كەكۋشينكاي كاراتەدەن الەم چەمپيوناتىندا قازاقستان قۇراماسى ەكىنشى ورىن الدى

جاپونيانىڭ وكيناۆا قالاسىندا كەكۋشينكاي كاراتەدەن مارەگە جەتكەن ءتورتىنشى الەم چەمپيوناتىندا قازاقستان قۇراماسى ەكىنشى ورىندى ەنشىلەدى, دەپ حابارلايدى قازاقپارات. ءتورت جىلدا ءبىر رەت وتەتىن الەم چەمپيوناتىنا بۇل جولى قىرىقتان استام ەلدىڭ ۇزدىك سپورتشىلارى قاتىستى. قازاقستان قۇراماسى كەكۋشينكاي كاراتە تاريحىندا تۇڭعىش رەت جۇلدەلەر الىپ قانا قويماي, جالپىكوماندالىق ەسەپتە ەكىنشى ورىنعا قول جەتكىزدى. جاپونيا قۇراماسى 3 التىن, 1 كۇمىس, 1 قولا مەدالمەن كوش باستاسا, قازاقستاندىقتار 2 كۇمىس, 1 قولا جۇلدەنى جەڭىپ الدى. ءۇشىنشى ورىنداعى كانادانىڭ ەنشىسىنە ءبىر قولا جۇلدە عانا ءتيدى. ەرلەر ءابسوليۋتتى سالماق دارەجەسىندە كۇش سىناسسا, ايەلدەر 60 كەلىگە دەيىن جانە ودان جوعارى ەكى سالماقتا شەبەرلىك بايقاستى. باس باپكەر ءتاجىمۇرات نايزابەكوۆ جاتتىقتىراتىن قازاقستان نامىسىن 5 ەر, 6 ايەل قورعادى. سونىڭ ىشىندە سولونگو يسحان 60 كەلىدەن جوعارى سالماقتا, تيمۋر رايىمبەكوۆ ءابسوليۋتتى سالماقتا ەكىنشى, انار سۇيىندىكوۆا 60 كەلىگە دەيىنگى سالماقتا ءۇشىنشى ورىندى يەلەندى. ەسكە سالا كەتەيىك, كاراتە 2020 جىلى وتەتىن توكيو وليمپياداسىنىڭ باعدارلاماسىنا ەنگىزىلگەنى بەلگىلى.