اباي اتىنداعى ۋنيۆەرسيتەت ساپالى وقۋلىقتار شىعارۋدى ماقسات ەتەدى

الماتىداعى «عىلىم ورداسى» عيماراتىندا اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى سەرىك پىراليەۆ 2015-2016 وقۋ جىلىنداعى قىزمەتىنىڭ قورىتىندىلارى تۋرالى ءداستۇرلى حالىققا ەسەپ بەرۋ كەزدەسۋىن وتكىزدى.  كەزدەسۋگە ءبىلىم الۋشىلارمەن قاتار, ولاردىڭ اتا-انالارى, جۇمىس بەرۋشىلەر, عىلىمي-پەداگوگ جۇرتشىلىق پەن بۇقارالىق اقپارات قۇرالدارىنىڭ وكىلدەرى قاتىستى. مەملەكەت باسشىسى نۇرسۇلتان نازارباەۆتىڭ 2016 جىلعى اقپان ايىندا ورتالىق اتقارۋشى ورگاندار باسشىلارىنىڭ, اكىمدەر­دىڭ, ۇلتتىق جوعارى وقۋ ورىندارىنىڭ حالىق الدىنداعى اشىقتىعىن, جاۋاپتىلىعىن, ەسەپتىلىگىن ارتتىرۋ ماقساتىندا قول قويعان جارلىعىنا سايكەس وتكەن بۇل كەز­دەسۋدە جينالعان قاۋىم وقۋ ورنىنىڭ بۇگىنگى تىنىس-ءتىر­شى­­لىگىمەن جەتە تانىسىپ, ءبىراز مالىمەت الدى. ءوزىنىڭ 90 جىلدىق تاريحىندا 250 مىڭداي تۇلەكتى باپتاپ ۇشىرعان قارا شاڭىراق, ەلىمىزدەگى جەتەكشى ءارى ءىرى وقۋ ورنى – وتان­دىق پەداگوگيكالىق عىلىم مەن مادەنيەت ورداسىنا اينالعان اباي اتىنداعى قازاق ۇلتتىق پەداگوگيكالىق ۋنيۆەرسيتەتى جوعارى بىلىكتى ماماندار دايارلاۋ­دا ەلىمىزدەگى ءبىلىم شاڭىراقتارى اراسىندا 1-ءشى ورىنعا شىعىپ وتىر. جاڭا قوعامنىڭ باسەكەگە قابىلەتتى, جاڭاشا ويلاي بىلەتىن, شاكىرتتەرىنە شىعارماشىلىق-جاسامپازدىق تالاپ قويا بىلەتىن ساپالى مۇعالىمدەر دايارلاۋدى باستى مىندەتكە اينالدىرعان ۋنيۆەرسيتەتتە 2015/2016 وقۋ جىلىندا 6388 ادام ءبىلىم العان. پروفەسسور, قر ۇلتتىق عىلىم اكادەمياسىنىڭ مۇشەسى, قر ءبىلىم بەرۋ ءىسىنىڭ ۇزدىگى سەرىك پىراليەۆ ءوزى باسقارىپ وتىرعان وقۋ ورنى­نىڭ ەۋروپا مەن ورتالىق ازيا ەلدەرىنىڭ 200 الدىڭعى قاتار­لى ۋنيۆەرسيتەتتەرى اراسىندا 91-ءشى ورىندى, قازاقستان ۋنيۆەرسيتەتتەرى اراسىندا 4-ءشى ورىندى يەلەنىپ وتىرعانىن اتاپ ءوتتى. ەلباسىمىز بەلگىلەپ, ەلىمىز الدىنا ماقسات ەتىپ قويعان وزىق ەلدەر قاتارىنا كىرۋ جولىندا, وزگەلەرمەن باسەكەلەس بولا بىلەر ءبىلىمدى ۇرپاق تاربيەلەۋدە ۇستازدار قاۋىمىنا تۇسەر سالماق تا, مىندەت تە زور.  وسى تۇرعىدان العاندا, كادرلاردىڭ ساپالىق قۇرامىن جاقسارتۋمەن ۇزبەي اينالىساتىن جوعارى وقۋ ورداسىندا بەرىلەتىن ءبىلىم ساپاسىن كوتەرۋگە ايرىقشا نازار اۋدارىلىپ, ۋنيۆەرسيتەت­تىڭ وقىتۋشىلارى قاتارىنا قر ۇعا اكادەميكتەرى كوپتەپ تارتىلعان ەكەن. ۋنيۆەرسيتەتتەگى عىلىم جانە عىلىمي-پەداگوگيكالىق كادرلاردى ساپالى دايىنداۋ ءۇشىن شەتەلدىكتەردىڭ ءبىلىم مەن عىلىمدى ينتەگراتسيالاۋ جونىندەگى يننوۆاتسيالىق ءتاجى­ريبەلەرى كەڭىنەن وقىتىلىپ, قولدانىسقا ەنگىزىلىپ جاتقانى كوڭىل سەرپىلتەدى. اباي اتىنداعى ۋنيۆەرسيتەت عيماراتىندا 2014 جىلى اشىل­عان, فرانتسيانىڭ 800 جىلدان استام تاريحى بار سوربوننا-پاريج سيتي ۋنيۆەرسيتەتىنىڭ تمد ەلدەرى مەن ورتالىق ازياداعى العاشقى فيليالى بولىپ تابىلاتىن «سوربوننا-قازاقستان» ينستيتۋتى وتكەن وقۋ جىلىندا العاشقى تۇلەكتەرىن ۇشىردى. الەمدىك ءبىلىم بەرۋ كەڭىستىگىندە قازاقستاندىق ءبىلىمنىڭ مارتەبەسىن نىعايتۋدا اتال­مىش ۋنيۆەرسيتەت وسىلايشا ۇلكەن ۇلەس قوسىپ كەلەدى. «ۋنيۆەرسيتەت الدىنا قويعان ماقساتتاردىڭ ءبىرى – ەلىمىز ءۇشىن اسا ماڭىزدى سانالاتىن وقۋلىقتار شىعارۋ. جالپى ءبىلىم بەرەتىن ورتا مەكتەپتەرگە ارنالعان وقۋ­لىقتاردى تۇگەلدەي وسى ۋنيۆەرسيتەت وقىتۋشىلارى جازدى. بۇل ايتقانعا, سىناعانعا وڭاي بولعانمەن, اسا كۇردەلى, ۇلكەن جۇمىس», دەدى حالىق الدىنداعى ەسەبىندە ۋنيۆەرسيتەت رەكتورى  سەرىك پىراليەۆ. ايتپاقشى, اتالمىش وقۋ ورنىنىڭ بيىلعى جىلعى ءبىر جاڭا­لىعى – رەسپۋبليكا اۋماعى بويىنشا جالپى ءبىلىم بەرەتىن 15 ورتا مەكتەپ وقۋشىلارىنا ۋنيۆەرسيتەت وقىتۋشىلارىنىڭ ونلاين-رەجىمدە ساباق بەرۋ جۇيەسى ىسكە قوسىلعانى ەكەن. بۇل كەلەشەكتە ۇستاز ماماندىعىن تاڭداعىسى كەلگەن جاسوسپىرىمدەرمەن جانە ورتا مەكتەپتەرمەن تىعىز قارىم-قاتىناس ورناتۋعا باعىتتالعان قادام بولماق. قازاقتىڭ ۇلى ويشىلى, دانىشپان ابايدىڭ مۇرالارىن ناسيحاتتاۋ, ونى ۇلىقتاۋ اباي اتىنداعى قازۇپۋ-ءدىڭ ابىرويلى بورىشى. وسى بورىش ۇدەسىنەن شىعۋ ءۇشىن, ابايدىڭ ادەبي جانە فيلوسوفيالىق ­مۇرالارىن الەمدىك دەڭگەيگە تانىتۋ ماقساتىندا ۋنيۆەرسيتەتپەن ارىپتەستىك ورنات­قان شەتەلدىك ۋنيۆەرسيتەتتەردە اباي اتىنداعى 5 حالىقارالىق ءبى­لىم بەرۋ ورتالىعى جۇمىس ىستەيدى. جوعارى وقۋ ورىندارىنىڭ نەگىزگى دىڭگەگى – ستۋدەنتتەر. سە­رىك جايلاۋ ۇلى وقۋ ورنىنداعى ستۋدەنتتەردىڭ ءبىلىم الۋ جاع­دايىنا ەرەكشە كوڭىل ءبولىنىپ جاتقاندىعىن, كوپ بالالى وتباسىلاردان شىققان, مۇگەدەك جانە قامقورلىققا الىنعان مۇقتاج ستۋدەنتتەرگە ماتەريالدىق قولداۋ كورسەتىلەتىنىن, الىس ايماق­تاردان كەلگەن ستۋدەنتتەردىڭ جاتاق­حانا­مەن قامتاماسىز ەتىل­گەنىن دە ايتىپ ءوتتى. ۋنيۆەرسيتەت ۇجىمى قازاق­ستان پرەزيدەنتى نۇرسۇلتان نازارباەۆتىڭ «ءبىز ۋنيۆەرسيتەتتىك ءبىلىم بەرۋ مەن عىلىمدى جاڭا دەڭگەيگە كوتەرۋدى قامتاماسىز ەتۋىمىز كەرەك» دەگەن تاپسىرماسىن باسشىلىققا الا وتىرىپ, ەلىمىزگە ساپالى كادرلار دايارلاۋ ءۇشىن تاباندىلىقپەن ەڭبەك ەتە بەرەتىنىن, وعان ۋنيۆەرسيتەت عالىم-پەداگوگتارىنىڭ مۇمكىندىگى تولىق جەتەتىنىنە سەنىم ءبىلدىردى. رەكتور بايانداماسىنان كە­يىن مىنبەرگە شىققان قر ۇعا اكادەميگى سەرىك قيراباەۆ, قاز­ۇپۋ باقىلاۋ كەڭەسىنىڭ مۇشەسى, پەداگوگ ءشامشا بەركىمباەۆا, قازاقستاننىڭ ەڭبەك ەرى اياگۇل ميرازوۆا, پروفەسسور جاقان مولدابەكوۆ, فرانتسيانىڭ ال­ماتى­داعى باس كونسۋلدىعىنىڭ اتتاشەسى سەۆەرين ۆان گاستەل ۋنيۆەرسيتەت جۇمىسىنا قاتىستى كەڭەس-ۇسىنىستارىن ايتتى. ميرا بايبەك, «ەگەمەن قازاقستان» الماتى