حالىقارالىق «نەۆادا-سەمەي» انتيادرولىق قوزعالىسىنىڭ بەلسەندىسى, سۋرەتشى كارىپبەك كۇيىكوۆتىڭ ەسىمى كوزىقاراقتى وقىرمانعا جاقسى تانىس. پوليگون زاردابىن تۋماي جاتىپ تارتقان, كەمتار بولىپ تۋسا دا ومىرگە دەگەن قۇشتارلىعىن جوعالتپاعان جاننىڭ قايسار رۋحىنا بۇگىندە كوپ جۇرت ءتانتى بولعان. ەكى قولدىڭ جوقتىعىنان اۋزىمەن جانە اياعىمەن سۋرەت سالىپ, يادرولىق جارىلىستاردىڭ قاسىرەتىن ونەرىمەن ايىپتاپ جۇرگەن ازاماتتىڭ ىسىنە قالايشا سۇيسىنبەيسىڭ؟!
جاقىندا وعان حابارلاسىپ, ەلباسى نۇرسۇلتان نازارباەۆتىڭ يادرولىق قاۋىپسىزدىك جونىندەگى سامميتتە سويلەگەن سوزىنە قاتىستى پىكىرىن سۇراپ-بىلگەن ەدىك.
– جالپى, بۇل ماسەلە ماعان مەيلىنشە تانىس بولعاندىقتان دا سامميت بارىسىن تەلەديدار جانە گازەت ارقىلى باستان-اياق قاداعالاپ وتىردىم, – دەپ باستادى ول اڭگىمەسىن. – مەنى, اسىرەسە, ەلباسى ۇسىنعان «ءححى عاسىر: سوعىسسىز الەم» اتتى باعدارلاما ءتانتى ەتتى. بۇل قۇجاتتىڭ وزەگى رەتىندە «نەۆادا-سەمەي» قوزعالىسى كوتەرگەن كوپتەگەن ماسەلەلەردىڭ دە كورىنىس تاپقانىنا قۋاندىم. باعدارلامانىڭ الەمدى يادرولىق قارۋدان قۇتقارۋدىڭ امال-ارەكەتىن جان-جاقتى قامتىعانىنا جانە دە ول ءوزىنىڭ جەمىسىن بەرەتىنىنە سەنىمدىمىن.
بۇگىنگى كۇندە بۇكىل الەمدى تەرروريزم پروبلەماسى قاتتى الاڭداتىپ وتىر. سامميتتە ەلباسى نۇرسۇلتان نازارباەۆ بۇل شەتىن ماسەلەگە ەرەكشە ءمان بەردى. مىسالى, اتوم ەنەرگياسىمەن جۇمىس ىستەيتىن نىساندار قاۋىپسىزدىگىن قامتاماسىز ەتۋ, يادرولىق ماتەريالداردىڭ تەررورشىلار قولىنا ءتۇسۋىنە جول بەرمەۋ شارالارى جونىندە ايتقان ويلارى كوكەيكەستىلىگىمەن ەرەكشەلەندى. ەلباسىنىڭ: «بۇل ءۇشىن بۇكىل حالىقارالىق قوعامداستىقتىڭ بىرلەسكەن ناقتى جۇمىسى قاجەت. مەن تەررورلىق ۇيىمدارعا قاتىسى بار اركىمدى باقىلاۋعا الۋعا بولاتىن ءبىرىڭعاي الەمدىك جەلى قۇرۋ قاجەت دەپ سانايمىن», دەگەنى ونىڭ الەمدىك دەڭگەيدە ويلاپ, ادامزات بالاسىنىڭ قامىن جەيتىن قايراتكەر تۇلعا ەكەنىن اڭعارتسا كەرەك.
جالپى, ءوز باسىم قازاقستاننىڭ يادرولىق قارۋدان العاشقىلاردىڭ ءبىرى بولىپ باس تارتقانىن ادامزات بالاسىنىڭ بەيبىت ءومىر ءسۇرۋ ىسىنە قوسقان ۇلكەن ۇلەسى رەتىندە باعالايمىن. بۇگىنگى كۇندە ءبىزدىڭ ەلىمىزدىڭ وسىناۋ باتىل قادامىنا الەمدىك قوعامداستىقتىڭ ءوزى اسا جوعارى باعا بەرىپ, ءوز كەزەگىندە بۇل باستاما قازاقستاننىڭ جاعىمدى ءيميدجىنىڭ قالىپتاسۋىنا زور ىقپالىن تيگىزىپ جاتىر. مۇنىڭ ءوزى ەلباسىمىزدىڭ ۇزاق جىلداردان بەرى يادرولىق جارىلىستار مەن جاپپاي قىرىپ-جوياتىن قارۋلارعا قارسى تاباندى تۇردە جۇرگىزىپ كەلە جاتقان جۇمىسىنىڭ ناقتى جەمىسى.
– قازىر نەمەن اينالىسىپ ءجۇرسىز؟ ءوزىڭىزدىڭ شىعارماشىلىعىڭىز تۋرالى ايتا كەتسەڭىز.
– قازىرگى كەزدە مەن كوبىنە پەيزاج سالۋمەن اينالىسىپ ءجۇرمىن. ارينە, ءوزىمدى تولعاندىراتىن يادرولىق جارىلىس تاقىرىبىنا دا ءالسىن-ءالسىن ورالىپ وتىرۋىما تۋرا كەلەدى. ونداعى ماقساتىم – ادامدار بۇل قاسىرەتتى ەستەن شىعارماسا ەكەن, ونىڭ زارداپتارىنىڭ قانداي سۇراپىل ەكەنىن ءبىلىپ جۇرسە ەكەن دەگەن وي.
مەنى كەيدە مەكتەپتەردەگى, ءتىپتى, تۇرمەلەردەگى ءتۇرلى كەزدەسۋلەرگە شاقىرىپ جاتادى. ولارعا مەن قۋانا بارامىن. مۇنداي جۇزدەسۋلەر ماعان كۇش-قۋات جانە شابىت بەرەدى. ءوزىڭنىڭ قوعامعا كەرەكتىگىڭدى جانە تيتتەي دە بولسا پايداڭدى تيگىزە الاتىنىڭدى سەزىنۋدىڭ ءوزى ادامعا كەرەمەت اسەر ەتەدى. مۇنداي كەزدەسۋلەردە مەن يادرولىق جارىلىستاردىڭ قازاق جەرىنە اكەلگەن زاردابى تۋرالى ايتىپ, وسكەلەڭ ۇرپاقتى بولاشاقتا ەل مەن جەردىڭ تاعدىرىنا نەمقۇرايدى قاراماۋعا شاقىرامىن. وسىنىڭ ءوزىن مەن يادرولىق قارۋسىز الەم قۇرۋ ىسىنە قوسقان تامشىداي ۇلەسىم دەپ تۇسىنەمىن.
– ءدال قازىرگى ۋاقىتتا ءسىزدى ونەر ادامى جانە قوعام بەلسەندىسى رەتىندە تاعى قانداي ماسەلەلەر تولعاندىرادى؟
– وسىدان ءبىراز جىل بۇرىن اقش-تىڭ نەۆادا شتاتىندا بولعانىمدا, جەرگە تىزەرلەي وتىرا قالىپ, ەكى بەتىن جاس جۋىپ, وزىنەن ءوزى كۇبىرلەپ سويلەپ جاتقان ادامدى بايقاپ قالدىم. اۋدارماشىدان سۇراعانىمدا, ول الگى ادامنىڭ ادامزات بالاسىنىڭ ىستەگەن قياناتى ءۇشىن جەر-انادان كەشىرىم سۇراپ جاتقانىن ايتتى. بۇل وقيعا ماعان وتە قاتتى اسەر ەتتى.
كەۋدەمدە جانىم قالعانشا يادرولىق جارىلىستاردى ايىپتاپ, بۇل قاسىرەتتەن زارداپ شەككەندەردىڭ پروبلەمالارىنا شىعارمالارىم ارقىلى جۇرتشىلىقتىڭ نازارىن اۋدارۋعا تىرىسىپ كەلەمىن. بۇل ءىستى جالعاستىرا بەرۋ – مەنىڭ ازامات رەتىندەگى اسقاق ميسسيام! ەلباسىنىڭ ءوزى ابىرويىمىزدى اسقاقتاتقان جاھاندىق جيىن – سامميتتە سويلەگەن سوزىندە ءدال قازىرگى ۋاقىتتا ادامزاتتى سوعىس قارۋىنان ارىلتۋدان وتكەن كوكەيكەستى مىندەت جوق دەدى ەمەس پە؟!
– اڭگىمەڭىزگە راحمەت.
قايرات ءابىلدينوۆ.
«ەگەمەن قازاقستان».
قاراعاندى.