قازاقستان قۇراماسى قىرعىز فۋتبولشىلارىنان جەڭىلىپ قالدى

فۋتبولدان قازاقستان قۇراماسى بۇگىن بىشكەكتە قىرعىزستان باس كومانداسىمەن وتكەن جولداستىق كەزدەسۋدە 0:2 ەسەبىمەن ۇتىلىپ قالدى. الاڭ يەلەرى قوناقتار قاقپاسىنا ءار تايمدا ءبىر گولدان سوقتى. ماتچتىڭ ءبىرىنشى تايمى قىرعىزداردىڭ باسىمدىلىعىمەن ءوتتى. سوندىقتان سوعىلعان گول سول شابۋىلداردىڭ زاڭدى ناتيجەسى بولىپ تابىلدى. ونى 43-مينۋتتا بەرىلگەن بۇرىشتامانى جاقسى پايدالانعان قىرعىزستان قۇراماسىنىڭ قورعاۋشىسى ۆالەري كيچين الىستان ۇرىپ ءتۇسىردى. كەزدەسۋدىڭ ەكىنشى تايمىندا قازاقستان قۇراماسى بىرقاتار ويىنشىلاردى الماستىرىپ, شابۋىلدا قارقىندى ويناي باستادى. الايدا, گولدى ولار ەمەس, تاعى دا الاڭ يەلەرى سوعىپ كەتتى. 82-مينۋتتا ميرلان مۋرزاەۆ ەسەپتى 2:0-گە جەتكىزدى. بۇل تىزگىنىن باس جاتتىقتىرۋشى تالعات بايسۋفينوۆ ۇستاعالى بەرگى قازاقستان قۇراماسىنىڭ ءبىرىنشى جەڭىلىسى بولدى. بۇدان بولەك, كوماندا قىرعىزستان فۋتبولشىلارىنا وسى جولى العاش رەت ۇتىلدى. ەكى قۇراما اراسىندا وتكەن بۇعان دەيىنگى 7 ويىننىڭ بەسەۋىندە قازاقستاندىقتار جەڭىسكە جەتكەن بولسا, ەكى كەزدەسۋ تەڭ اياقتالعان ەدى. قازاقستان تەرمە جاماعاتى كەلەسى ويىنىن 4 قىركۇيەك كۇنى استانادا وتكىزەدى. ول پولشا قۇراماسىن قابىلدايدى. وسىلايشا 2018 جىلعى الەم چەمپيوناتىنىڭ ىرىكتەۋ ءتۋرنيرىن باستاپ كەتەدى. دامير قوجامقۇل