پارلامەنت سەناتى مەن ءماجىلىسىنىڭ ءبىر توپ دەپۋتاتى قىزىلجار ءوڭىرىنىڭ تۇرعىندارىمەن كەزدەسىپ, كەلەلى ماسەلەلەر بويىنشا تانىمدىق اڭگىمەلەر قوزعادى.
سەناتور سەرىك ءبىلالوۆ قىزىلجار اۋدانىندا بولعان جۇمىس ساپارىندا ءوندىرىس ورىندارىن ارالاپ, ۇجىم مۇشەلەرىمەن كەزدەستى. نەگىزگى تاقىرىپقا «100 ناقتى قادام» ۇلت جوسپارىنىڭ شىعارىلۋى كەزدەيسوق ەمەس, دەدى جينالعاندارعا قاراتا ايتقان سوزىندە سەرىك سۇلتانعازى ۇلى. ەلباسى ۇسىنعان باسىم باعىتتار «2050» ستراتەگياسىن جۇزەگە اسىرۋدىڭ, مەملەكەتتىلىگىمىزدى نىعايتۋدىڭ, كاسىبي مەملەكەتتىك اپپارات قۇرۋدىڭ, زاڭنىڭ ۇستەمدىگىن قامتاماسىز ەتۋدىڭ بۇلجىماس قاعيداتتارى بولىپ تابىلادى.
ودان ءارى ول اۋىلدىقتار ءۇشىن ماڭىزى ەش كەم ەمەس يندۋستريالاندىرۋ جانە ەكونوميكالىق ءوسىم ماسەلەسىنە توقتالىپ, 35-قادامدا اۋىلشارۋاشىلىق جەرلەرىن ءتيىمدى پايدالانۋ ماقساتىمەن ولاردى نارىقتىق اينالىمعا ەنگىزۋدىڭ تەتىكتەرى بەلگىلەنگەنىن, مۇنداي شارالار ادامداردىڭ جەرگە دەگەن پيعىلىن وزگەرتىپ, جەكەمەنشىك قارىم-قاتىناس كوزقاراسىن ورنىقتىراتىنىن جەتكىزدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى