بۇگىنگىدەي ەلىمىزدىڭ گۇلدەنگەن شاعىن كوزبەن كورگەندەي ەتىپ اقىن مۇقاعالي ماقاتاەۆ «بىلەمىن ءبىر كەرەمەت كۇن تۋادى, جان-جاعىم جانناتتايىن قۇلپىرادى», دەگەن ەكەن. شىنىندا, ارقا توسىندەگى جاس قالادا الەمدىك دەڭگەيدەگى ءبىلىم بەرەتىن ۋنيۆەرسيتەت اشىلىپ, وندا جۇزدەن جۇيرىك شىققان 500 تالانتتى بالانىڭ وقىپ جاتقانى بەلگىلى. مىنە, سول وقۋ ورنى «سەكسەن جاساپ, سەگىز ءسوز قالدىرماعان, الدەكىمنىڭ تاعدىرى بۇيىرماسىن» دەپ ارتىنا ۇشان-تەڭىز جىر جاۋھارىن قالدىرعان جىر جامپوزىنىڭ 80 جىلدىق مەرەيتويىن اتاپ ءوتىپ, ونى ۇيىمداستىرۋشى ۇستازدار مەن ستۋدەنتتەر ءبىرىنشى رۋحاني كەشىمىزدى مۇقاعاليدىڭ تۋعان كۇنىنەن باستاۋدى جاقسى ىرىمعا بالادىق, دەدى. كەش تۋرالى العاشقى ءسوزدى ۋنيۆەرسيتەتتىڭ ۆيتسە-پرەزيدەنتى قاديشا دايىروۆا باستاپ, كەلگەن قوناقتارعا ءبىلىم الىپ جاتقان جاستاردىڭ 92 پايىزى ءوز قانداستارىمىز ەكەنىن ماقتانىشپەن ايتتى.
اقىننىڭ «پوەزيا» دەگەن تۋىندىسىن يۋ.نەحوروشيح قازاق تىلىندە زاۋلاتسا, «فاريزانى» ءا.ءابىلعازيەۆ دومبىرامەن توگىلدىردى. ال «اققۋلار ۇيىقتاعاندا» اتتى تۋىندىسى بويىنشا ساحنالىق قويىلىم كوڭىلدەن شىقتى. اسىرەسە, دينا اسقاروۆا ويناعان انا بەينەسى جۇرەك تەربەتپەي قويمادى.
قاناتىن كەڭگە جايىپ كەلە جاتقان ىرگەلى وقۋ ورنىندا وتكەن كەشكە قازاقتىڭ اقيىق اقىن قىزى فاريزا وڭعارسىنوۆا قاتىسىپ: «نازارباەۆ ۋنيۆەرسيتەتى اشىلعاندا, قاتتى قۋاندىق. وندا وقيتىندار كىم ەكەن, ۇلت رۋحىن قاستەرلەي الار ما ەكەن, دەگەن كۇدىك تە بولماي قويماپ ەدى. ەندى كۇدىكتى ءۇمىت جەڭدى. وسىنداي كەشتى ۇيىمداستىرعان مەنىڭ عالىم ءسىڭىلىم گۇلتاس قۇرمانباي باستاعان ستۋدەنتتەردىڭ قۇرمانعازىنىڭ «بالبىراۋىنىن», دينانىڭ «ناۋايىن», نۇرعيسانىڭ «اققۋىن» ورىنداپ, اقىن ولەڭىنىڭ ءمانىن بۇزباي جاتقا ايتىپ, سوزىنە جازىلعان اندەردىڭ ىرعاعىمەن بي-بيلەپ جاتۋى اقىنعا كورسەتكەن قۇرمەتى دەپ بىلەمىن. مۇقاعالي قازىر ابايدان كەيىن كوپ وقىلاتىن اقىن. مەن جاستارعا اقىننىڭ بەينەتىن ەمەس, ابىروي-اتاعىن تىلەيمىن» دەسە, سەناتور ءادىل احمەتوۆ جىر ءدۇلدۇلىنىڭ ولەڭدەرىنە مىسال كەلتىرە وتىرىپ, «ولمەيتۇعىن ارتىندا ءسوز قالدىرعان» دەگەن وسى, دەدى. سەناتور عاريفوللا ەسىم ءبىز كەڭەس داۋىرىندە قىزمەتتى ويلاپ, دىننەن قول ءۇزىپ قالعان تۇستا مۇقاعالي اقىننىڭ: «ءدىن – عىلىم اتاسى» دەۋى ونىڭ كورەگەندىگى دەگەن بايلامىن ورتاعا سالدى. كەشتە پروفەسسور س.نەگيموۆ اقىن ولەڭدەرىندەگى شەشەندىك يىرىمدەرگە توقتالسا, «نۇريكوم» كومپانياسىنىڭ پرەزيدەنتى ن.قۇدايبەرگەنوۆ وقۋ ورنى ستۋدەنتتەرىنىڭ مۇقاعاليعا كورسەتكەن قۇرمەتىنە ءدان ريزالىعىن ءبىلدىرىپ, اباي ولەڭدەرىن وقيتىن «سيقىرلى» قالامدى سىيعا تارتتى. سونىمەن, تالانتتار وقيتىن وقۋ ورنى تالانتتى اقىنعا وسىلايشا قۇرمەت كورسەتتى.
سۇلەيمەن مامەت.
