى سالاسىندا – 34, ەگىس سالاسىندا – 34, كوپسالالى – 65. قۇرىلعان كووپەراتيۆتەرگە بارلىعى 746 فەرمەرلىك شارۋاشىلىق بىرىككەن. سونداي-اق جيىندا اۋىل شارۋاشىلىعى كومپانيالارىنىڭ باسشىلارى ءسوز سويلەدى. ولار نارىقتا سۇرانىسقا يە ونىمدەر شىعارۋدىڭ ەرەكشەلىكتەرىنە توقتالىپ, كوكتەمگى ەگىس ناۋقانىنا دايىندىق جۇمىستارى تۋرالى باياندادى.