تەلەفون الاياقتارى تيتىقتاتتى

تەلەفونمەن-اق اۋزىڭدى اڭقيتىپ كەتەتىن الاياقتار كەز كەلگەن وڭىردە بار. ادامنىڭ سەنىمىنە كىرۋدى شەبەر مەڭگەرگەن ولار جيعان-تەرگەنىڭىزدى ءاپ-ساتتە ۇپتەپ كەتۋى مۇمكىن. ءبىر عانا قاراعاندى وڭىرىندە بىلتىرعى جىلى تەلەفون الاياقتارىنان 23 ادام زارداپ شەگىپ, جالپى سوماسى 1 ميلليون تەڭگەدەي قاراجاتىنان ايىرىلعان. وبلىستىڭ ىشكى ىستەر دەپار­تامەنتى 2016 جىلى ورىن العان سونداي قىلمىس تۇرلەرىن جاريا ەتتى. الگى ايتقان وقيعالاردىڭ توعى­زىندا الاياقتار اڭقاۋ ازاماتتاردىڭ ءۇي تەلەفونىنا قوڭىراۋ شالىپ, وزدەرىن قۇقىق قورعاۋ ورگان­دارىنىڭ قىزمەتكەرىمىن دەپ تانىستىرىپ, تۇتقانى كوتەرگەن ادام­نىڭ ەت جاقىن ادامىنىڭ الدە­ب­ىر قىلمىس ءۇشىن ۇستالعانىن جانە سونى قۇتقارۋ ءۇشىن بەلگىلى ءبىر سوما قا­جەتتىگىن ايتىپ, «قارماققا ىلگەن». تاعى دا توعىز وقيعادا قىلمىس­كەرلەر تەلەفون يەسىنە ونىڭ تۋىسى نەمەسە وكىلى بولىپ حابارلاسىپ, قارىزعا نەمەسە ءبىر باعالى زاتتى ساتىپ الۋعا جەتپەي تۇرعانىن جەتكىزىپ, ولەردەگى ءسوزىن ايتىپ اقشا سۇراپ الداعان. ودان باسقا ءۇش جاعدايدا تۇتقانى كوتەرگەن ادامعا ونىڭ قوماقتى ۇتىسقا يە بولعانى حابارلانىپ, ونى الۋ ءۇشىن حابارلاعان ۇيالى تەلەفون نومىرىنە بىرلىك سالۋى سۇرالعان. ال تاعى ەكى جاعدايدا قوڭىراۋ شالعان الاياق قايسىبىر قىزمەت ءۇشىن اقى تولەنۋىن تالاپ ەتىپتى. البەتتە, بۇل وقيعالاردىڭ بىردە-ءبىرى بويىنشا ايىپتالۋشى تۇرماق, كۇدىكتى دە ۇستالعان جوق. ونىڭ باستى سەبەبى – زارداپ شەككەندەردىڭ ىشكى ىستەر ورگاندارىنا تىم كەش حابارلاۋى بولىپ وتىر. تەلەفون ارقىلى جاسالعان 23 الاياقتىقتىڭ ۇشەۋى بويىنشا قىلمىستىڭ ءىزى انىق­تالماعاندىقتان, تەرگەۋ-ىزدەستىرۋ امالدارى مۇلدە دوعارىلدى. قالعان جيىرماسى بويىنشا دا ەش كۇدىكتى قولعا تۇسپەگەندىكتەن, قىلمىستىق ىستەردى ۋاقىتشا توقتاتۋ تۋرالى شەشىم قابىلدانعان. قولدان كەلەتىنى: قازىر حالىق مەيلىنشە كوپ جۇرەتىن ورىندار مەن قوعامدىق كولىكتەردە تەلەفون الاياقتارى تۋرالى ساقتاندىرۋ اقپاراتتارى جاريالانىپ ءجۇر. ونىڭ ۇستىنە, پوليتسيا قانداي دا ءبىر ۇتىس ويىنىن جاريالاعان رەسمي ۇيىمداستىرۋشى سىيلىق ءۇشىن, ونى جەتكىزىپ بەرۋ مەن قۇجاتتارىن راسىمدەۋگە ەشقانداي قارجى تالاپ ەتپەيتىنىن ەسكەرتىپ وتىر. دەسەك تە, بۇل تۋرالى بۇقارالىق اقپارات قۇرالدارى ارقىلى بۇعان دەيىن دە قانشاما رەت حابارلاندى. اڭقاۋ ازاماتتار سوندا دا سەنگىشتىگىن قويار ەمەس. سەنىم جاقسى قاسيەت دەگەنىمىزبەن, ونىڭ وسىنداي ءبىر وپىق جەگىزەر تۇستارى دا بولاتىنىن ەستەن شىعارماعان ابزال. قايرات ءابىلدينوۆ, «ەگەمەن قازاقستان» قاراعاندى